‘ମାଣ୍ଡୁସ୍’ ପ୍ରଭାବରେ ତାମିଲନାଡୁ ସହ ତିନି ରାଜ୍ୟରେ ପ୍ରବଳ ବର୍ଷା, ଚେନ୍ନାଇରେ ସ୍କୁଲ ବନ୍ଦ
ଚେନ୍ନାଇ : ସାମୁଦ୍ରିକ ଝଡ ‘ମାଣ୍ଡୁସ୍’ ପ୍ରଭାବରେ ଦକ୍ଷିଣ ଭାରତରେ ପ୍ରବଳ ବର୍ଷା ଜାରି ରହିଛି। ତାମିଲନାଡୁ, ପୁଡୁଚେରୀ ଏବଂ ଆନ୍ଧ୍ରପ୍ରଦେଶର ଉପକୂଳବର୍ତ୍ତୀ ଅଞ୍ଚଳରେ ଗତକାଲି ଠାରୁ ବର୍ଷା ଲାଗି ରହିଛି। ଭାରତୀୟ ପାଣିପାଗ ବିଭାଗ (ଆଇଏମଡି) କହିଛି ଯେ ବାତ୍ୟା ‘ମାଣ୍ଡୁସ୍’ର ସ୍ଥଳଭାଗ ଛୁଇଁବା ପ୍ରକ୍ରିୟା ଆରମ୍ଭ ହୋଇଯାଇଛି । ସୌଭାଗ୍ୟ ବଶତଃ ସ୍ଥଳଭାଗ ଛୁଇଁବା ପୂର୍ବରୁ ‘ମାଣ୍ଡୁସ୍’ ଦୁର୍ବଳ ହୋଇଯାଇଥିଲା । ପାଣିପାଗ ବିଭାଗର ସୂଚନା ଅନୁଯାୟୀ ଏହି ଘୂର୍ଣ୍ଣିଝଡ ବର୍ତ୍ତମାନ ଅବପାତରେ ପରିଣତ ହୋଇଛି ଓ ଏହା ଆହୁରି ଦୁର୍ବଳ ହେବ। ତେବେ ଏହାର ପ୍ରଭାବରେ ଆଜି ମଧ୍ୟ ତାମିଲନାଡୁ, ପୁଡୁଚେରୀ ସହ ଦକ୍ଷିଣ ଆନ୍ଧ୍ରପ୍ରଦେଶରେ ପ୍ରବଳ ବର୍ଷା ହୋଇପାରେ | ଏହାସହ ତାମିଲନାଡୁ ଓ ପୁଡୁଚେରୀ ଉପକୂଳରେ ୭୦ ରୁ ୮୦ କିଲୋମିଟର ପ୍ରତି ଘଣ୍ଟା ବେଗରେ ପବନ ବହିପାରେ। ଏହାକୁ ଦୃଷ୍ଟିରେ ରଖି ତାମିଲନାଡୁ ସରକାର ସ୍କୁଲ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି।
ରିଲିଫ ଏବଂ ଉଦ୍ଧାର କାର୍ଯ୍ୟ ପାଇଁ ଏନଡିଆରଏଫ୍ ଟିମ୍ ନିୟୋଜିତ କରାଯାଇଛି | ଘୂର୍ଣ୍ଣିଝଡ ପ୍ରଭାବରେ ତାମିଲନାଡୁ, ଆନ୍ଧ୍ରପ୍ରଦେଶ ଏବଂ ପୁଡୁଚେରୀର ବହୁ ଅଞ୍ଚଳରେ ଅବିଶ୍ରାନ୍ତ ବର୍ଷା ଜାରି ରହିଛି। ଆଇଏମଡିର ଆଞ୍ଚଳିକ ପାଣିପାଗ କେନ୍ଦ୍ରର ମୁଖ୍ୟ ଏସ ବାଲାଚନ୍ଦ୍ରନ କହିଛନ୍ତି ଯେ ଶୁକ୍ରବାର ବିଳମ୍ବିତ ରାତିରେ ‘ମାଣ୍ଡୁସ୍’ ମାଣ୍ଡଲପୁରମ୍ ନିକଟରେ ସ୍ଥଳଭାଗ ଛୁଇଁଛି। ଯଦି ଏହି ଘୂର୍ଣ୍ଣିଝଡ ମମଲାଲାପୁରମ୍ ନିକଟରେ ଉପକୂଳ ଅତିକ୍ରମ କରେ, ତେବେ ଏହା ଚେନ୍ନାଇ ଏବଂ ପୁଡୁଚେରୀ ମଧ୍ୟରେ ଉପକୂଳ ପାର କରିବାରେ ୧୩ତମ ଘୂର୍ଣ୍ଣିଝଡ ହେବ | ବାଲଚନ୍ଦ୍ରନ କହିଛନ୍ତି ଯେ ୧୮୯୧ ରୁ ୨୦୨୧ ମଧ୍ୟରେ ଗତ ୧୩୦ ବର୍ଷ ମଧ୍ୟରେ ଚେନ୍ନାଇ ଏବଂ ପୁଡୁଚେରୀ ମଧ୍ୟରେ ୧୨ଟି ବାତ୍ୟା ଆସିଛି।
ସୂଚନା ଯେ, ‘ମାଣ୍ଡୁସ୍’ ଏକ ଆରବୀୟ ଶବ୍ଦ ଯାହାର ଅର୍ଥ ଖଜଣା ପେଡ଼ି । ଘୂର୍ଣ୍ଣିଝଡର ଏହି ନାମ ୟୁଏଇ ଦ୍ୱାରା ରଖାଯାଇଛି ।
