ଜମୁନାଶୁଳରେ ବାରୁଣୀ ସ୍ନାନ ଓ ସାର୍ବଜନୀନ ଚଉଦ ମାଦଳ ଉତ୍ସବ ଉଦ୍ଯାପିତ
ବାଲିଆପାଳ : ବାଲିଆପାଳ ବ୍ଲକ ଜମୁନାଶୁଳ ଠାରେ ରବିବାର ବାରୁଣୀସ୍ନାନ ପାଇଁ ହଜାର ହଜାର ଶ୍ରଦ୍ଧାଳୁ ବୁଡ଼ ପକାଇଥିଲେ । ଏହି ଉପଲକ୍ଷେ ଜମୁନାଶୁଳ ବାରୁଣୀ ମେଳା ପଡ଼ିଆରେ ଗୁରୁବାର ଠାରୁ ଅନୁଷ୍ଠିତ ସାର୍ବଜନୀନ ଚଉଦ ମାଦଳ ଉତ୍ସବ ଉଦ୍ଯାପିତ ହୋଇଯାଇଛି । ୪ ଟି ସଂକୀର୍ତ୍ତନ ଦଳ ଏଥିରେ ଅଂଶଗ୍ରହଣ କରି ନାମ ସଂକୀର୍ତ୍ତନରେ ଭାଗ ନେଇଥିଲେ । ସନ୍ଧ୍ୟାରେ ଅନୁଷ୍ଠିତ ମେଳି କାର୍ଯ୍ୟକ୍ରମକୁ ହଜାର ହଜାର ଶ୍ରଦ୍ଧାଳୁ ଉପଭୋଗ କରିଥିଲେ ।
ଉଦ୍ଯାପନୀ ଦିବସରେ ବିଜୁ ମହିଳା ଜନତା ଦଳର ରାଜ୍ୟ କାର୍ଯ୍ଯକାରୀ ସଭାପତି ସୁବାସିନୀ ଜେନା ଯୋଗଦେଇ ପ୍ରଭୁଙ୍କ ଆଶୀର୍ବାଦ ଭିକ୍ଷା କରିବା ସହ ଅଞ୍ଚଳବାସୀଙ୍କ ସୁଖ ସମୃଦ୍ଧି କାମନା କରିଥିଲେ । ପବିତ୍ର ବାରୁଣୀ ସ୍ନାନ ପାଇଁ ଜମୁନାଶୁଳ ବାରୁଣୀ ଘାଟରେ ହଜାର ହଜାର ଶ୍ରଦ୍ଧାଳୁ ବୁଡ ପକାଇଥିଲେ ଏବଂ ପ୍ରସାଦ ସେବନରେ ଯୋଗ ଦେଇଥିଲେ । ନୂଆଗାଁ ପଞ୍ଚାୟତର କର୍ମକର୍ତ୍ତା ଓ ଜମୁନାଶୁଳ ବାରୁଣୀମେଳା କମିଟିର ସଦସ୍ୟ ଉପସ୍ଥିତ ରହି ସମସ୍ତ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ । ମେଳାକୁ ତଦାରଖ କରିବା ପାଇଁ ପୋଲିସ ପ୍ରଶାସନ ପକ୍ଷରୁ ଶାନ୍ତିଶୃଙ୍ଖଳା ରକ୍ଷା କରାଯାଇଥିଲା ।
