ପଞ୍ଜାବରେ ମୋବାଇଲ୍ ମେକାନିକଙ୍କ ଠାରୁ ପରାସ୍ତ ହେଲେ ମୁଖ୍ୟମନ୍ତ୍ରୀ ଚନ୍ନି

ଚଣ୍ଡିଗଡ଼ : ପଞ୍ଜାବ ବିଧାନସଭା ନିର୍ବାଚନର ଫଳାଫଳ ସମଗ୍ର ଦେଶକୁ ଚକିତ କରିଛି। ପଞ୍ଜାବରେ କଂଗ୍ରେସ ଏତେ ପଛରେ ରହିବ ବୋଲି କେହି କଳ୍ପନା କରି ନ ଥିଲେ। ୧୧୭ ଆସନର ଚିତ୍ର ସ୍ପଷ୍ଟ ହୋଇଛି। ଏଥର ପଞ୍ଜାବରେ ଆମ୍ ଆଦମୀ ପାର୍ଟି ଚମତ୍କାର ପ୍ରଦର୍ଶନ କରିଛି ଏବଂ ସଂଖ୍ୟା ଗରିଷ୍ଠତା ସହ ସରକାର ଗଠନ କରିବାକୁ ଯାଉଛି। ଏହି ନିର୍ବାଚନରେ ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନି ନିଜର ଆସନ ହରାଇଛନ୍ତି । ଆଶ୍ଚର୍ଯ୍ୟଜନକ କଥା ହେଉଛି ମୁଖମନ୍ତ୍ରୀ ଚନ୍ନି ଜଣେ ମୋବାଇଲ୍ ମେକାନିକଙ୍କ ଠାରୁ ପରାସ୍ତ ହୋଇଛନ୍ତି । ମୁଖ୍ୟମନ୍ତ୍ରୀ ଚନ୍ନିଙ୍କୁ ବର୍ଣ୍ଣାଲା ଜିଲ୍ଲାର ଭଦଉର ଆସନରୁ ଆମ୍ ଆଦମୀ ପାର୍ଟିର ପ୍ରାର୍ଥୀ ଲବ ସିଂ ଉଗୋକେ ହରାଇଛନ୍ତି। ପ୍ରଥମ ଥର ପାଇଁ ପ୍ରତିଦ୍ୱନ୍ଦ୍ୱିତା କରୁଥିବା ଉଗୋକେ ଚନ୍ନିଙ୍କୁ ୩୭,୫୫୮ ଖଣ୍ଡ ଭୋଟ ବ୍ୟବଧାନରେ ପରାସ୍ତ କରିଛନ୍ତି ।

ଲବ ସିଂଙ୍କ ମା ଏକ ସରକାରୀ ବିଦ୍ୟାଳୟରେ ଜଣେ ସୁଇପର ଭାବେ କାମ କରୁଥିବା ବେଳେ ପିତା ଜଣେ ଶ୍ରମିକ ଭାବରେ କାର୍ଯ୍ୟ କରନ୍ତି । ନିର୍ବାଚନ ପୂର୍ବରୁ ତାଙ୍କୁ କେହି ଜାଣି ନ ଥିଲେ । ଆଜି ସମଗ୍ର ଦେଶରେ ଆଲୋଚନା ହେଉଛି । ଲବ ସିଂ କେବଳ ୨ ରୁମ୍ ବିଶିଷ୍ଟ ଏକ ଘରେ ରୁହନ୍ତି ଏବଂ ଏଥରେ ସେ ମୁଖ୍ୟମନ୍ତ୍ରୀ ଚନ୍ନିଙ୍କ ବିରୋଧରେ ପ୍ରଥମ ନିର୍ବାଚନରେ ଲଢ଼ି ଇତିହାସ ସୃଷ୍ଟି କରିଛନ୍ତି । ସେ ଗାଁରେ ପ୍ରଚାର କରିବା ପାଇଁ ମୋଟରସାଇକେଲ କିମ୍ବା ସର୍ବସାଧାରଣ ବସ୍ ଯୋଗେ ଗାଁରୁ ଗାଁକୁ ଯାତ୍ରା କରୁଥିଲେ । ଲବ ସିଂ କେବଳ କିଛି ବର୍ଷ ତଳେ ରାଜନୀତିରେ ସକ୍ରିୟ ହୋଇ ଏତେ ବଡ ବିଜୟ ହାସଲ କରିଲେ । ବିଧାୟକ ହେବା ପୂର୍ବରୁ ସେ ଇନ-ଚାର୍ଜ ଏବଂ ପରେ ବ୍ଲକ ମୁଖ୍ୟ ହୋଇଥିଲେ। ଏହା ପରେ ତାଙ୍କୁ ସର୍କଲ୍ ମୁଖ୍ୟ କରାଯାଇଥିଲା । ତାଙ୍କ ନିର୍ବାଚନ ଆଫିଡେଭିଟ୍ (୨୦୧୪ ଆଫିଡେଭିଟ୍) ରେ ହିରୋ ହୋଣ୍ଡା ମୋଟରସାଇକେଲ୍ ଦିଆଯାଇଛି । ଲବ ସିଂଙ୍କ ଶିକ୍ଷାଗତ ଯୋଗ୍ୟତା କହିବାକୁ ଗଲେ ସେ ଦ୍ୱାଦଶ ପାସ୍ ।

ଆମ୍ ଆଦମୀ ପାର୍ଟିର ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜିରୱାଲ ଲବ ସିଂଙ୍କ ପ୍ରଶଂସା କରି କହିଛନ୍ତି, ଭଦଉରରୁ ଚରଣଜିତ ସିଂ ଚନ୍ନି ଜୀଙ୍କୁ ପରାସ୍ତ କରିଥିବା ଲବ ସିଂ ମୋବାଇଲ୍ ଫୋନ୍ ମରାମତି ଦୋକାନରେ କାମ କରନ୍ତି । ଜଣେ ସାଧାରଣ ସ୍ୱେଚ୍ଛାସେବୀ ଜୀବନ ଜ୍ୟୋତି କୌର ସିଦ୍ଧୁ ଜୀ ଏବଂ ମାଜିଥିଆଙ୍କୁ ପରାସ୍ତ କରିଛନ୍ତି … ଆମେ ୭୫ ବର୍ଷ ନଷ୍ଟ କରିଛୁ ଏବଂ ବର୍ତ୍ତମାନ ସମୟ ନଷ୍ଟ କରିବାର କୌଣସି ଆବଶ୍ୟକତା ନାହିଁ।