ଫରେଷ୍ଟ ଗାର୍ଡଙ୍କୁ ଦଳିଦେଲା ହାତୀ
ଅନୁଗୋଳ : ହାତୀ ଘଉଡାଉଥିବା ବେଳେ ଫରେଷ୍ଟ ଗାର୍ଡଙ୍କୁ ଦଳିଦେଲା ହାତୀ । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି । ଏଭଳି ଅଘଟଣ ଘଟିଯାଇଛି ଅନୁଗୋଳ ଜିଲା ବଅଁରପାଳ ବ୍ଲକ ଅନ୍ତର୍ଗତ କୁଲାଡ ପଂଚାୟତରେ । ମୃତ ଫରେଷ୍ଟଗାର୍ଡ ଜଣକ ହେଲେ ଶରତ ଘଡ଼େଇ । ତାଙ୍କ ଘର ତାଳଚେର ଅଂଚଳରେ । ସେ ଅନୁଗୋଳ ବନଖଣ୍ଡ ବିଭାଗରେ ଫରେଷ୍ଟ ଗାର୍ଡ ଭାବରେ କାର୍ଯ୍ୟ କରୁଥିଲେ ।
ଗତକାଲି ରାତିରେ କୁଲାଡ ଗାଁକୁ ହାତୀ ପଲ ପଶି ଆସିଥିଲେ । ଗ୍ରାମବାସୀ ହାତୀ ଘଉଡାଇବା ପାଇଁ ବନ ବିଭାଗକୁ ଖବର ଦେଇଥିଲେ । ଫରେଷ୍ଟ ଗାର୍ଡ ଶରତଙ୍କ ସହ ଅନ୍ୟ ବନ କର୍ମଚାରୀ ସେଠାରେ ପହଂଚି ହାତୀ ଘଉଡାଇଥିଲେ । ହାତୀ ଘଉଡାଇବା ସମୟରେ ଜଙ୍ଗଲୀ ହାତୀ ବନ କର୍ମଚାରୀଙ୍କ ଆଡକୁ ମାଡ଼ି ଆସିଥିଲା । ଅନ୍ୟ କର୍ମଚାରୀ ଦୌଡ଼ି ପଳାଯାଇଥିବା ବେଳେ ଶରତ ତଳେ ପଡ଼ିଯାଇଥିଲେ । ହାତୀ ତାଙ୍କୁ ଦଳି ଦେଇଥିଲେ । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା । ବନ ବିଭାଗ ପକ୍ଷରୁ ଶରତଙ୍କ ମୃତଦେହକୁ ବ୍ୟବଚ୍ଛେଦ ପାଇଁ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଯାଇଛି । ଅନ୍ୟପକ୍ଷରେ ଶରତଙ୍କ ପରିବାର ଲୋକ କ୍ଷତିପୂରଣ ଦାବିରେ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟ ସମ୍ମୁଖରେ ଧାରଣା ଦେଇଛନ୍ତି । ୨୦ଲକ୍ଷ ଟଙ୍କା ସହାୟତା ରାଶି ସହ ପରିବାରର ଜଣଙ୍କୁ ଚାକିରି ଦେବାକୁ ସେମାନେ ଦାବି କରିଛନ୍ତି ।
