ପାଣ୍ଡ୍ୟାଙ୍କ ନେତୃତ୍ୱରେ ପ୍ରଥମ ମ୍ୟାଚ ଜିତିଲା ଭାରତ ! ଆୟର୍ଲାଣ୍ଡକୁ ୭ ଓ୍ୱିକେଟରେ ହରାଇ ସିରିଜ ୧-୦ରେ ଆଗୁଆ
ନୁଆଦିଲ୍ଲୀ : ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କ ନେକୃତ୍ୱରେ ଭାରତର ପ୍ରଥମ ବିଜୟ। ଡବଲିନରେ ଖେଳାଯାଇଥିବା ଭାରତ ଆୟରଲାଣ୍ଡ ବିପକ୍ଷ ଟି-୨୦ ସିରିଜର ପ୍ରଥମ ମ୍ୟାଚ୍ରେ ୭ ୱିକେଟରେ ବିଜୟ ହାସଲ କରିଛି। ବର୍ଷା କାରଣରୁ ମ୍ୟାଚ୍ ପ୍ରାୟ ଅଢେଇ ଘଣ୍ଟା ବିଳମ୍ବରେ ଆରମ୍ଭ ହୋଇଥିଲା। ଏହି କାରଣରୁ ଅମ୍ପାୟାର ମ୍ୟାଚ୍କୁ ୨୦ରୁ ୧୨ ଓଭରକୁ ହ୍ରାସ କରିଥିଲେ। ଆୟରଲାଣ୍ଡ ପ୍ରଥମେ ବ୍ୟାଟିଂ କରି ୧୨ ଓଭରରେ ୪ ୱିକେଟ୍ ହରାଇ ୧୦୮ ରନ୍ ସଂଗ୍ରହ କରିଥିଲା। ଜବାବରେ ୧୦୯ ରନ୍ର ପିଛା କରି ଭାରତ ୯.୨ ଓଭରେ ୧୧୧ ରନ୍ ସଂଗ୍ରହ କରି ନେଇଥିଲା। ଏବେ ଦୁଇ ମ୍ୟାଚ୍ ବିଶିଷ୍ଟ ଟି୨୦ ସିରିଜରେ ଭାରତ ୧-୦ରେ ଆଗୁଆ ରହିଛି ।
ଆୟର୍ଲାଣ୍ଡ ପ୍ରଥମେ ବ୍ୟାଟିଂ କରି ୧୦୮ ରନ୍ ସ୍କୋର କରିଥିଲା । ଭାରତୀୟ ବୋଲରମାନେ ପାୱାରପ୍ଲେର ନିର୍ଦ୍ଧାରିତ ୪ ଓଭର ମଧ୍ୟରେ ଆୟର୍ଲାଣ୍ଡର ତିନୋଟି ୱିକେଟ୍ ହାସଲ କରି ନେଇଥିଲେ। ହ୍ୟାରି ଟେକ୍ଟର ଆୟର୍ଲାଣ୍ଡ ପାଇଁ ୩୩ ବଲରୁ ୬୪ ରନ୍ କରିନଥିଲେ। ସେ ତାଙ୍କ ଇନିଂସରେ ୬ ଟି ଚୌକା ଓ ୩ ଛକା ମାରିଥିଲେ। ଭୁବନେଶ୍ୱର କୁମାର ପ୍ରଥମ ଓଭରରେ ଆୟର୍ଲାଣ୍ଡର ଅଧିନାୟକ ଆଣ୍ଡ୍ରିୟୁ ବାଲବର୍ନିଙ୍କୁ ପାଭିଲିୟନକୁ ପଠାଇଥିଲେ। ପରେ ଦୁର୍ଦ୍ଦଶ ବ୍ୟାଟ୍ସମ୍ୟାନ୍ ପଲ୍ ଷ୍ଟିରଲିଂ ୪ ରନ୍ ସ୍କୋରରେ ହାର୍ଦ୍ଦିକ ପାଣ୍ଡ୍ୟାଙ୍କ ଶିକାର ହୋଇଥିଲେ। ୯ ଟି ବଲରେ ୮ ରନ୍ ପାଇଁ ଡେଲାନିଙ୍କୁ ଆଭଶେ ଖାନ୍ ଆଉଟ୍ କରିଥିଲେ। ଏହା ପରେ ଟେକ୍ଟର ଏବଂ ଟକର୍ ମଧ୍ୟରେ ଅର୍ଦ୍ଧ ଶତାବ୍ଦୀର ସହଭାଗିତା ହୋଇଥିଲା। ୧୬ ଟି ବଲରୁ ୧୮ ଟି ସ୍କୋର କରିବା ପରେ ଟକର୍ ପାଭିଲିୟନକୁ ଫେରିଥିଲେ। ଡକ୍ରେଲ୍ ୭ବଲ୍ରୁ ୪ରନ୍ କରି ଅପରାଜିତ ରହିଥିଲେ। ଭାରତ ପାଇଁ ଭୁବନେଶ୍ୱର, ହାର୍ଦ୍ଦିକ, ଚହଲ ଏବଂ ଆଭେଶଙ୍କୁ ଗୋଟିଏ ଲେଖାଏଁ ୱିକେଟ୍ ମିଳିଛି।
ଭାରତ ପାଇଁ ଓପନର୍ ଇଶାନ୍ କିଶାନ୍ ଜବରଦସ୍ତ ଆରମ୍ଭ କରିଥିଲେ। ସେ ଆଉଟ୍ ହେବା ପୂର୍ବରୁ ୧୧ ଟି ବଲରେ ୨୬ ରନ୍ ସଂଗ୍ରହ କରିଥିଲେ। ଏହା ପରେ ବ୍ୟାଟିଂ କରିବାକୁ ଆସିଥିବା ସୂର୍ଯ୍ୟକୁମାର ଯାଦବ ଖାତା ଖୋଲି ନପାରି ପାଭିଲିୟନକୁ ଫେରିଥିଲେ। ଏହି ମ୍ୟାଚରେ ରିତୁରାଜ ଗାଇକୱାଡ ଓପନିଂ ପାଇଁ ଆସି ନଥିଲେ, ଦୀପକ ହୁଡା ତାଙ୍କ ସ୍ଥାନରେ ଖୋଲିବାର ସୁଯୋଗ ପାଇଥିଲେ। ସେ ପ୍ରଥମ ଓଭରରେ ମନ୍ଥର ଗତିରେ ଖେଳିଥିଲେ। କିନ୍ତୁ ସେଟ୍ ଅପ୍ ହେବା ପରେ ସେ ବଡ ସଟ୍ ମଧ୍ୟ କରିଥିଲେ ଏବଂ ଅଧିନାୟକ ହାର୍ଦ୍ଦିକଙ୍କ ସହ ମିଶି ତୃତୀୟ ୱିକେଟ୍ ପାଇଁ ୩୨ ବଲରେ ୬୪ ରନ୍ ସଂଗ୍ରହ କରିଥିଲେ। କ୍ୟାପଟେନ ହାର୍ଦିକ ପାଣ୍ଡ୍ୟା ୧୨ ଟି ବଲରେ ୨୪ ରନ୍ ସ୍କୋର କରିବା ପରେ ପାଭିଲିୟନକୁ ଫେରିଥିଲେ। ଦୀପକ ହୁଡା ୨୯ ବଲରୁ ଅପରାଜିତ ୪୭ ରନ୍ କରିଥିଲେ। ଦୀନେଶ କାର୍ତ୍ତିକ ୪ ଟି ବଲରୁ ଅପରାଜିତ ରହିଥିଲେ। ଆୟର୍ଲାଣ୍ଡ ପାଇଁ କ୍ରେଗ ୟଙ୍ଗ ୨ଟି ଏବଂ ଲିଟିଲ ଗୋଟିଏ ୱିକେଟ୍ ଲେଖାଏଁ ୱିକେଟ୍ ପାଇଲେ। ସୂଚନା ଯେ, ଆୟରଲାଣ୍ଡ ଏବଂ ଭାରତ ମଧ୍ୟରେ ଦ୍ୱିତୀୟ ମ୍ୟାଚ୍ ମଙ୍ଗଳବାର ଖେଳାଯିବ।
