ଆଇପିଏଲ-୨୦୨୩ : ଚେନ୍ନାଇକୁ ୬ ୱିକେଟରେ ପରାସ୍ତ କଲା କୋଲକାତା, ରୋଚକ ହେଲା ପ୍ଲେ ଅଫ୍ ଦୌଡ଼
ଚେନ୍ନାଇ: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍)-୨୦୨୩ର ୬୧ତମ ମ୍ୟାଚରେ ରବିବାର ଚେନ୍ନାଇ ସୁପର କିଙ୍ଗ୍ସକୁ ୬ ୱିକେଟରେ ପରାସ୍ତ କରିଛି କୋଲକାତା ନାଇଟ୍ ରାଇଡର୍ସ । ଦ୍ବିତୀୟ ପାଳିରେ କୋଲକାତା ୧୪୫ ରନ୍ର ଲକ୍ଷ୍ୟକୁ ପିଛା କରି ୧୮.୩ ଓଭରରେ ୪ ୱିକେଟ ହରାଇ ୧୪୭ ରନ୍ କରି ବିଜୟୀ ହୋଇଛି । କୋଲକାତା ପକ୍ଷରୁ ନୀତିଶ ରାଣା ୫୭ ରନ୍ କରିଥିବା ବେଳେ ରିଙ୍କୁ ସିଂ ୫୪ ରନ୍ କରି କୋଲକାତାକୁ ବିଜୟ ଦେଇଛନ୍ତି । ଏହି ବିଜୟ ସହ କୋଲକାତା ୧୨ ଅଙ୍କ ସଂଗ୍ରହ କରି ଟେବୁଲ ତାଲିକା ୭ମ ସ୍ଥାନରେ ରହିଛି । ଅନ୍ୟପଟେ ୧୫ ଅଙ୍କ ସହ ଚେନ୍ନାଇ ୨ୟ ସ୍ଥାନରେ ରହିଛି ।
ବୋଲରଙ୍କ ଶାଣିତ ବୋଲିଂ ପରେ ଅଧିନାୟକ ନୀତୀଶ ରାଣା ଏବଂ ରିଙ୍କୁ ସିଂଙ୍କ ଅର୍ଦ୍ଧଶତକୀୟ ଇନିଂସ ବଳରେ ଏମଏ ଚିଦାମ୍ବରମ ଷ୍ଟାଡିୟମରେ ଖେଳା ଯାଇଥିବା ଆଇପିଏଲ୍ର ୬୧ତମ ମୁକାବିଲାରେ କୋଲକାତା ନାଇଟ୍ ରାଇଡର୍ସ ୬ ଓ୍ଵିକେଟ୍ରେ ଚେନ୍ନାଇ ସୁପର କିଙ୍ଗ୍ସକୁ ତାରି ଘରୋଇ ମାଟିରେ ହରାଇଛି। ପ୍ରଥମେ ବ୍ୟାଟିଂ କରିଥିବା ଚେନ୍ନାଇ ବ୍ୟାଟଙ୍କ ବିଫଳତା ଯୋଗୁଁ ନିର୍ଦ୍ଧାରିତ ଓଭରରେ ୬ ଓ୍ଵିକେଟ୍ ହରାଇ ୧୪୪ ରନ କରିଥିଲା। ଶିବମ ଦୁବେ ୪୮ ରନର ଅପରାଜିତ ଉପଯୋଗୀ ଇନିଂସ ଖେଳିଥିବା ବେଳେ ଡେଭନ କନଓ୍ଵେ ୩୦ ରନ କରିଥିଲେ। ଜବାବରେ କୋଲକାତା ଅଧିନାୟକ ନୀତୀଶ ରାଣାଙ୍କ ଅପରାଜିତ ୫୭ ରନ ଏବଂ ରିଙ୍କୁ ସିଂଙ୍କ ୫୪ ରନ ବଳରେ ୧୮.୩ ଓଭରରେ ବିଜୟ ଲକ୍ଷ୍ୟ ହାସଲ କରି ନେଇଛି। ବିଜୟ ସହ କୋଲକାତା ଚଳିତ ସଂସ୍କରଣରେ ନିଜର ପ୍ଲେ ଅଫ ଆଶା ଉଜ୍ଜୀବିତ ରଖିପାରିଛି। ଅନ୍ୟପଟେ ଚେନ୍ନାଇର ପରାଜୟ ପରେ ପ୍ଲେ ଅଫ ଦୌଡ଼ ଆହୁରି ରୋଚକ ହୋଇଛି। ୬୧ ମ୍ୟାଚ୍ ଖେଳ ସରିଥିଲେ ମଧ୍ୟ ଏ ପର୍ଯ୍ୟନ୍ତ ଗୋଟିଏ ହେଲେ ଦଳ ପ୍ଲେ ଅଫରେ ନିଜର ସ୍ଥାନ ସୁନିଶ୍ଚିତ କରି ପାରି ନାହାନ୍ତି।
ଚେନ୍ନାଇ ଟସ୍ ଜିଣି ବ୍ୟାଟିଂ ନିଷ୍ପତ୍ତି ନେଇଥିଲା। ଚେନ୍ନାଇ ପାଇଁ ଋତୁରାଜ ଗାଏକ୍ବାଡ ଓ ଡେଭନ କନୱେ ପାଳି ଆରମ୍ଭ କରିଥିଲେ। ଉଭୟ ବ୍ୟାଟର ଭଲ ଆରମ୍ଭ କରିଥିଲେ। କିନ୍ତୁ ଦଳର ସ୍କୋର ୩୧ ରନ ଥିବା ବେଳେ ଋତୁରାଜ ଆଉଟ ହୋଇଥିଲେ। ତାଙ୍କ ସ୍ଥାନ ପୂରଣ କରିଥିଲେ ଆଜିଙ୍କ୍ୟ ରାହାଣେ। ସେ ମଧ୍ୟ ଅଧିକ ସମୟ ପର୍ଯ୍ୟନ୍ତ କ୍ରିଜରେ ରହିପାରି ନଥିଲେ। ୬୧ ରନରେ ୨ୟ (ଆଜିଙ୍କ୍ୟ ରାହାଣେ), ୬୬ ରନରେ ୩ୟ (କନୱେ), ୬୮ ରନରେ ୪ର୍ଥ (ଅମ୍ବାତି ରାୟଡୁ) ଓ ୭୨ ରନରେ ୫ମ (ମୋଇନ ଅଲି) ୱିକେଟର ପତନ ହେଲା ପରେ ଚେନ୍ନାଇର ବ୍ୟାଟିଂ ମନ୍ଥର ହୋଇଯାଇଥିଲା। ଚେନ୍ନାଇ ପାଇଁ ଶିଭମ ଦୁବେ ୩୪ ବଲ ଖେଳି ଅପରାଜିତ ରହି ଗୋଟିଏ ଚୌକା ଓ ଛକା ବଳରେ ସର୍ବାଧିକ ୪୮ ରନ୍ କରିଥିଲେ। ରବୀନ୍ଦ୍ର ଜାଦେଜା ୨୪ ବଲ୍ ଖେଳି ୨୦ ରନ କରିଥିଲେ। ଅଧିନାୟକ ମହେନ୍ଦ୍ର ସିଂହ ଧୋନି ୩ ବଲ୍ ଖେଳି ଅପରାଜିତ ୨ ରନ କରିଥିଲେ। କୋଲକାତା ପାଇଁ ବରୁଣ ଚକ୍ରବର୍ତ୍ତୀ ଓ ସୁନୀଲ ନାରାୟଣ ୨ଟି ଲେଖାଏଁ ୱିକେଟ ନେଇଥିଲା ବେଳେ ବୈଭବ ଅରୋରା ଓ ସୂର୍ଯ୍ୟାଂଶ ଶର୍ମାଙ୍କୁ ଗୋଟିଏ ଲେଖାଏଁ ୱିକେଟ୍ ମିଳିଥିଲା।
