ପଦ୍ମପୁରରୁ ବିପୁଳ ପରିମାଣର ନିଶା ଇଞ୍ଜେକ୍ସନ ଜବତ, ତଦନ୍ତ ଆରମ୍ଭ
ପଦ୍ମପୁର : ପଦ୍ମପୁର ଉପ-ନିର୍ବାଚନ ପୂର୍ବରୁ ମିଳିଲା ବିପୁଳ ପରିମାଣର ନିଶା ଇଞ୍ଜେକ୍ସନ୍। ତେବେ ଏତେ ପରିମାଣର ଇଞ୍ଜେକ୍ସନ୍ କେଉଁଠୁ ଆସୁଥିଲା ଓ କେଉଁଠିକି ଯାଉଥିଲା, ତାହା ବର୍ତ୍ତମାନ ସୁଦ୍ଧା ଜଣାପଡ଼ିନାହିଁ। ନିଶା ଇଞ୍ଜେକ୍ସନ୍କୁ ଜବତ କରି ପଦ୍ମପୁର ଅବକାରୀ ବିଭାଗ ବିଭିନ୍ନ ଦିଗରୁ ତଦନ୍ତ ଚଳାଇଛି।
ବିଶେଷ ସୂତ୍ରରୁ ଖବର ପାଇ ଅବକାରୀ ବିଭାଗ ପଦ୍ମପୁର ତାଲପାଲି ଛକ ନିକଟରେ ଚଢ଼ଉ କରିଥିଲା। ଚଢ଼ଉ ସମୟରେ ୫୯୦ଟି ଇଞ୍ଜେକ୍ସନ୍ ଜବତ କରିଥିଲା। ଯାହାର ଆନୁମାନିକ ମୂଲ୍ୟ ୫୦ ହଜାର ଟଙ୍କା ହେବ। ଏଥିସହ ୧୫୦ଟି କଫ୍ ସିରଫ୍ ଓ ନଗଦ ୩ ଲକ୍ଷ ଟଙ୍କା ଜବତ କରିଥିଲା ଅବକାରୀ ବିଭାଗ। ଏହି ମାମଲାରେ ମନୋଜ କୁମାର ବାଜପେୟୀକୁ ଅବକାରୀ ବିଭାଗ ଗିରଫ କରିଛି। ତା’ ନାଁରେ ପୂର୍ବରୁ ଅଭିଯୋଗ ଥିବା ଅବକାରୀ ପୁଲିସ ସୂଚନା ଦେଉଛି। ଜବତ ହୋଇଥିବା ନିଶା ଇଞ୍ଜେକ୍ସନ୍ କେଉଁଠିକି ଯାଉଥିଲା, ତାହା ବର୍ତ୍ତମାନ ସୁଦ୍ଧା ଜଣାପଡ଼ି ନାହିଁ।
ଅବକାରୀ ଥାନା ଅଧିକାରୀଙ୍କ କହିବା ଅନୁସାରେ ପୂର୍ବରୁ ଏତେ ପରିମାଣର ନିଶା ଦ୍ରବ୍ୟ ଧରା ହୋଇନଥିଲା। ଏଥର କିନ୍ତୁ ବିପୁଳ ପରିମାଣର ଜବତ କରାଯାଇଛି। ଆମେ ନିଶ୍ଚିତ ଭାବେ ନିଶା କାରବାରର ମୂଳ ପର୍ଯ୍ୟନ୍ତ ଯାଇ ପହଞ୍ଚିବୁ। ତଦନ୍ତରେ ଅବକାରୀ ବିଭାଗ ପକ୍ଷରୁ କୌଣସି ଢ଼ିଲା ଦିଅଯିବ ନାହିଁ ବୋଲି ଅବକାରୀ ଥାନା ଅଧିକାରୀ କହିଛନ୍ତି।
