ଏସିଆ କପ୍ ଫାଇନାଲରେ ଇତିହାସ ରଚିଲା ଟିମ୍ ଇଣ୍ଡିଆ, ୨୬୩ ବଲ୍ ପୂର୍ବରୁ ମ୍ୟାଚ୍ ଜିତି କଲା ଏକ ବିଶ୍ୱ ରେକର୍ଡ
ନୂଆଦିଲ୍ଲୀ : ଏସିଆ କପ୍ ୨୦୨୩ ର ଫାଇନାଲ ମ୍ୟାଚରେ ଭାରତୀୟ ଦଳ ଉଭୟ ବଲ୍ ଓ ବ୍ୟାଟ୍ ସହିତ ଏକପାଖିଆ ପ୍ରଦର୍ଶନ ଦେଖାଇଥିଲା । ଶ୍ରୀଲଙ୍କା ଦଳର ଅଧିନାୟକ ଦାସୁନ୍ ଶାନାକା ଟସ୍ ଜିତି ଏହି ମ୍ୟାଚରେ ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ, କିନ୍ତୁ ପୂରା ଦଳ ୧୫.୨ ଓଭରରେ ମାତ୍ର ୫୦ ରନରେ ଅଲ୍ ଆଉଟ୍ ହୋଇଯାଇଥିଲା । କୌଣସି ୱିକେଟ୍ ନହରାଇ ୬.୧ ଓଭରରେ ଟିମ୍ ଇଣ୍ଡିଆ ଏହି ଲକ୍ଷ୍ୟ ହାସଲ କରିନେଇଥିଲା । ଏହା ସହ ଭାରତ ଅଷ୍ଟମ ଥର ପାଇଁ ଏସିଆ କପ୍ ଟାଇଟଲ୍ ଜିତିଛି ଓ ଦିନିକିଆ କ୍ରିକେଟ୍ ରେ କିଛି ନୂଆ ରେକର୍ଡ ସୃଷ୍ଟି କରିଛି ।
ଶ୍ରୀଲଙ୍କା ବିପକ୍ଷ ଏହି ଫାଇନାଲ୍ ମ୍ୟାଚରେ ଭାରତୀୟ ଦଳ ଏହାର ଦିନିକିଆ କ୍ରିକେଟ୍ ଇତିହାସରେ ବଲ୍ ହିସାବରେ ସବୁଠୁ ବଡ଼ ବିଜୟ ପଞ୍ଜିକରଣ କରିଛି । ୨୬୩ ବଲ ବାକିଥାଇ ଟିମ୍ ଇଣ୍ଡିଆ ଏହି ମ୍ୟାଚ୍ ଜିତିନେଇଥିଲା । ଏହା ପୂର୍ବରୁ ୨୦୦୧ ମସିହା ଭାରତୀୟ ଦଳ ଅଧିକାଂଶ ବଲ୍ ବାକିଥାଇ ଦିନିକିଆ ମ୍ୟାଚ୍ ଜିତିଥିଲା । କେନିଆ ବିପକ୍ଷ ମ୍ୟାଚରେ ଦଳ ବ୍ଲୁମଫୋଣ୍ଟେନ ଗ୍ରାଉଣ୍ଡରେ ୨୩୧ଟି ବଲ ବାକି ଥାଇ ମ୍ୟାଚ୍ ଜିତିଥିଲା ।
ଦିନିକିଆ କ୍ରିକେଟ୍ ଇତିହାସରେ ଦ୍ୱିତୀୟ ଥର ପାଇଁ ଟିମ୍ ଇଣ୍ଡିଆ ଏକ ଟୁର୍ଣ୍ଣାମେଣ୍ଟର ଫାଇନାଲ ମ୍ୟାଚ୍ ରେ ୧୦ ୱିକେଟରେ ଜିତିଛି । ଏହାପୂର୍ବରୁ ୧୯୮୮ ମସିହାରେ ଜିମ୍ବାୱେ ବିପକ୍ଷ ଫାଇନାଲ ମ୍ୟାଚରେ ୧୯୭ ରନ୍ର ଲକ୍ଷ୍ୟ କୌଣସି ୱିକେଟ୍ ନ ହରାଇ ହାସଲ କରିଥିଲା । ଏହା ପରେ ଅଷ୍ଟ୍ରେଲିଆର ଦଳ ଏହି ତାଲିକାରେ ଦ୍ୱିତୀୟ ସ୍ଥାନରେ ଅଛି, ଯିଏକି ୨୦୦୩ ମସିହାରେ ସିଡନୀ ଗ୍ରାଉଣ୍ଡରେ ଇଂଲଣ୍ଡ ବିପକ୍ଷରେ କୌଣସି ୱିକେଟ୍ ନ ହରାଇ ୧୧୮ ରନର ଲକ୍ଷ୍ୟ ହାସଲ କରି ନେଇଥିଲା । ବର୍ତ୍ତମାନ ଟିମ୍ ଇଣ୍ଡିଆ ତୃତୀୟ ସ୍ଥାନରେ ରହିଛି, ଯିଏ ଶ୍ରୀଲଙ୍କା ବିପକ୍ଷ ଏହି ମ୍ୟାଚ୍ ଜିତି ନିଜର ସ୍ଥାନ ହାସଲ କରିଛି ।
ଏକ ଦିନିକିଆ ଟୁର୍ଣ୍ଣାମେଣ୍ଟର ଫାଇନାଲ୍ ମ୍ୟାଚରେ ସର୍ବାଧିକ ସଂଖ୍ୟକ ବଲ ସହିତ ଜିତିବା କ୍ଷେତ୍ରରେ ଭାରତୀୟ ଦଳ ବର୍ତ୍ତମାନ ପ୍ରଥମ ସ୍ଥାନରେ ରହିଛି । ୨୬୩ ବଲ ବାକି ରହି ଟିମ୍ ଇଣ୍ଡିଆ ଏହି ମ୍ୟାଚ ଜିତିଥିଲା । ଏହାପୂର୍ବରୁ ଏହି ରେକର୍ଡ ଅଷ୍ଟ୍ରେଲିଆ ନାମରେ ଥିଲା, ଯେତେବେଳେ ସେ ୨୦୦୩ ରେ ସିଡନୀ ଗ୍ରାଉଣ୍ଡରେ ଇଂଲଣ୍ଡ ବିପକ୍ଷରେ ୨୨୬ଟି ବଲ ବାକି ଥାଇ ମ୍ୟାଚ୍ ଜିତିଥିଲା ।
