ଇଣ୍ଡିଆ-ଇଂଲଣ୍ଡ ଶେଷ ଟେଷ୍ଟ : ରୋହିତଙ୍କ ସ୍ଥାନରେ ଖେଳିବେ ମୟଙ୍କ
ନୂଆଦିଲ୍ଲୀ: ଇଂଲଣ୍ଡ- ଭାରତ ମଧ୍ୟରେ ହେବାକୁ ଥିବା ଟେଷ୍ଟ ସିରିଜ୍ର ଶେଷ ମ୍ୟାଚ୍ରେ ରୋହିତଙ୍କ ସ୍ଥାନରେ ଖେଳିବେ ମୟଙ୍କ ଅଗ୍ରୱାଲ୍ । ଏନେଇ ବିସିସିଆଇ ସୂଚନା ଦେଇଛି । ଗତ ଶନିବାର ରୋହିତ ଶର୍ମା କୋଭିଡ୍ ପଜିଟିଭ୍ ହୋଇଥିଲେ । ଏହାପରେ ତାଙ୍କ ସ୍ଥାନରେ କିଏ ଖେଳିବ ସେ ନେଇ କୌଣସି ସୂଚନା ନଥିଲା । ହେଲେ ସୋମବାର ମୟଙ୍କଙ୍କୁ ଟେଷ୍ଟ ଟିମ୍ରେ ସାମିଲ୍ କରାଯାଇଥିବା ଆଜି ବିସିସିଆଇ ସୂଚନା ଦେଇଛନ୍ତି । ଟେଷ୍ଟ ଟିମ୍ରେ ଚୟନ ହେବା ପରେ ମୟଙ୍କ ମଧ୍ୟ ଲଣ୍ଡନ ଅଭିମୁଖେ ବାହାରି ସାରିଛନ୍ତି । ଏନେଇ ସେ ସୋସିଆଲ୍ ମିଡିଆରେ ପୋଷ୍ଟ କରି ସୂଚନା ଦେଇଛନ୍ତି ।
ଇଂଲଣ୍ଡ ବିପକ୍ଷରେ ଏହି ଟେଷ୍ଟ୍ ମ୍ୟାଚ୍ ଖୁବ୍ ଗୁରୁତ୍ୱପୂର୍ଣ୍ଣ । କାରଣ ଏହା ଗତବର୍ଷ ଖେଳାଯାଇଥିବା ସିରିଜର ଶେଷ ମୁକାବିଲା । ଭାରତ ଏଥିରେ ୨-୧ରେ ଆଗୁଆ ରହିଛି । ଯଦି ଏହି ମୁକାବିଲା ଡ୍ର ହୁଏ ତେବେ ଭାରତ ସିରିଜ୍ ଜିତିଯିବ । ତେଣୁ ରୋହିତ ଶର୍ମାଙ୍କ ଖେଳିବା ଜରୁରୀ । କାରଣ ସେ ଭଲ ଓପନର ସହ ଅଧିନାୟକ ମଧ୍ୟ । ଇଂଲଣ୍ଡ ପିଚରେ ଭଲ ଓପନିଂ ଦଳକୁ ଖୁବ୍ ଦରକାର । ରୋହିତ ନଖେଳିଲେ ନୂଆ ଯୋଡି ଓପନିଂ କରିବା ଦଳକୁ ବ୍ୟାକଫୁଟକୁ ଠେଲିପାରେ । ରୋହିତଙ୍କ ଅନଫିଟ୍ ନେଇ ଭାରତୀୟ ଦଳର କିଏ ଅଧିନାୟକ ହେବ ବୋଲି ପ୍ରଶ୍ନ ଉଠିଛି । ଏପରି ସ୍ଥିତିରେ ଜସପ୍ରିତ ବୁମରାହଙ୍କୁ ଦଳ ଅଧିନାୟକ କରିପାରେ । ଋଷଭ ପନ୍ତ ଓ ଆର ଅଶ୍ୱୀନଙ୍କ ନାଁ ବି ରେସରେ ଅଛି । ତେବେ ଗତବର୍ଷ ଇଂଲଣ୍ଡ ସିରିଜରେ ଦଳର ନେତୃତ୍ୱ ଭାର ବିରାଟଙ୍କ ହାତରେ ଥିଲା ।
