ଆଇଏସଏଲ ୨୦୨୧-୨୨ : ଅଟକିଲା ବିଜୟ ରଥ, ଓଡିଶା ୧-୨ ଗୋଲ୍ରେ ଚେନ୍ନାଇୟିନ ଠାରୁ ପରାସ୍ତ
ହାଇଦ୍ରାବାଦ : ଇଣ୍ଡିଆନ ସୁପର ଲିଗ୍ (ଆଇଏସଏଲ)ରେ ଓଡିଶା ଏଫସିର ବିଜୟ ରଥ ରୋକିଲା ଚେନ୍ନାଇୟିନ ଏଫସି । ଶନିବାର ତିଳକ ମଇଦାନ ଷ୍ଟାଡିୟମରେ ଗୋଆରେ ଖେଳାଯାଇଥିବା ମ୍ୟାଚ୍ରେ ଓଡିଶା ୧-୨ ଗୋଲ୍ରେ ଚେନ୍ନାଇୟିନ ଠାରୁ ପରାସ୍ତ ହୋଇଛି । ଏହି ବିଜୟ ସହ ଚେନ୍ନାଇୟିନ ଏଫସି ପଏଣ୍ଟ ଟେବୁଲର ତୃତୀୟ ସ୍ଥାନରେ ପହଞ୍ଚିଥିବାବେଳେ, ଓଡିଶା ପଞ୍ଚମ ସ୍ଥାନକୁ ଖସିଆସିଛି ।
ମ୍ୟାଚ୍ର ୨୩ତମ ମିନିଟ୍ରେ ଜର୍ମାନ ଚେନ୍ନାଇୟିନ ପକ୍ଷରୁ ପ୍ରଥମ ଗୋଲ୍ କରି ଟିମକୁ ଅଗ୍ରଣୀ କରାଇଥିଲେ । ଫଳରେ ଓଡିଶା ଚାପରେ ରହିଥିଲା । ସ୍କୋର ବରାବର ପାଇଁ ଏକାଧିକ ସୁଯୋଗ ସୃଷ୍ଟି କରିଥିଲେ ମଧ୍ୟ ସଫଳ ହୋଇନଥିଲା । ଏହାପରେ ୬୩ତମ ମିନିଟ୍ରେ ମୁରଜାଏବ ଆଉ ଏକ ଗୋଲ୍ କରି ଚେନ୍ନାଇୟିନ ଏଫସିର ଗୋଲ୍ ସ୍କୋରକୁ ୨ରେ ପହଞ୍ଚାଇଥିଲେ । ଓଡିଶା ସମସ୍ତ ପ୍ରୟାସ କରିମଧ୍ୟ ନିରାଶ ହୋଇଥିଲା । ମ୍ୟାଚ୍ର ଶେଷ ଭାଗରେ ଓଡିଶା ପକ୍ଷରୁ ଜାଭି ଏକମାତ୍ର ଗୋଲ୍ କରିଥିଲେ ମଧ୍ୟ ଏହା ପରାଜୟ ଏଡାଇବାରେ ଯଥେଷ୍ଟ ହୋଇନଥିଲା ।
