ଆଜିଠୁ ଫିଫା ବିଶ୍ୱକପ: ଉଦଘାଟନୀ ମ୍ୟାଚରେ କତାର-ଇକ୍ୟୁଡର ମୁକାବିଲା
କତାରରେ ରଙ୍ଗାରଙ୍ଗ ଉଦ୍ଘାଟନୀ ଉତ୍ସବ, ଭାଗ ନେଇଛନ୍ତି ୩୨ ଦଳ
ନୂଆଦିଲ୍ଲୀ : ଆଜିଠାରୁ ଆରମ୍ଭ ହେବ ଫିଫା ବିଶ୍ବକପ୍ । ଆଉ କିଛି ଘଣ୍ଟାର ଅପେକ୍ଷା ପରେ ଫିଫା ବିଶ୍ବକପ୍ର ୨୨ତମ ସଂସ୍କରଣ ଆରମ୍ଭ ହେବ। କାତାରର ଅଲ୍ ବାୟତ୍ ଷ୍ଟାଡିୟମ୍ରେ ଆୟୋଜକ ଦଳ ସହିତ ଇକ୍ବେଡ଼ରର ଉଦ୍ଘାଟନୀ ମୁକାବିଲା ଅନୁଷ୍ଠିତ ହେବ। ଭାରତୀୟ ସମୟ ରାତି ସାଢେ ୯ଟାରେ ଏହି ମ୍ୟାଚ୍ ଖେଳାଯିବ। ଏଥିପୂର୍ବରୁ ସନ୍ଧ୍ୟା ସାଢେ ୭ଟାରୁ ରଙ୍ଗାରଙ୍ଗ ଉଦ୍ ଘାଟନୀ କାର୍ଯ୍ୟକ୍ରମ ରହିଛି । ପୂର୍ବରୁ ଉଦ୍ଘାଟନୀ ଉତ୍ସବକୁ ଗୋଟିଏ ଦିନ ଆଗରୁ କରିବା ପାଇଁ ଚିନ୍ତା କରାଯାଇଥିଲା। କିନ୍ତୁ ପରେ ଏହାକୁ ଉଦ୍ଘାଟନୀ ମ୍ୟାଚ୍ ପୂର୍ବରୁ ଆୟୋଜନ କରିବାକୁ ସ୍ଥିର କରାଯାଇଛି।
ଫିଫା ବିଶ୍ବକପ୍ରେ ପଦାର୍ପଣ କରିବା ସହ ଆୟୋଜକ ଭାବେ କାତାର ନୂଆ କୀର୍ତ୍ତିମାନ ରଚିବାକୁ ଯାଉଛି। ଏହି ସଂସ୍କରଣରେ ପୂର୍ବ ବିଜେତା ଫ୍ରାନ୍ସ ସହିତ ୩୨ ଦଳ ଅଂଶଗ୍ରହଣ କରିବାକୁ ଯାଉଛନ୍ତି। ସମସ୍ତ ଦଳଙ୍କୁ ନେଇ ୮ ଗ୍ରୁପ୍ରେ ବଣ୍ଟାଯାଇଛି। ପ୍ରତି ଗ୍ରୁପ୍ର ଶ୍ରେଷ୍ଠ ଦୁଇ ଦଳ ନକ୍ଆଉଟ୍ ପର୍ଯ୍ୟାୟକୁ ଉନ୍ନୀତ ହେବେ। ଡିସେମ୍ବର ୩ ତାରିଖରୁ ନକ୍ଆଉଟ୍ ପର୍ଯ୍ୟାୟ ଆରମ୍ଭ ହୋଇ ୧୮ ତାରିଖରେ ଫାଇନାଲ୍ ଅନୁଷ୍ଠିତ ହେବ। ୨୯ ଦିନିଆ ଏହି ଫୁଟ୍ବଲ୍ ମହାକୁମ୍ଭରେ ମୋଟ ୬୪ ମ୍ୟାଚ୍ ଖେଳାଯିବା ପରେ ବିଶ୍ବ ବିଜେତା ନିର୍ଣ୍ଣୟ ହେବ। ଚଳିତ ବର୍ଷ ବିଶ୍ବକପ୍ ୮ ଷ୍ଟାଡିୟମ୍ରେ ଖେଳାଯିବ। ଲୁସିଆଲ୍ ଆଇକନିକ୍ ଷ୍ଟାଡିୟମ୍, ଅଲ୍ ବାୟତ୍ ଷ୍ଟାଡିୟମ୍, ଷ୍ଟାଡିୟମ୍ ୯୭୪, ଅଲ୍ ଥୁମାମା ଷ୍ଟାଡିୟମ୍, ଖଲିଫା ଇଣ୍ଟରନ୍ୟାସନାଲ ଷ୍ଟାଡିୟମ୍, ଏଜୁକେସନ୍ ସିଟି ଷ୍ଟାଡିୟମ୍, ଅହମ୍ମଦ ବିନ୍ ଅଲୀ ଷ୍ଟାଡିୟମ୍, ଅଲ୍ ଜାନବ ଷ୍ଟାଡିୟମ୍ରେ ମ୍ୟାଚ୍ଗୁଡ଼ିକ ଖେଳାଯିବ। ବିଶ୍ବକପ୍ର ଏହି ସଂସ୍କରଣ ପାଇଁ ‘ଲାଇବ୍’କୁ ମାସ୍କଟ୍ ରୂପେ ବଛାଯାଇଛି। ସେହିପରି ଅଫିସିଆଲ୍ ମ୍ୟାଚ୍ ବଲ୍ର ନାମ ରଖାଯାଇଛି ‘ଅଲ୍ ରିହଲା’।
ଅନ୍ୟପକ୍ଷରେ ଉଦ୍ଘାଟନୀ ଉତ୍ସବରେ ବିଭିନ୍ନ କାର୍ଯ୍ୟକ୍ରମ ପରିବେଷଣ ପାଇଁ କଳାକାରମାନଙ୍କ ନାମକୁ ଫିଫା ପକ୍ଷରୁ ଏପର୍ଯ୍ୟନ୍ତ ଘୋଷଣା କରାଯାଇନାହିଁ। ତଥାପି ଦକ୍ଷିଣ କୋରିଆର ରକ୍ ବ୍ୟାଣ୍ଡ୍ ବିଟିଏସ୍ର ୭ ସଦସ୍ୟଙ୍କ ମଧ୍ୟରୁ ଜଣେ ଜଙ୍ଗ କୁକ୍ ‘ଡ୍ରିମର୍ସ’ ଟ୍ରାକ୍ରେ ସଂଗୀତ ପରିବେଷଣ କରିବାକୁ ଯାଉଥିବା ଜଣାପଡ଼ିଛି। ସେହିପରି ଏହି ଉତ୍ସବରେ ସାମିଲ ହେଉଥିବା ଅନ୍ୟ କଳାକାରଙ୍କ ମଧ୍ୟରେ କଲମ୍ବିଆ ପପ୍ ଷ୍ଟାର୍ ସକିରା, ଜେ. ବାଲ୍ଭିନ୍, ନାଇଜେରିଆର ପାଟ୍ରିକ୍ ଓକୋରି, ଆମେରିକା ରାପର୍ ଲିଲ୍ ବେବି, ମ୍ୟୁଜିକ୍ ଗ୍ରୁପ୍ ବ୍ଲାକ୍ ଆଏଡ୍ ପିଜ୍, ରବି ୱିଲିୟମ୍ସ ପ୍ରମୁଖ ସଙ୍ଗୀତ ପରିବେଷଣ କରିବେ। ଭାରତୀୟ ନୃତ୍ୟଶିଳ୍ପୀ ତଥା ଅଭିନେତ୍ରୀ ନୋରା ଫତେହି ‘ଲାଇଟ୍ ଦ ୱାର୍ଲ୍ଡ’ ସଙ୍ଗୀତରେ ନୃତ୍ୟ ପରିବେଷଣ କରିବେ ବୋଲି ସୂଚନା ମିଳିଛି।
ଭାରତର ଉପରାଷ୍ଟ୍ରପତି ଜଗଦୀପ ଧନକଡ଼ ରବିବାର କାତାରରେ ହେବାକୁ ଥିବା ଫିଫା ବିଶ୍ବକପ୍ ଉଦ୍ଘାଟନୀ ଉତ୍ସବରେ ସାମିଲ ହେବେ। ବୈଦେଶିକ ମନ୍ତ୍ରଣାଳୟ ପକ୍ଷରୁ ମିଳିଥିବା ସୂଚନା ଅନୁଯାୟୀ କାତାରର ଶେଖ ତମିମ୍ ବିନ୍ ହମିଦ ଅଲ୍ ଥାନିଙ୍କ ନିମନ୍ତ୍ରଣ ପରେ ଉପରାଷ୍ଟ୍ରପତି ୨୦ ଓ ୨୧ ତାରିଖରେ ବିଶ୍ବକପ୍ ବୁଲିବାକୁ ଯାଉଛନ୍ତି। ଉଦ୍ଘାଟନୀ ସମାରାହରେ ସାମିଲ ହେବା ସହ କାତାରରେ ଥିବା ପ୍ରବାସୀ ଭାରତୀୟଙ୍କ ସହିତ ଆଲୋଚନା କରିବା କାର୍ଯ୍ୟକ୍ରମ ରହିଛି।
ତେବେ ଏହି ବିଶ୍ବକପ୍ ରେ ଷ୍ଟାଡିୟମକୁ ମଦ ବାରଣ କରାଯାଇଥିବା ବିଶ୍ବ ଫୁଟ୍ ବଲ୍ ପରିଚାଳନା ସଂସ୍ଥା ଫିଫା ସୂଚନା ଦେଇଛି। ‘‘ଫିଫା ଓ ଆୟୋଜକ ଦେଶର କର୍ତ୍ତୃପକ୍ଷଙ୍କ ସହ ଆଲୋଚନା ପରେ କାତାର ଫିଫା ବିଶ୍ୱକପ୍ ସମୟରେ ଷ୍ଟାଡିୟମ ଭିତରେ ବିୟର ବିକ୍ରି କରାଯିବ ନାହିଁ ବୋଲି ନିଷ୍ପତ୍ତି ହୋଇଛି। କତାରରେ ସର୍ବସାଧାରଣରେ ଆଲ୍ କହଲ୍ ବ୍ୟବହାର କରିବାକୁ ବାରଣ ରହିଛି।
ବିଶ୍ବକପ୍ କୁ ନଜରରେ ରଖି ପ୍ରଶଂସକଙ୍କ ପୋଷାକ ପରିଧାନ ଉପରେ ଥିବା କଟକଣାରେ ସାମାନ୍ୟ କୋହଳ କରିଛନ୍ତି କତାର ସରକାର। କିନ୍ତୁ ସ୍ଥାନୀୟ ସଂସ୍କୃତିକୁ ସମ୍ମାନ ଜଣାଇ ପ୍ରଶଂସକମାନେ ପୋଷାକ ପରିଧାନ କରିବାକୁ ଅନୁରୋଧ କରାଯାଇଛି। ସେପଟେ ବିଭିନ୍ନ ଦଳ ଜୋରଦାର ଅଭ୍ୟାସ ଜାରି ରଖିବା ସହ ବିଶ୍ବକପ୍ ପାଇଁ ଜୋରଦାର ପ୍ରସ୍ତୁତ କରିଛନ୍ତି । ଏଥର ୩୨ ଟି ଟିମ୍ ୮ଟି ଗ୍ରୁପରେ ରହିଛନ୍ତି ।
