ଭାରତୀୟ ଭୋଟର ସର୍ବଦା ଚକିତ, ଦିନେ ବିଜେପିକୁ ମଧ୍ୟ ଝଟକା ଦେବେ : ଶଶି ଥରୁର
ଜୟପୁର : ଭାରତୀୟ ଭୋଟର ସର୍ବଦା ଚକିତ କରିଥାନ୍ତି । ଦିନେ ବିଜେପିକୁ ମଧ୍ୟ ସେମାନେ ଝଟକା ଦେବେ ବୋଲି ବରିଷ୍ଠ କଂଗ୍ରେସ ନେତା ତଥା ସାଂସଦ ଶଶି ଥରୁର କହିଛନ୍ତି।
ନିକଟରେ ଉତ୍ତରପ୍ରଦେଶ, ଉତ୍ତରାଖଣ୍ଡ, ଗୋଆ, ପଞ୍ଜାବ ଏବଂ ମଣିପୁରରେ ହୋଇଥିବା ବିଧାନସଭା ନିର୍ବାଚନରେ କଂଗ୍ରେସର ପରାଜୟ ପରିପ୍ରେକ୍ଷୀରେ ଥରୁରଙ୍କ ଏହି ମନ୍ତବ୍ୟ ଆସିଛି। ଥିରୁବନନ୍ତପୁରମର ସାଂସଦ ଥରୁର କହିଛନ୍ତି ଯେ, ଉଭୟ ରାଜ୍ୟରେ ଭୋଟରଙ୍କ ସଂଖ୍ୟା ଅପେକ୍ଷାକୃତ କମ୍ ଏବଂ ସାମ୍ପ୍ରତିକ ସ୍ଥିତି (କଂଗ୍ରେସର ପରାଜୟ) ପାଇଁ ଏହା ଏକ ମୁଖ୍ୟ କାରଣ । ରାଜନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଉତ୍ତର ପ୍ରଦେଶରେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ନେତୃତ୍ୱରେ ଜୋରଦାର ପ୍ରଚାର ସତ୍ତ୍ୱେ ୪୦୩ ବିଧାନସଭା ଆସନ ମଧ୍ୟରୁ ଦଳ ମାତ୍ର ଦୁଇଟି ଜିତିବାରେ ସଫଳ ହୋଇଥିଲା। କଂଗ୍ରେସର ଭୋଟ୍ ଭାଗ ମାତ୍ର ୨.୩୩ ପ୍ରତିଶତ ରହିଥିଲା। ଏହାଛଡ଼ା କଂଗ୍ରେସ ଦଳର ଅଧିକାଂଶ ପ୍ରାର୍ଥୀ ନିଜ ଅମାନତ ମଧ୍ୟ ହରାଇଥିଲେ ।
ଥରୁର କହିଛନ୍ତି ଯେ ପ୍ରିୟଙ୍କା ଗାନ୍ଧୀ ଭଦ୍ରା ଦଳ ପାଇଁ ଉଲ୍ଲେଖନୀୟ ତଥା ଉତ୍ସାହୀ ପ୍ରଚାର କରିଥିଲେ ଏବଂ ମୋ ଦୃଷ୍ଟିକୋଣରୁ କୌଣସି ବ୍ୟକ୍ତିଙ୍କ ପ୍ରଚାର ଆଧାରରେ କଂଗ୍ରେସକୁ ଦାୟୀ କରାଯାଇପାରିବ ନାହିଁ ବୋଲି ମୁଁ ଭାବୁଛି। ରାଜନୈତିକ ବିଶ୍ଳେଷକମାନେ ବିଧାନସଭା ନିର୍ବାଚନ ଫଳାଫଳକୁ “ପୂର୍ବନିର୍ଦ୍ଧାରିତ” ଭାବରେ ବର୍ଣ୍ଣନା କରିବା ନେଇ ଏହି ୬୬ ବର୍ଷୀୟ ନେତା ଆଶ୍ଚର୍ଯ୍ୟ ପ୍ରକଟ କରିଛନ୍ତି। ସେ କହିଛନ୍ତି ଯେ ଏକଜିଟ୍ ପୋଲ୍ ଆସିବା ପର୍ଯ୍ୟନ୍ତ ଖୁବ୍ କମ୍ ଲୋକ ବିଜେପିର ବିଜୟର ପୂର୍ବାନୁମାନ କରିଥିଲେ। ସେ କହିଛନ୍ତି ଯେ ଭାରତୀୟ ଭୋଟରଙ୍କ ଝଟକା ଦେବାର କ୍ଷମତା ଅଛି ଏବଂ ଦିନେ ସେମାନେ ବିଜେପିକୁ ମଧ୍ୟ ଚକିତ କରିବେ। ସେ କହିଛନ୍ତି, ଏବେ ସେମାନେ ବିଜେପିକୁ ଯାହା ଚାହୁଁଛନ୍ତି ତାହା ଦେଇଛନ୍ତି।
