ଅପେକ୍ଷାର ଅନ୍ତ ! ଆଜି ୮ ହଜାରରୁ ଅଧିକ ସ୍କ୍ରିନରେ ରିଲିଜ ହେବ ଫିଲ୍ମ ‘ଆର୍ ଆର୍ ଆର୍’

ମୁମ୍ବାଇ : ଆଜି ବହୁ ପ୍ରତିକ୍ଷିତ ଫିଲ୍ମ ‘ଆର୍ ଆର୍ ଆର୍’ (RRR) ରିଲିଜ ହେବ । ଏହି ଫିଲ୍ମକୁ ନେଇ ଦୀର୍ଘ ଦିନ ଧରି ଚର୍ଚ୍ଚା ଜାରି ରହିଛି । ଏସଏସ ରାଜାମୌଲିଙ୍କ ନିର୍ଦ୍ଦେଶନାରେ ଏହି ବିଗ୍ ବଜେଟ୍ ଫିଲ୍ମ ନିର୍ମାଣ ହୋଇଛି । ଦର୍ଶକ ଏହି ଫିଲ୍ମ ଦେଖିବାକୁ ବେଶ ଉତ୍ସାହର ସହ ଅପେକ୍ଷା କରି ରହିଛନ୍ତି । କୋରୋନା ମହାମାରୀ ପାଇଁ ଏହି ଫିଲ୍ମର ରିଲିଜ ଡେଟରେ ଅନେକ ପରିବର୍ତ୍ତନ କରାଯାଇଥିଲା । ତେବେ ବହୁ ପ୍ରତୀକ୍ଷାର ଅନ୍ତଃ ଘଟିବାକୁ ଯାଉଛି । ଆଜି ଦେଶ ବିଦେଶର ଅନେକ ସିନେମା ଘରେ ଏହି ଫିଲ୍ମ ରିଲିଜ ହେବାକୁ ଯାଉଛି ।

ଏହି ଫିଲ୍ମକୁ ନେଇ ସମସ୍ତେ ବେଶ ଉତ୍ସାହିତ ଅଛନ୍ତି । କାହିଁକି ନା ଏହି ଫିଲ୍ମର ଟ୍ରେଲର ଜବରଦସ୍ତ ହେବା ସହ ବାହୁବଲୀ ନିର୍ଦ୍ଦେଶକଙ୍କ ନିର୍ଦ୍ଦେଶନାରେ ଏହି ଫିଲ୍ମ ତିଆରି ହୋଇଥିବାରୁ ଏହା ଭରପୁର ମନୋରଞ୍ଜନର ଖୋରାକ ଯୋଗାଇବ ବୋଲି ସମସ୍ତେ ଆଶା ରଖିଛନ୍ତି ।ବ୍ଲକ ବଷ୍ଟର ଫିଲ୍ମ ବାହୁବଲୀ ନିର୍ମାଣ କରି ନିର୍ଦ୍ଦେଶକ ସବୁ ବର୍ଗର ଦର୍ଶକଙ୍କ ବିଶ୍ୱାସ ଜିତି ପାରିଛନ୍ତି । ସେଥିପାଇଁ ଦର୍ଶକଙ୍କ ସମେତ ସିନେ ସମୀକ୍ଷକ ବି ଫିଲ୍ମ ଟ୍ରିପଲ RRR ମଧ୍ୟସୁପରହିଟ୍ ହେବା ନେଇ ଏବେଠୁ ଅନୁମାନ କରୁଛନ୍ତି । ଏପରିକି ସମସ୍ତେ ଅନୁମାନ କରୁଛନ୍ତି ଯେ ଫିଲ୍ମଟି ରିଲିଜ ପରେ ସିନେମା ଜଗତ ଇତିହାସ ବଦଳାଇଦେବ । ଆସନ୍ତା କାଲି ଏହି ଫିଲ୍ମ ଆଉଟ୍-ଏଣ୍ଡ-ଆଉଟ୍ ଆକ୍ସନ ଏଣ୍ଟରଟେନର ସାବ୍ୟସ୍ତ ହେବ ।

ସୂଚନା ଅନୁସାରେ ଏହି ଫିଲ୍ମ ଦେଶ ଏବଂ ବିଦେଶର ବହୁ ସିନେମା ଘରେ ରିଲିଜ ହେବ । କେବଳ ଭାରତରେ ହିନ୍ଦୀ ସଂସ୍କରଣରେ ଏହି ଫିଲ୍ମ ପାଖାପାଖି ୩୨ ଶହ ସ୍କ୍ରିନରେ ରିଲିଜ ହେବ । ଆଉ ଦକ୍ଷିଣ ଭାରତରେ ଏହା ୩ ହଜାରରୁ ଅଧିକ ସ୍କ୍ରିନରେ ରିଲିଜ ହେବାର ସୂଚନା ମିଳିଛି । ସେହିପରି ବିଦେଶରେ ଏହି ବିଗ୍ ବଜେଟ୍ ଫିଲ୍ମ ୧ ହଜାର ୭୫୦ ସ୍କ୍ରିନରେ ରିଲିଜ ହେବାକୁ ଯାଉଛି । ତେବେ ସ୍କ୍ରିନ୍ ସଂଖ୍ୟା ଆଗାମୀ ଦିନରେ ବୃଦ୍ଧି ପାଇପାରେ, କାହିଁକି ନା ନାମୀଦାମୀ ଷ୍ଟାରର ଏହି ଫିଲ୍ମ ଜରିଆରେ ବାହୁବଲୀ ନିର୍ଦ୍ଦେଶକ ନିଜ ପୁରୁଣା ରେକର୍ଡ ଭାଙ୍ଗି ନୂଆ ରେକର୍ଡ ସୃଷ୍ଟି କରିବା ନେଇ ଆଶା ରଖିଛନ୍ତି । କହିବାକୁ ଗଲେ ସାରାଦୁନିଆରେ ପ୍ରାୟ ୮ ହଜାରରୁ ଅଧିକ ସ୍କ୍ରିନରେ ରିଲିଜ କରାଯିବ ।