୧୫ ଯାଏଁ ବଢ଼ିଲା ଜ୍ୟାକଲିନଙ୍କ ଅନ୍ତରୀଣ ସୁରକ୍ଷା
ନୂଆଦିଲ୍ଲୀ: ଦିଲ୍ଲୀର ଏକ କୋର୍ଟ ଠକ ସୁକେଶ ଚନ୍ଦ୍ରଶେଖର ସହ ଜଡ଼ିତ ୨୦୦ କୋଟି ମନି ଲଣ୍ଡରିଂ ମାମଲାରେ ଅଭିନେତ୍ରୀ ଜ୍ୟାକଲିନ ଫର୍ଣ୍ଣାଣ୍ଡିଜଙ୍କ ଜାମିନ ଆବେଦନ ଉପରେ ନିଷ୍ପତ୍ତି ନଭେମ୍ବର ୧୫ ପର୍ଯ୍ୟନ୍ତ ଘୁଞ୍ଚାଇଛନ୍ତି ।
କୋର୍ଟ ଫର୍ଣ୍ଣାଣ୍ଡିଜଙ୍କ ଅନ୍ତରୀଣ ସୁରକ୍ଷାକୁ ମଙ୍ଗଳବାର ପର୍ଯ୍ୟନ୍ତ ବଢ଼ାଇ ଦେଇଛନ୍ତି। ପୂର୍ବରୁ ଫର୍ଣ୍ଣାଣ୍ଡିଜଙ୍କୁ ଅନ୍ତରୀଣ ଜାମିନ ପ୍ରଦାନ କରିଥିବା ସ୍ୱତନ୍ତ୍ର ବିଚାରପତି ଶୈଳେନ୍ଦ୍ର ମଲିକ କହିଛନ୍ତି ଯେ କୋର୍ଟଙ୍କ ଆଦେଶ ପ୍ରସ୍ତୁତ ହୋଇ ନାହିଁ। ଅଭିନେତ୍ରୀ ତଥା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପକ୍ଷରୁ ହାଜର ହୋଇଥିବା ଓକିଲଙ୍କ ଯୁକ୍ତି ଶୁଣିବା ପରେ କୋର୍ଟ ନିଜ ରାୟ ସଂରକ୍ଷଣ ରଖିଛନ୍ତି।
ଜେରା ସମୟରେ ଇଡି ଯୁକ୍ତି କରିଥିଲା ଯେ ଜ୍ୟାକଲିନ ଫର୍ଣ୍ଣାଣ୍ଡିଜ ସହଜରେ ଦେଶ ଛାଡି ପଳାଇ ପାରନ୍ତି କାରଣ ତାଙ୍କ ପାଖରେ ଟଙ୍କାର ଅଭାବ ନାହିଁ। ଏହା ଉପରେ କୋର୍ଟ ପ୍ରଶ୍ନ କରି ପଚାରିଥିଲେ – ଅଭିନେତ୍ରୀଙ୍କୁ ଏପର୍ଯ୍ୟନ୍ତ କାହିଁକି ଗିରଫ କରାଯାଇ ନାହିଁ? ଏଜେନ୍ସି କୋର୍ଟଙ୍କୁ କହିଛି ଯେ ସେମାନେ ଏହି ଅଭିନେତ୍ରୀଙ୍କ ବିରୋଧରେ ବିମାନବନ୍ଦରରେ ଲୁକ୍ଆଉଟ୍ ସର୍କୁଲାର୍ (ଏଲ୍ଓସି) ଜାରି କରିଛନ୍ତି ଯାହା ଦ୍ଵାରା ତାଙ୍କୁ ଦେଶ ଛାଡ଼ିବାରୁ ରୋକାଯାଇ ପାରିବ।
