ବାଲେଶ୍ୱର : ଯୁବକଙ୍କ ସନ୍ଦେହ ଜନକ ମୃତ୍ୟୁ, ହତ୍ୟା ଅଭିଯୋଗ ଆଣିଲେ ପରିବାର
ବାଲେଶ୍ୱର : ଦିନକୁ ଦିନ ଅଶାନ୍ତ ହୋଇପଡୁଛି ବାଲେଶ୍ୱର ସହର । ବିଭିନ୍ନ ସମୟରେ ହତ୍ୟା, ମରଣାନ୍ତକ ଆକ୍ରମଣ, ରାହାଜାନୀ, ଲୁଟ୍ ଆଦି ଘଟଣାମାନ ଘଟିଯାଉଛି । ଦିନ ଦ୍ୱିପ୍ରହରରେ ଦୁର୍ବୃତ୍ତମାନେ ଏସବୁ ଘଟଣାମାନ ଘଟାଉଛନ୍ତି । ଅକାରଣରେ ଯାଉଛି ଅନେକଙ୍କ ଜୀବନ । ଏହି ପରିପ୍ରେକ୍ଷୀରେ ସୋମବାର ବାଲେଶ୍ୱର ଜିଲା ସୋର ଅଞ୍ଚଳରେ ଜଣେ ଯୁବକଙ୍କ ସନ୍ଦେହ ଜନକ ମୃତ୍ୟୁ । ଯୁବକଙ୍କୁ ଘରୁ ଡାକିନେଇ ହତ୍ୟା କରାଯାଇଥିବା ନେଇ ତାଙ୍କ ପରିବାର ଲୋକେ ଅଭିଯୋଗ ଆଣିଛନ୍ତି ।
ସୂଚନା ଯେ, ସୋର ପୌରପାଳିକା ଅନ୍ତର୍ଗତ ୧୮ ନଂ. ୱାର୍ଡ ଚକବାରହାପୁର ଗ୍ରାମର ଅନିରୁଧ ପଣ୍ଡାଙ୍କ ପୁତ୍ର ଜଗତଜିତଙ୍କୁ କିଛି ଯୁବକ ଗତ ୩୧ ତାରିଖ ଶନିବାର ସନ୍ଧ୍ୟାରେ ଘରୁ ଡାକି ନେଇଥିଲେ । ଉକ୍ତ ରାତିରେ ଜଗତଜିତ୍ ଘରକୁ ଫେରିନଥିଲେ । ଫଳରେ ପରଦିନ ପରିବାର ଲୋକେ ବହୁ ଖୋଜାଖଜି କରି ମଧ୍ୟ ପାଇ ନଥିଲେ । ରବିବାର ସନ୍ଧ୍ୟାରେ କେହି ଜଣେ ଯୁବକ ଜଗତଜିତକୁ ୧୦୮ ଆମ୍ବୁଲାନ୍ସରେ ସୋର ଡାକ୍ତରଖାନାକୁ ଆଣିଥିଲେ । ମାତ୍ର ଡାକ୍ତର ପରୀକ୍ଷା ପରେ ତାଙ୍କୁ ମୃତ ଘୋଷଣା କରିଥିଲେ । ଏହାପରେ ଯୁବକ ଜଣକ ଜଗତଜିତଙ୍କ ମୃତଦେହକୁ ଡାକ୍ତରଖାନାରେ ଛାଡି ପଳାଏ ଯାଇଥିଲେ । ଖବରପାଇ ପରିବାର ଲୋକେ ସୋର ଡାକ୍ତରଖାନାରେ ପହଞ୍ଚିଥିଲେ । ସେଠାରେ ଜଗତଜିତଙ୍କ ଶରୀରର ବିଭିନ୍ନ ସ୍ଥାନରେ କ୍ଷତବୀକ୍ଷତ ଚିହ୍ନ ଥିବାର ଦେଖିବାକୁ ପାଇଥିଲେ । ଏନେଇ ପରିବାର ଲୋକେ ଜଗତଜିତଙ୍କୁ ହତ୍ୟା କରାଯାଇଥିବା ନେଇ ସୋର ଥାନାରେ ଲିଖିତ ଅଭିଯୋଗ କରିଛନ୍ତି । ଖବର ପାଇ ସୋର ପୋଲିସ୍ ପହଂଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ତଦନ୍ତ ଆରମ୍ଭ କରିଥିବାର ଜଣାପଡିଛି ।
