ଟୋକିଓ ଅଲିମ୍ପିକ୍ସ୍: ମହିଳା ହକି କାଂସ୍ୟ ପଦକ ପ୍ରତିଯୋଗିତାରେ ହାରିଲା ଭାରତ
- ଗ୍ରେଟ୍ ବ୍ରିଟେନ୍ ଠାରୁ ୩-୪ ଗୋଲ୍ରେ ପରାସ୍ତ ହେଲା ଭାରତ ମହିଳା ହକି
ଜାପାନ : ଟୋକିଓ ଅଲିମ୍ପିକ୍ ଷ୍ଟାଡିୟମ୍ରେ ଅନୁଷ୍ଠିତ ମହିଳା ହକିରେ ଭାରତର ବ୍ରୋଞ୍ଜ ଆଶା ଧୂଳିସାତ୍ । ଲଢୁଆ ପ୍ରଦର୍ଶନ କରିବା ପରେ ବି ହାରିଛି ଭାରତ । ‘ରିଓ ଅଲିମ୍ପିକ୍ସ୍’ ସ୍ବର୍ଣ୍ଣପଦକ ବିଜେତା ବ୍ରିଟେନ ଠାରୁ ୪-୩ରେ ହାରିଲା ଭାରତ । ଫଳରେ ବ୍ରୋଞ୍ଜ ପଦକ ହାସଲ କରିଛି ବ୍ରିଟେନ୍ । ଟୋକିଓ ଅଲିମ୍ପିକ୍ସ୍ରେ କାଂସ୍ୟ ପଦକସ୍ତର ପର୍ଯ୍ୟନ୍ତ ଖେଳି ପାରିଥିବା ଭାରତୀୟ ମହିଳା ହକି ଟିମ୍ ପାଇଁ ଗୁରୁତ୍ବପୂର୍ଣ୍ଣ ତଥା ଅବିସ୍ମରଣୀୟ ଘଟଣା ବୋଲି କୋଚ୍ ସୋରୋଡ୍ ମରିନ୍ କହିଛନ୍ତି।
ଆଜି ଖେଳ ଆରମ୍ଭରୁ ଭାରତୀୟ ଦଳ ବ୍ରିଟେନକୁ କଡ୍ଡା ଟକ୍କର ଦେଇଥିଲେ । ପ୍ରାୟ ଦୀର୍ଘ ସମୟ ଧରି ବରାବର ରହିଥିଲା ସ୍ଥିତି । ଆକ୍ରମଣାତ୍ମକ ବୈଶିଷ୍ଟ୍ୟ ବଜାୟ ରଖି ଆଜି ଗ୍ରେଟ୍ ବ୍ରିଟେନ୍ ମହିଳା ହକି ଟିମ୍ ଭାରତୀୟ ମହିଳା ହକି ଟିମ୍ ବିପକ୍ଷରେ ଖେଳ ଆରମ୍ଭ କରିଥିଲା। ପ୍ରଥମ ୧୫ ମିନିଟ୍ରେ ଗ୍ରେଟ୍ ବ୍ରିଟେନ୍ ୨ଟି ପେନାଲ୍ଟି କର୍ଣ୍ଣର୍ ପାଇଥିଲା, କିନ୍ତୁ ସେଥିରୁ ଭାରତର ସବିତା ଗୋଟିକୁ ପ୍ରତିରୋଧ କରିଥିବା ବେଳେ ଦ୍ବିତୀୟଟିକୁ ସେମାନେ ଠିକ୍ ଭାବେ ଗୋଲ୍ ପୋଷ୍ଟ୍କୁ ମାରି ପାରି ନ ଥିଲେ। ଖେଳର ଦ୍ବିତୀୟ ପର୍ଯ୍ୟାୟରେ ଭାରତ ଗ୍ରେଟ୍ ବ୍ରିଟେନ୍ ଠାରୁ ୦-୨ରେ ପଛୁଆ ଥିଲା। କିନ୍ତୁ, ଖେଳର ମଧ୍ୟାହ୍ନ-ବିରତି ହେବା ପାଇଁ ମାତ୍ର ୬ ମିନିଟ୍ ଥିବା ବେଳେ ଭାରତୀୟ ମହିଳା ଟିମ୍ ୩ଟି ଗୋଲ୍ ଦେଇ ୩-୨ରେ ଅଗ୍ରଣୀ ରହିଥିଲା। ମାତ୍ର ଖେଳର ଚତୁର୍ଥ ପର୍ଯ୍ୟାୟରେ ଗ୍ରେଟ୍ ବ୍ରିଟେନ୍ ଆଉ ଗୋଟିଏ ଗୋଲ୍ ଦେବାରୁ ଉଭୟ ଦେଶର ସ୍କୋର୍ ସମାନ ହୋଇଯାଇଥିଲା। ଏହାପରେ ଖେଳ ସରିବାକୁ ଆଉ ୧୨ ମିନିଟ୍ ଥିବା ବେଳେ ଗ୍ରେଟ୍ ବ୍ରିଟେନ୍ର ଗ୍ରେସ୍ ବାଲ୍ସ୍ଡନ୍ ଗୋଟାଏ ଗୋଲ୍ କରିବାରୁ ଭାରତ ୩-୪ରେ ପଛୁଆ ହୋଇଗଲା। ଏହାପରେ ଶତଚେଷ୍ଟା ସତ୍ତ୍ବେ ଭାରତୀୟ ମହିଳା ଟିମ୍ ଗ୍ରେଟ୍ ବ୍ରିଟେନ୍ ସ୍କୋର୍ର ସମକକ୍ଷ ହୋଇ ପାରିଲେ ନାହିଁ। ଖେଳ ପ୍ରତିଯୋଗିତ ଶେଷକୁ ଭାରତୀୟ ଗୋଲ୍ ରକ୍ଷକ ସବିତା ପୁନିଆ ଧୈର୍ଯ୍ୟ ହରାଇ ପଡ଼ିଲେ । ସୂଚନା ଯେ, ଗ୍ରୁପ୍ ପର୍ଯ୍ୟାୟର ଶେଷ ଦୁଇଟି ମ୍ୟାଚ୍ ରେ ଭାରତ ଏକ ଭଲ ପ୍ରତ୍ୟାବର୍ତ୍ତନ କରି ପରବର୍ତ୍ତୀ ରାଉଣ୍ଡରେ ପ୍ରବେଶ କରିଥିଲା । ବ୍ରିଟେନ ବିପକ୍ଷରେ ଦୁଇଟି ଗୋଲ ପଛରେ ରହି ସତ୍ତ୍ୱେ ଭାରତ ପ୍ରତ୍ୟାବର୍ତ୍ତନ କରିବାରେ ସଫଳ ହୋଇଥିଲା । ହେଲେ ଶେଷ ମୂହୂର୍ତ୍ତରେ ବ୍ରିଟେନର ଭାଗ୍ୟ ସହାୟ ହେବା ପରି ଜିତାପଟ ମାରିଥିଲା ଦଳ । ଆଉ ପରାଜୟ ହାସଲ କରିଛି ଭାରତ ଦଳ ।
