ସିରାଜଙ୍କୁ ଫିକ୍ସିଂ ଅଫର ! ହାଇଦ୍ରାବାଦର ଡ୍ରାଇଭର ମେସେଜ୍ କରି ମାଗିଥିଲେ ଭିତିରି ତଥ୍ୟ
ନୂଆଦିଲ୍ଲୀ: ଚଳିତ ବର୍ଷ ଫେବୃଆରୀରେ ଅଷ୍ଟ୍ରେଲିଆ ଗସ୍ତ ପୂର୍ବରୁ ଜଣେ ଅଜଣା ବ୍ୟକ୍ତି ତାଙ୍କ ସହ ଯୋଗାଯୋଗ କରିଥିଲେ ବୋଲି ଭାରତୀୟ ଦ୍ରୁତ ବୋଲର ମହମ୍ମଦ ସିରାଜ୍ ଅଭିଯୋଗ କରିଛନ୍ତି । ବ୍ୟକ୍ତି ଜଣକ ସିରାଜଙ୍କ ଠାରୁ ତାଙ୍କ ଆଇପିଏଲ୍ ଦଳ ବିଷୟରେ କିଛି ଭିତିରି ସୂଚନା ଜାଣିବାକୁ ଚାହୁଁଥିଲେ। ଆଇପିଏଲରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ପାଇଁ ଖେଳୁଥିବା ସିରାଜ ଏହି ବିଷୟରେ ବିସିସିଆଇର ଏସିୟୁକୁ ଜଣାଇଥିଲେ।
ଆଇପିଏଲ୍ ବେଟିଂରେ ବହୁ ଟଙ୍କା ହରାଇ ହତାଶ ହେବା ପରେ ସେହି ବ୍ୟକ୍ତି ଜଣକ ସିରାଜଙ୍କୁ ଏକ ମେସେଜ୍ ପଠାଇଥିଲେ। ଜାନୁଆରୀ-ଫେବୃଆରୀରେ ଭାରତ ନ୍ୟୁଜିଲ୍ୟାଣ୍ଡ ବିପକ୍ଷରେ ଏକ ସୀମିତ ଓଭର ଘରୋଇ ସିରିଜ୍ ଖେଳିଥିଲା । ଏହା ପରେ ଅଷ୍ଟ୍ରେଲିଆ ଦଳ ଭାରତ ଆସିଥିଲା । ଭାରତ ଟି-୨୦ ସିରିଜରେ ଶ୍ରୀଲଙ୍କାକୁ ୨-୧ରେ ପରାସ୍ତ କରିଥିବା ବେଳେ ଦିନିକିଆ ସିରିଜକୁ ୩-୦ରେ ଜିତିଥିଲା । ନ୍ୟୁଜିଲାଣ୍ଡ ବିପକ୍ଷରେ ଭାରତ ଦିନିକିଆ ସିରିଜକୁ ୩-୦ରେ ଜିତିଥିବା ବେଳେ ଟି-୨୦ ସିରିଜକୁ ୨-୧ରେ କବଜା କରିଥିଲା ।
ବିସିସିଆଇ ସୂତ୍ରରୁ ପ୍ରକାଶ ଯେ, ସିରାଜଙ୍କ ନିକଟକୁ ଆସିଥିବା ବ୍ୟକ୍ତି ବୁକି ନଥିଲେ। ସେ ହାଇଦ୍ରାବାଦର ଜଣେ ଡ୍ରାଇଭର ଥିଲେ ଓ ବେଟିଂ(ସଟ୍ଟା) ପ୍ରତି ତାଙ୍କର ଆସକ୍ତି ଥିଲା । ବେଟିଂରେ ସେ ବହୁତ ଟଙ୍କା ହରାଇଥିଲେ । ତେଣୁ ଭାରତୀୟ ଦଳର ଭିତିରି ସୂଚନା ପାଇବା ଲକ୍ଷ୍ୟରେ ସେ ହ୍ବାଟସଆପରେ ସିରାଜଙ୍କ ସହ ଯୋଗାଯୋଗ କରିଥିଲେ। ସିରାଜ ତୁରନ୍ତ ଏହି ବିଷୟ ବିସିସିଆଇ ଏସିୟୁକୁ ଜଣାଇଥିଲେ। ଆନ୍ଧ୍ର ପୋଲିସ ସେହି ବ୍ୟକ୍ତିଙ୍କୁ ଗିରଫ କରିଥିବା ବିସିସିଆଇ ସୂତ୍ରରୁ ପ୍ରକାଶ।
୨୦୧୩ ସ୍ପଟ୍ ଫିକ୍ସିଂ ସ୍କାଣ୍ଡାଲ ପରେ ବିସିସିଆଇ ଏହାର ଏସିୟୁ ନେଟୱାର୍କକୁ ବ୍ୟାପକ କରିଥିଲା । ବର୍ତ୍ତମାନ ପ୍ରତ୍ୟେକ ଆଇପିଏଲ୍ ଦଳର ନିଜସ୍ୱ ଏସିୟୁ ଅଧିକାରୀ ଅଛନ୍ତି । ସେମାନେ ଟିମ୍ ହୋଟେଲରେ ରୁହନ୍ତି ଏବଂ ସମସ୍ତ କାର୍ଯ୍ୟକଳାପ ଉପରେ ନଜର ରଖନ୍ତି । ଏହାଛଡ଼ା ଖେଳାଳିଙ୍କ ପାଇଁ ଏସିୟୁ ଓ୍ବାର୍କଶପ୍ ବାଧ୍ୟତାମୂଳକ କରାଯାଇଛି ।
