ଫେଡ଼େରେସନ୍ କପ୍ ଦୌଡ଼କୁଦ : ୧୦୦ ମିଟରରେ ଦୂତିଙ୍କୁ ସ୍ୱର୍ଣ୍ଣ
ଭୁବନେଶ୍ୱର : କେରଳର କାଲିକଟ ବିଶ୍ୱବିଦ୍ୟାଳୟଠାରେ ଚାଲିଥିବା ଫେଡେରେସନ୍ କପ୍ ବରିଷ୍ଠ ଦୌଡ଼କୁଦ ପ୍ରତିଯୋଗିତାରେ ଦୌଡ଼ରାଣୀ ଦୂତି ଚାନ୍ଦ ମହିଳା ୧୦୦ ମିଟରରେ ସ୍ୱର୍ଣ୍ଣ ପଦକ ଜିତିଛନ୍ତି । ଫାଇନାଲ୍ରେ ୧୧.୪୯ ସେକେଣ୍ଡ ସମୟ ନେଇ ଏହି ସଫଳତା ଲାଭ କରିଥିଲେ ଦୂତି । କେରଳର ଏମଭି ଜିଲନା (୧୧.୬୩ ସେକେଣ୍ଡ) ଦ୍ୱିତୀୟ ସ୍ଥାନରେ ରହି ରୌପ୍ୟ ପଦକ ହାସଲ କରିଥିଲା ବେଳେ କର୍ଣ୍ଣାଟକର ଏମ୍ଏନ୍ ସୀମି (୧୧.୭୧ ସେକେଣ୍ଡ) କାଂସ୍ୟ ପଦକ ଜିତଥିଲେ । ୨୦୧୬ ମସିହାରେ ଦୂତି ୧୧.୩୩ ସେକେଣ୍ଡ ସମୟ ନେଇ ଏହି ପ୍ରତିଯୋଗିତାରେ ମିଟ୍ ରେକର୍ଡ ସ୍ଥାପନ କରିଥିଲେ । ତେବେ ଚଳିତ ଥର ସେହି ଟାଇମିଂ ଛୁଇଁପାରି ନଥିଲେ । ସୂଚନାଯୋଗ୍ୟ ଯେ ମହିଳା ୧୦୦ ମିଟର ଜାତୀୟ କୀର୍ତିମାନ (୧୧.୧୭ ସେକେଣ୍ଡ) ମଧ୍ୟ ଦୂତିଙ୍କ ନାଁରେ ରହିଛି ।
