ଭାରତ ଉପରେ ପଡିଲା ଋଷ-ୟୁକ୍ରେନ ଯୁଦ୍ଧର ପ୍ରଭାବ! ଭୁଷୁଡିଲା ସେୟାର ବଜାର
ନୂଆଦିଲ୍ଲୀ : ଦୀର୍ଘଦିନର ତିକ୍ତତା ପରେ ଋଷ-ୟୁକ୍ରେନ ମଧ୍ୟରେ ଯୁଦ୍ଧ ଆରମ୍ଭ ହୋଇଯାଇଛି। ଯାହାର ପ୍ରଭାବରେ ଭାରତବାସୀଙ୍କୁ ମହଙ୍ଗାର ଏକ ବଡ଼ ଝଟକା ଲାଗିବାକୁ ଯାଉଛନ୍ତି। ୟୁକ୍ରେନ ଉପରେ ଋଷର ଆକ୍ରମଣ ଏବଂ ଯୁଦ୍ଧର ଆଶଙ୍କା ଯୋଗୁଁ ଅଶୋଧିତ ତୈଳର ମୂଲ୍ୟ ବ୍ୟାରେଲ ପ୍ରତି ୧୦୦ ଡଲାର ରେକର୍ଡ ସ୍ତରରେ ପହଞ୍ଚିଛି। ସକାଳୁ ସକାଳୁ ସେୟାର ବଜାର ମଧ୍ୟ ଭୁଷୁଡି ପଡିଛ।
ସେପ୍ଟେମ୍ବର ୨୦୧୪ ପରଠାରୁ ପ୍ରଥମ ଥର ପାଇଁ ଅଶୋଧିତ ତୈଳ ବ୍ୟାରେଲ ପିଛା ୧୦୦ ଡଲାର ଛୁଇଁଛି। ଯଦି ଋଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ସଂପୂର୍ଣ୍ଣ ରୂପେ ଆରମ୍ଭ ହୁଏ ତେବେ ଅଶୋଧିତ ତୈଳ ଅହୁରି ଅଧିକ ମହଙ୍ଗା ହୋଇପାରେ। ଗୋଲ୍ଡମ୍ୟାନ୍ ସାକ୍ସ କହିଛନ୍ତି ଯେ, ୨୦୨୨ ମସିହାରେ ଅଶୋଧିତ ତୈଳର ବ୍ୟାରେଲ ପିଛା ୧୦୦ ଡଲାର ଛୁଇଁବାର ପୂର୍ବାନୁମାନ ଠିକ୍ ପ୍ରମାଣିତ ହୋଇଛି। ଏଥି ସହିତ, ଜେପି ମୋର୍ଗାନ ୨୦୨୨ରେ ବ୍ୟାରେଲ ପିଛା ୧୨୫ ଡଲାର ଏବଂ ୨୦୨୩ରେ ବ୍ୟାରେଲ ପିଛା ୧୫୦ ଡଲାର ପର୍ଯ୍ୟନ୍ତ ଛୁଇଁବ ବୋଲି ପୂର୍ବାନୁମାନ କରିଛି।
୪ ନଭେମ୍ବର ୨୦୨୧ ଠାରୁ ପେଟ୍ରୋଲ ଏବଂ ଡିଜେଲ ମୂଲ୍ୟରେ କୌଣସି ପରିବର୍ତ୍ତନ ହୋଇନାହିଁ। ଅଶୋଧିତ ତୈଳ ମୂଲ୍ୟରେ ଏକ ବଡ଼ ଧରଣର ଲମ୍ଫ ଦିଆଯାଇଛି। ଦେଶର ପାଞ୍ଚଟି ରାଜ୍ୟରେ ବିଧାନସଭା ନିର୍ବାଚନ ଚାଲିଛି, ମାର୍ଚ୍ଚ ୧୦ରେ ଫଳାଫଳ ବାହାରିବ। ନିର୍ବାଚନ କାରଣରୁ ଅଶୋଧିତ ତୈଳ ମୂଲ୍ୟରେ ଅହେତୁକ ବୃଦ୍ଧି ସତ୍ତ୍ୱେ ସରକାରୀ ତୈଳ କମ୍ପାନୀଗୁଡ଼ିକ ପେଟ୍ରୋଲ ଏବଂ ଡିଜେଲ ମୂଲ୍ୟରେ କୌଣସି ପରିବର୍ତ୍ତନ କରୁନାହାଁନ୍ତି ବୋଲି ବିଶ୍ୱାସ କରାଯାଏ। ନିର୍ବାଚନ ପରେ ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡିକ କ୍ଷତି ପୂରଣ ପାଇଁ ନିଶ୍ଚିତ ଭାବରେ ପରବର୍ତ୍ତୀ ସମୟରେ ମୂଲ୍ୟ ବୃଦ୍ଧି କରିବେ।
ଅନ୍ୟପଟେ ଘରୋଇ ଷ୍ଟକ ବଜାରରେ ଗୁରୁବାର ଉତ୍ତେଜନା ଦେଖାଦେଇଛି। ୟୁକ୍ରେନ-ଋଷ ମଧ୍ୟରେ ଯୁଦ୍ଧ ଆରମ୍ଭ ହେବାର ଖବର ଯୋଗୁଁ ବଜାରରେ ମାନ୍ଦାବସ୍ଥା ଦେଖିବାକୁ ମିଳୁଛି। ପ୍ରି-ଓପନିଂରେ ବଜାର ତିନି ପ୍ରତିଶତ ଖସିଛି। ଆଇସିଆଇସିଆଇ ବ୍ୟାଙ୍କର ସେୟାର ଖୋଲିବା ମାତ୍ରେ ଚାରି ପ୍ରତିଶତ ହ୍ରାସ ପାଇଛି। ସମସ୍ତ ବିଭାଗୀୟ ସୂଚକାଙ୍କ ହ୍ରାସର ଲାଲ ଚିହ୍ନରେ ବୁଡି ରହିଛି। ୧୮୧୩ ପଏଣ୍ଟ ହ୍ରାସ ପାଇ ସେନସେକ୍ସ ୫୫୪୧୮ରେ ଖୋଲିଛି। ୫୧୪ ପଏଣ୍ଟ୍ର ଦୃଢ଼ ପତନ ସହିତ ନିଫ୍ଟି ୧୬୫୪୮ରେ ଖୋଲିଛି।
