ପ୍ରଥମ ଟେଷ୍ଟ : ପାକିସ୍ତାନକୁ ଦୃଢ଼ ଜବାବ ଦେଲା ନ୍ୟୁଜିଲାଣ୍ଡ
କରାଚୀ : ପାକିସ୍ତାନକୁ ଦୃଢ଼ ଜବାବ ଦେଲା ନ୍ୟୁଜିଲାଣ୍ଡ । ଭ୍ରମଣକାରୀ ନ୍ୟୁଜିଲାଣ୍ଡ କରାଚୀରେ ଚାଲିଥିବା ପ୍ରଥମ ଟେଷ୍ଟରେ ବାବର ଆଜମ ଏବଂ ଆଘା ସଲ୍ମନ୍ଙ୍କ ଶତକ ସାଙ୍ଗକୁ ୱିକେଟ୍ରକ୍ଷକ ସର୍ଫରାଜ ଅହମ୍ମଦଙ୍କ ଅର୍ଦ୍ଧଶତକ ସହାୟତାରେ ପାକିସ୍ତାନ ପ୍ରଥମ ପାଳି ସ୍କୋର୍ ୪୩୮ ରନ୍ରେ ଶେଷ ହୋଇଯାଇଥିଲା ବେଳେ ନ୍ୟୁଜିଲାଣ୍ଡ୍ ବି ମୁହଁତୋଡ଼ ଜବାବ ଦେଇଛି। ଏହି ଦଳ ମଙ୍ଗଳବାର ଦ୍ବିତୀୟ ଦିବସ ଶେଷ ସୁଦ୍ଧା କୌଣସି ୱିକେଟ୍ ନହରାଇ ୧୬୫ ରନ୍ କରିନେଇଛି ।
ଦୁଇ ଓପ୍ନର ଟମ୍ ଲାଥମ୍ (୭୮, ୧୨୬ ବଲ୍, ୮ ଚୌକା) ଏବଂ ଡେଭନ୍ କନ୍ୱେ (୮୨, ୧୫୬ ବଲ୍, ୧୨ ଚୌକା) ଅତୁଟ ପ୍ରଥମ ୱିକେଟ୍ରେ ୧୬୫ ରନ୍ ଯୋଡ଼ି ଦଳକୁ ବଡ଼ ସ୍କୋର୍ ସୁଯୋଗ ଦେଇଛନ୍ତି। ଏହାସତ୍ତ୍ବେ ଭ୍ରମଣକାରୀ ଦଳ ୨୭୩ ରନ୍ ପଛରେ ରହିଛି। ଏହା ପୂର୍ବରୁ ପ୍ରଥମ ଦିବସରେ ୩୧୭/୫ କରିଥିବା ଘରୋଇ ଦଳ ଦ୍ବିତୀୟ ଦିବସରେ ୧୨୧ ରନ୍ ଯୋଡ଼ି ଅବଶିଷ୍ଟ ୫ ୱିକେଟ୍ ହରାଇଥିଲା। ବାବର ଆଜମ୍ ପୂର୍ବଦିନ ସ୍କୋର୍ (୧୬୧)ରେ ଆଉଟ୍ ହୋଇଯାଇଥିଲା ବେଳେ ଆଘା ସଲ୍ମନ କିନ୍ତୁ ଶତକ ହାସଲ କରିଥିଲେ। ସେ ୧୦୩ ରନ୍ କରି ଶେଷ ବ୍ୟାଟର୍ ଭାବେ ପାଭିଲିୟନ୍ ଫେରିଥିଲେ।
