ଆଇଏସଏଲ ୨୦୨୧-୨୨ : ଷଷ୍ଠ ବିଜୟ ସହ ସେମିଫାଇନାଲ ଆଶା ଉଜ୍ଜୀବିତ କଲା ଓଡ଼ିଶା ଏଫ୍ସି
ଭାସ୍କୋ : ଚଳିତ ଇଣ୍ଡିଆନ ସୁପର ଲିଗ (ଆଇଏସଏଲ) ୨୦୨୧-୨୨ ସଂସ୍କରଣର ଟୁର୍ନାମେଣ୍ଟରେ ଓଡ଼ିଶା ଏଫସିର ଷଷ୍ଠ ବିଜୟ । ତିଳକ ମୈଦାନ ଷ୍ଟାଡିୟମରେ ଖେଳାଯାଇ ଥିବା ମ୍ୟାଚ୍ରେ ଏସସି ଇଷ୍ଟ ବେଙ୍ଗଲକୁ ୨-୧ଗୋଲ୍ରେ ହରାଇଛି ଓଡ଼ିଶା । ଫଳରେ ଆଇଏସଏଲ ପଏଂଟ ଟେବୁଲର ଷଷ୍ଠ ସ୍ଥାନରେ ପହଂଚିବା ସହ ଓଡିଶାର ସେମିଫାଇନାଲ ଆଶା ଉଜ୍ଜୀବିତ ରହିଛି । ଏହି ମ୍ୟାଚ୍ରୁ ସଂପୂର୍ଣ୍ଣ ୩ ପଏଂଟ ମଧ୍ୟ ଓଡିଶା ଏଫସି ହାସଲ କରିବାରେ ସଫଳ ହୋଇଛି ।
ଓଡ଼ିଶା ଏଫସି ପକ୍ଷରୁ ଜୋନାଥାସ ମ୍ୟାଚ୍ର ୨୩ତମ ମିନିଟ୍ରେ ଗୋଲ୍ କରିବା ସହ ଆରମ୍ଭରୁ ଆଗୁଆ କରିଥିଲେ । ଏହାପରେ ଇଷ୍ଟ ବେଙ୍ଗଲ ପକ୍ଷରୁ ଆଂଟୋନିଓ ପେରୋସେଭିକ ୬୪ତମ ମିନିଟ୍ରେ ଗୋଲ୍ କରିବା ସହ ସ୍କୋର ବରାବର କରିଥିଲେ । ତେବେ ଓଡିଶା ପକ୍ଷରୁ ଜାଭିଅର ହର୍ନାଣ୍ଡେଜ୍ ମ୍ୟାଚ୍ର ୭୫ତମ ମିନିଟ୍ରେ ଏକ ଦମଦାର ଗୋଲ୍ କରିବା ସହ ବିଜୟ ସୁନିଶ୍ଚିତ କରିଥିଲେ । ପରବର୍ତୀ ମ୍ୟାଚ୍ରେ ଓଡିଶା ଏଫସି ଶକ୍ତିଶାଳୀ ମୁମ୍ବାଇ ସିଟି ଏଫସିକୁ ରବିବାର ପିଜେଏନ ଷ୍ଟାଡିୟମରେ ଭେଟିବ । ସେହିପରି ଏସସି ଇଷ୍ଟ ବେଙ୍ଗଲ ତିଳକ ମୈଦାନ ଷ୍ଟାଡିୟମରେ ସୋମବାର ଫର୍ମରେ ଥିବା କେରଳ ବ୍ଳାଷ୍ଟର୍ସ ସହ ମୁହାଁମୁହିଁ ହେବ ।
