‘ମହାଦେବ ବେଟିଂ ଆପ୍’ ସହ ଜଡିତ ମନି ଲଣ୍ଡରିଂ ମାମଲା : ଅଭିନେତ୍ରୀ ଶ୍ରଦ୍ଧା କପୁରଙ୍କୁ ଇଡିର ସମନ
ମୁମ୍ଵାଇ : ଛତିଶଗଡର ‘ମହାଦେବ ବେଟିଂ ଆପ୍’ ସହ ଜଡିତ ମନି ଲଣ୍ଡରିଂ ମାମଲାରେ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ଅଭିନେତ୍ରୀ ଶ୍ରଦ୍ଧା କପୁରଙ୍କୁ ଡକାଇଛନ୍ତି। ତାଙ୍କ ସହ ହାସ୍ୟ ଅଭିନେତା କପିଲ ଶର୍ମା, ଅଭିନେତ୍ରୀ ହୁମା କୁରେଶି ଏବଂ ହିନା ଖାନଙ୍କୁ ଡକାଯାଇ ବିଭିନ୍ନ ତାରିଖରେ ପଚରାଉଚରା ପାଇଁ ହାଜର ହେବାକୁ କୁହାଯାଇଛି। ଏହି ମାମଲାରେ ବଲିଉଡ ଅଭିନେତା ରଣବୀର କପୁରଙ୍କ ନିକଟକୁ ଇଡି ଡକାଇସାରିଛି । ଅକ୍ଟୋବର ୬ରେ ରାୟପୁରର ଇଡି କାର୍ଯ୍ୟାଳୟରେ ତାଙ୍କୁ ପଚରାଉଚରା କରିବାକୁ ନିର୍ଦ୍ଦେଶ ଦେଇଛନ୍ତି। ହେଲେ ଏଥିପାଇଁ ରଣବୀର ଦୁଇ ସପ୍ତାହ ସମୟ ମାଗିଛନ୍ତି।
ଇଡି ଅଧିକାରୀ କହିଛନ୍ତି ଯେ ନିକଟରେ ଅଭିନେତ୍ରୀ ଶ୍ରଦ୍ଧା କପୁରଙ୍କ ସମେତ ସମସ୍ତ ଚାରି କଳାକାରଙ୍କୁ ଡକାଯାଇ ବିଭିନ୍ନ ତାରିଖରେ ରାୟପୁର କାର୍ଯ୍ୟାଳୟରେ ହାଜର ହେବାକୁ ନିର୍ଦ୍ଦେଶ ଦିଆଯାଇଛି। ଇଡି PMLA ଅଧୀନରେ ସେଗୁଡିକର ସମସ୍ତ ବିବରଣୀକୁ ରେକର୍ଡ କରିବ ଏବଂ ଆପ୍ ନିର୍ମାତାମାନଙ୍କ ଦ୍ଵାରା କରାଯାଇଥିବା ଦେୟ ଏବଂ ଧନ ପ୍ରାପ୍ତି ପଦ୍ଧତି କ’ଣ ତାହା ଜାଣିବାକୁ ଚେଷ୍ଟା କରିବ ।
ଏହି କଳାକାରମାନେ ଏହି ମାମଲାରେ ଅଭିଯୁକ୍ତ ହେବେ ନାହିଁ ବୋଲି ବିଶ୍ୱାସ ରହିଛି। ହେଲେ ଜଣାପଡୁଛି ଯେ ଏହି କଳାକାରମାନେ ମହାଦେବ ବେଟିଂ ଆପ୍ର ପ୍ରଚାର କରିଥିଲେ । କିଛି ଆପ୍ ର ପ୍ରମୋଟରଙ୍କ ବିଦେଶୀ ବିବାହରେ ଅତିଥିମାନଙ୍କୁ ମନୋରଞ୍ଜନ କରିଥିଲେ। ଅଭିଯୋଗ ହୋଇଛି ଯେ ଏହି ସମସ୍ତ ଅଭିନେତା ବିପୁଳ ଟଙ୍କା ନେଇ ଆପ୍ର ଜୋରଦାର ପ୍ରମୋସନ କରିଥିଲେ। ଏହି ଆପ୍ ପୋକର, ବ୍ୟାଡମିଣ୍ଟନ୍, ଟେନିସ୍, କ୍ରିକେଟ୍ ଏବଂ କାର୍ଡ ସମେତ ବିଭିନ୍ନ ଲାଇଭ୍ ଗେମ୍ ଉପରେ ବେଆଇନ ବ୍ୟାଟିଂ ପାଇଁ ଏକ ଅନଲାଇନ୍ ପ୍ଲାଟଫର୍ମ ପ୍ରଦାନ କରୁଥିବା ଅଭିଯୋଗ ହୋଇଛି। ଏହି ଆପ୍ ପାକିସ୍ତାନ ସହ ଜଡିତ ଥିବା ସନ୍ଦେହ କରାଯାଉଛି।
