ଏଥର ସ୍କୁଲ୍ ନ ଆସିଲେ ମିଳିବନି ସାଇକେଲ୍ ଟଙ୍କା

ଭୁବନେଶ୍ୱର : ମାଟ୍ରିକ ପରୀକ୍ଷାରେ ୪୩ ହଜାର ଛାତ୍ରଛାତ୍ରୀ ଅନୁପସ୍ଥିତ ଘଟଣା ସାମ୍ନାକୁ ଆସିବା ପରେ ତନାଘନା ଚାଲିଛି । କେଉଁଠି ତ୍ରୁଟି ରହିଲା ? ଏତେ ସଂଖ୍ୟାରେ ପିଲା କାହିକିଁ ଅଧାରୁ ପାଠ ଛାଡ଼ିଲେ ? କେଉଁ କାରଣ ଲାଗି ପରୀକ୍ଷା ଦେବାକୁ ପିଲା ଆସିଲେ ନାହିଁ ? ଏନେଇ ସ୍କୁଲସ୍ତରରୁ ଖୋଳତାଡ଼ ଚାଲିଥିବା ବେଳେ ନବମ କ୍ଲାସରେ ଲେଖା ହୋଇଥିବା ୩୦ ପ୍ରତିଶତ ଛାତ୍ରଛାତ୍ରୀ ଆଦୌ କ୍ଲାସ କରିବାକୁ ଆସିନାହାନ୍ତି ।

କରୋନା କାଳରେ କେହିଁ ଅନ୍ୟ ଜିଲ୍ଲା କୁ କିମ୍ବା ଅନ୍ୟ ରାଜ୍ୟକୁ ଯାଇଛନ୍ତି । କେହି କେହି ଛାତ୍ରୀ ବିବାହ ବି କରିଛନ୍ତି । ଅଷ୍ଟମରୁ ନବମ କ୍ଲାସରୁ ଉତ୍ତୀର୍ଣ୍ଣ ହେବା କ୍ଷଣି ସେମାନଙ୍କ ବ୍ୟାଙ୍କ ଆକାଉଣ୍ଟକୁ ସାଇକେଲ ବାବଦ ଅର୍ଥ ଯାଇଛି । ସାଇକେଲ କିଣିଛନ୍ତି କି ନାହିଁ ତାହାର ବି କିଛି ସଠିକ୍ ତଥ୍ୟ ନାହିଁ । ସାଇକେଲ୍ ବାବସରେ ୨୬୦୦ ଟଙ୍କା ପାଇବା ପରେ ପିଲା ସ୍କୁଲ ଆସି ନଥିବା ନେଇ ଡିଇଓଙ୍କ ରିପୋର୍ଟ ମିଳିବା ପରେ ଗଣଶିକ୍ଷା ବିଭାଗର ଚେତା ପଶିଛି । ଏବର୍ଷ ନିଷ୍ପତି ହୋଇଛି ଯେ ପିଲା ସ୍କୁଲକୁ ଆସିଲେ ହିଁ ସାଇକେଲ୍ ପାଇବେ । ସାଇକେଲ୍ ଅର୍ଥ ବଣ୍ଟଣ ପୂର୍ବରୁ ଜିଲ୍ଲା ଓ ବ୍ଲକ ଶିକ୍ଷା ଅଧିକାରୀମାନେ ପିଲାଙ୍କ ତଥ୍ୟ ଭଲ ଭାବରେ ଯାଞ୍ଚ କରିବେ । ଚଳିତ ଆର୍ଥିକ ବର୍ଷରେ ସାଇକେଲ୍ ବାବଦରେ ପାଖାପାଖି ୧ କୋଟି ୩୦ ଲକ୍ଷ ଟଙ୍କା ଖର୍ଚ୍ଚ କରିବାକୁ ରାଜ୍ୟ ସରକାର ରୂପରେଖ ପ୍ରସ୍ତୁତ କରିଛନ୍ତି । ଅନ୍ୟ ପକ୍ଷରେ ଓଷ୍ଟା ସାଧାରଣ ସମ୍ପାଦକ ପ୍ରକାଶ ଚନ୍ଦ୍ର ମହାନ୍ତି କହିଛନ୍ତି ଯେ ପିଲାଙ୍କୁ ସାଇକେଲ୍ ପାଇଁ ଦିଆଯାଉଥିବା ଅର୍ଥରେ ବଜାରରେ ସାଇକେଲ ମିଳୁନାହିଁ । ବଜାରରେ ସାଇକେଲ ମୂଲ୍ୟ ୪୦୦୦ ଥିବା ବେଳେ ସରକାର ଦେଉଛନ୍ତି ମାତ୍ର ୨୬୦୦ ଟଙ୍କା । ପିଲା ସାଇକେଲ୍ କିଣିବା ପରେ ଫେ୍ଧଙ୍କ ଉଠାଇ ତାହା ଦାଖଲ କରିବାକୁ ପ୍ରଧାନଶିକ୍ଷକମାନଙ୍କୁ କୁହାଯାଉଛି । ଯେଉଁ ପିଲାଙ୍କ ଆର୍ଥିକ ସ୍ଥିତି ଭଲ ନାହିଁ ସାଇକେଲ ପାଇଁ ଆଉ ଟଙ୍କା ଆଣିବ କେଉଁଠୁ ତାହା ବଡ଼ ପ୍ରଶ୍ନ ।