କୋରେଇରେ ବିଡିଓଙ୍କୁ ମାଡ଼, ୪ଟି ବୁଥରେ ମତଦାନ ବନ୍ଦ
ଯାଜପୁର : ରାଜ୍ୟରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଜାରି ରହିଛି । ଏହି ପରିପ୍ରେକ୍ଷୀରେ ବିଭିନ୍ନ ସ୍ଥାନରେ ରାଜନୈତିକ ହିଂସା ଦେଖା ଦେଇଛି । ବିଶେଷ କରି ଯାଜପୁର ଜିଲାରେ ଦେଖିବାକୁ ମିଳିଛି । ପଞ୍ଚାୟତ ନିର୍ବାଚନର ପ୍ରଥମ ଓ ଦ୍ବିତୀୟ ପର୍ଯ୍ୟାୟ ଭଳି ତୃତୀୟ ପର୍ଯ୍ୟାୟରେ ବି ଯାଜପୁର ଜିଲ୍ଲାରେ ଗଣ୍ଡଗୋଳ ଏବଂ ହିଂସା ପରିଲକ୍ଷିତ ହୋଇଛି। ତୃତୀୟ ପର୍ଯ୍ୟାୟରେ ନିର୍ବାଚନ ପାଇଁ ମତଦାନ ଜାରି ରହିଥିବା ବେଳେ ଯାଜପୁର ଜିଲାର କେତେକ ସ୍ଥାନରେ ଅଘଟଣ ଘଟିଥିବାର ଖବର ମିଳିଛି।
କୋରେଇରେ ଗୋଳେଇପୁର ପଞ୍ଚାୟତ ସୋତି ୟୁଜିଏମଇ ସ୍କୁଲରେ ମତଦାନ ବେଳେ ବିଡିଓଙ୍କୁ ମାଡ଼ ମରାଯାଇଥିବା ଅଭିଯୋଗ ହୋଇଛି । ବୁଥ ଜବରଦଖଲ ଅଭିଯୋଗ ପରେ ୪ଟି ବୁଥରେ ମତଦାନ ବନ୍ଦ ରଖାଯାଇଛି । ୮, ୯, ୧୦ ଓ ୧୧ନଂ ବୁଥରେ ଭୋଟ ବେଳେ ଦୁର୍ବୃତ୍ତମାନେ ଗଣ୍ଡଗୋଳ କରିଛନ୍ତି । କୋରେଇ ବିଡିଓ ରଞ୍ଜନ ପରିଡ଼ାଙ୍କ ଉପରେ ଆକ୍ରମଣ ହୋଇଛି । ଖବରପାଇ ପୁଲିସ ଘଟଣାସ୍ଥଳରେ ପହଞ୍ଚିବା ପରେ ସ୍ଥିତିକୁ ସ୍ବାଭାବିକ କରିବା ପାଇଁ ଚେଷ୍ଟା ଚଳାଇଥିବା ଜଣାଯାଇଛି।
