ଉତ୍ତରାଖଣ୍ଡରେ ପ୍ରଚାର ପାଇଁ କଂଗ୍ରେସର ଷ୍ଟାର୍ ପ୍ରଚାରକ, ବାଦ୍ ପଡ଼ିଲେ ସିଦ୍ଧୁ
ନୂଆଦିଲ୍ଲୀ : ନବଜୋତ ସିଦ୍ଧୁଙ୍କୁ କଂଗ୍ରେସ ଏକ ବଡ଼ ଝଟକା ଦେଇଛି। ଉତ୍ତରାଖଣ୍ଡରେ ପ୍ରଚାର ପାଇଁ କଂଗ୍ରେସ ତାର ଷ୍ଟାର୍ ପ୍ରଚାରକ ତାଲିକାରେ ସିଦ୍ଧୁଙ୍କୁ ସାମିଲ କରିନାହିଁ | ସୋନିଆ ଗାନ୍ଧୀ, ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ଏବଂ ଡକ୍ଟର ମନମୋହନ ସିଂଙ୍କ ସମେତ ୩୦ ଜଣଙ୍କୁ ନେଇ କଂଗ୍ରେସ ନିଜ ଷ୍ଟାର୍ ପ୍ରଚାରକ ତାଲିକା ପ୍ରକାଶ କରିଛି। ଏଥିରେ ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ୍ ସିଂ ଚନ୍ନିଙ୍କ ନାମ ରହିଥିବା ବେଳେ ସିଦ୍ଧୁଙ୍କୁ ବାଦ୍ ଦିଆଯାଇଛି। ସିଦ୍ଧୁଙ୍କ ପାଇଁ ଏହା ଏକ ବଡ ଝଟକା ବୋଲି କୁହାଯାଉଛି, କାରଣ ସେ ତାଙ୍କ ଲୋକପ୍ରିୟତା ବଳରେ ପଞ୍ଜାବରେ ମୁଖ୍ୟମନ୍ତ୍ରୀ ପଦ ଦାବି କରୁଛନ୍ତି। ଉତ୍ତରାଖଣ୍ଡରେ ତାଙ୍କର ଲୋକପ୍ରିୟତା ଦାବିକୁ କଂଗ୍ରେସ ଅଗ୍ରାଧିକାର ଦେଇନାହିଁ।
କଂଗ୍ରେସରେ ଚନ୍ନିଙ୍କ ପ୍ରଭାବ ବୃଦ୍ଧି ପାଇଛି ବୋଲି ହାଇକମାଣ୍ଡ ସ୍ପଷ୍ଟ ସଙ୍କେତ ଦେଇଛନ୍ତି। କଂଗ୍ରେସ ହାଇକମାଣ୍ଡ ଚନ୍ନିଙ୍କୁ ଏପରି ପ୍ରାଧାନ୍ୟ ଦେବା ପ୍ରଥମ ଦୃଷ୍ଟାନ୍ତ ନୁହେଁ । ଏହାପୂର୍ବରୁ ଯେବେ ଲକ୍ଷ୍ମୀପୁର ଖେରୀରେ ଚାଷୀଙ୍କୁ ଗାଡ଼ି ଚଢାଇ ହତ୍ୟା କରାଗଲା, ରାହୁଲ ଗାନ୍ଧୀ ମୃତକଙ୍କ ପରିବାରକୁ ଭେଟିବା ପାଇଁ ନିଜ ସାଙ୍ଗରେ ଚନ୍ନିଙ୍କୁ ନେଇଥିଲେ। ସିଦ୍ଧୁ ପଞ୍ଜାବ କଂଗ୍ରେସର ଅଲଗା ପ୍ରତିନିଧି ସହିତ ଲକ୍ଷ୍ମୀପୁର ଖେରୀରେ ପହଞ୍ଚିଥିଲେ |
କଂଗ୍ରେସ ହାଇକମାଣ୍ଡ ପୁଣିଥରେ ସ୍ପଷ୍ଟ ସଙ୍କେତ ଦେଇଛନ୍ତି ଯେ ଚନ୍ନି ହିଁ ପଞ୍ଜାବରେ କଂଗ୍ରେସର ମୁଖ୍ୟମନ୍ତ୍ରୀ ପ୍ରାର୍ଥୀ ହେବେ। ଅମରିନ୍ଦର ସିଂଙ୍କୁ ହଟାଇବା ପରେ କଂଗ୍ରେସ ହଠାତ୍ ଦାବିଦାର ଦୌଡ଼ରେ ନଥିବା ଚନ୍ନିଙ୍କୁ ପଞ୍ଜାବର ମୁଖ୍ୟମନ୍ତ୍ରୀ କରିଥିଲା । ଚନ୍ନି ପଞ୍ଜାବ ଇତିହାସରେ ପ୍ରଥମ ଦଳିତ ମୁଖ୍ୟମନ୍ତ୍ରୀ ହୋଇଥିଲେ।
