ଆଇପିଏଲ-୨୦୨୨ : ୧୧ତମ ଲିଗ୍ ମ୍ୟାଚ୍ରେ ଚେନ୍ନାଇ-ପଞ୍ଜାବ ମୁକାବିଲା
ମୁମ୍ବାଇ : ଆଇପିଏଲ-୨୦୨୨ର ୧୧ତମ ଲିଗ୍ ମ୍ୟାଚ୍ରେ ରବିବାର ଚେନ୍ନାଇ ସୁପରକିଙ୍ଗ୍ସ ଓ ପଞ୍ଜାବ କିଙ୍ଗ୍ସ ମୁକାବିଲା ଦେଖିବାକୁ ମିଳିବ । ଏହି ମ୍ୟାଚ୍କୁ ନେଇ ଦର୍ଶକ ମହଲରେ ଉତ୍ସାହ ଦ୍ୱିଗୁଣା ହୋଇ ଯାଇଛି । ରବିବାର ସବୁ ଶକ୍ତି ଖଟାଇ ବିଜୟ ଖାତା ଖୋଲିବାକୁ ସୁପରକିଙ୍ଗ୍ସ ଲକ୍ଷ୍ୟ ରଖିଛି । ଫଳରେ ମ୍ୟାଚ୍ଟି ତୀବ୍ର ସଂଘର୍ଷପୂର୍ଣ୍ଣ ହେବା ଆଶା କରାଯାଉଛି ।
ଡିଫେଣ୍ଡିଂ ଚାମ୍ପିଅନ୍ ସୁପରକିଙ୍ଗ୍ସ ପ୍ରଥମ ୨ଟି ମ୍ୟାଚ୍ ପରାଜିତ ହୋଇ ସାରିଛି । ପ୍ରଥମ ମ୍ୟାଚ୍ରେ କୋଲକାତା ନାଇଟ ରାଇଡର୍ସ ଓ ଦ୍ୱିତୀୟ ମ୍ୟାଚ୍ରେ ଲକ୍ଷ୍ନୌ ସୁପରଜାଏଣ୍ଟ୍ସ ଠାରୁ ପରାଜିତ ହୋଇଥିଲା । ଆହତ ସମସ୍ୟା ଦଳ ପାଇଁ ଚିନ୍ତାର କାରଣ ହୋଇଛି । ଆହତ ପେସ୍ ବୋଲର ଦୀପକ ଚହର ଚଳିତ ମାସ ଶେଷ ସୁଦ୍ଧା ଫେରିବାର ସମ୍ଭାବନା ନାହିଁ । ସେ ବେଙ୍ଗାଲୁରୁ ସ୍ଥିତ ଜାତୀୟ କ୍ରିକେଟ୍ ଏକାଡେମୀରେ ଚିକିତ୍ସିତ ହେଉଛନ୍ତି । ନାଇଟ ରାଇଡର୍ସ ବିପକ୍ଷ ମ୍ୟାଚ୍ରେ ଆହତ ହୋଇଥିବା ପେସ ବୋଲର ଆଡାମ ମିଲନେ ଫିଟ୍ ହୋଇ ନାହାନ୍ତି । ସେହିପରି ପେସ୍ ବୋଲର କ୍ରିସ୍ ଜୋର୍ଡାନ ଅସୁସ୍ଥ ହୋଇ ଗତ ୬ଦିନ ହେଲା ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ୩ଜଣ ପେସ୍ ବୋଲରଙ୍କ ଅନୁପସ୍ଥିତିରେ ସୁପରକିଙ୍ଗ୍ସକୁ ଶ୍ରେଷ୍ଠ ଏକାଦଶ ଚୟନ କରିବା କଷ୍ଟକର ହୋଇଯାଇଛି ।
ଅନ୍ୟ ପଟରେ ପଞ୍ଜାବ କିଙ୍ଗ୍ସ ଚିତ୍ତାକର୍ଷକ ବିଜୟ ସହ ସିଜନ ଆରମ୍ଭ କରିଥିଲେ ହେଁ ଦ୍ୱିତୀୟ ମ୍ୟାଚ୍ରେ କୋଲକାତା ନାଇଟ ରାଇଡର୍ସ ଠାରୁ ପରାଜିତ ହୋଇଥିଲା । ବିଜୟକୁ ଫେରିବା ପାଇଁ ଦଳ ବ୍ୟାକୁଳ । ତେବେ ଏହା ପୂର୍ବରୁ ଛୋଟ ମୋଟ୍ ତ୍ରୁଟି ସୁଧାରିବା ଜରୁରୀ । ବିଶେଷ କରି ବ୍ୟାଟିଂ ବିଭାଗକୁ ଦାୟିତ୍ୱ ମୁଣ୍ଡାଇବାକୁ ପଡ଼ିବ । ଉଭୟ ଦଳ ଏକାଦଶରେ ପରିବର୍ତ୍ତନ କରିବା ସମ୍ଭାବନା ନାହିଁ ।
