ରାଜ୍ୟରେ ଆରମ୍ଭ ହେବ ଡିଏନଏ ପ୍ରୋଫାଇଲିଂ, ବନ୍ଦ ହେବ ବାଘ ଶିକାର

ଭୁବନେଶ୍ୱର : ରାଜ୍ୟରେ ଆରମ୍ଭ ହେବାକୁ ଯାଉଛି ବାଘଙ୍କ ଡିଏନଏ ପ୍ରୋଫାଇଲିଂ । କଲରାପତରିଆ ଦେଖାଯାଉଥିବା ବିଭିନ୍ନ ଜଙ୍ଗଲକୁ ଚିହ୍ନଟ କରାଯିବ । ସଂପୃକ୍ତ ଅଞ୍ଚଳରେ ବାଘଙ୍କ ମଳ ଓ ରାମ୍ପୁଡା ଦାଗ ଚିହ୍ନଟ କରାଯିବ । ସଂଗୃହୀତ ନମୁନାକୁ ଓୟୁଏଟିର ସେଣ୍ଟର ଫର୍ ୱାଇଲ୍ଡ୍ ଲାଇଫ୍ ହଲକୁ ପଠାଯିବ । ସେଠାରେ ନମୁନାର ଡିଏନଏ ପ୍ରୋଫାଇଲିଂ ହେବ । ଜବତ ବାଘ ଛାଲ ଡିଏନଏ ସହ ସଂଗୃହୀତ ଡିଏନଏର ଯାଞ୍ଚ କରାଯିବ। ଫଳରେ ମିଳୁଥିବା ବାଘ ଛାଲ କେଉଁଠୁ ଆସୁଛି ବା ହତ୍ୟା ହୋଇଛି ତାହା ସ୍ପଷ୍ଟ ହେବ।

ସେପଟେ ସୁନାବେଡ଼ା ଜଙ୍ଗଲ ହେବ ବାଘ ଅଭୟାରଣ୍ୟ । ଶିମିଳିପାଳ, ସାତକୋଶିଆ ପରେ ସୁନାବେଡ଼ାକୁ ବାଘ ଅଭୟାରଣ୍ୟ ମାନ୍ୟତା ପାଇଁ ଏନଟିସିଏ ମାନକ ପୂରଣ କାର୍ଯ୍ୟ ଜାରି ରହିଛି । ଅନ୍ୟପକ୍ଷରେ ଦେଶରେ ବାଘ ସଂଖ୍ୟା ବଢୁଥିବା ବେଳେ ରାଜ୍ୟରେ ସଂଖ୍ୟା କମି କମି ଯାଉଛି । ଏହା ପୂର୍ବରୁ ୨୦୧୮ ଓ ୨୦୧୪ରେ ହୋଇଥିବା ଗଣନାରେ ବାଘଙ୍କ ସଂଖ୍ୟା ଥିଲା ମାତ୍ର ୨୮। ଏଥିପାଇଁ ଏଥର ବାଘ ଗଣନାରେ ପୂର୍ବଥର ଭଳି ୧୫ ବଦଳରେ ଅଧିକ ବନଖଣ୍ଡକୁ ସାମିଲ କରାଯିବ ବୋଲି ପିସିସିଏଫ୍ ସୂଚନା ଦେଇଛନ୍ତି। ସେହିପରି ଶିମିଳିପାଳର ମେଲାନିଷ୍ଚିକ ବା କଳାବାଘ ହେଉ କି ନନ୍ଦନକାନନର ଧଳାବାଘ, ସାରା ବିଶ୍ୱରେ ଓଡିଶାକୁ ନୂଆ ପରିଚୟ ଦେଇଛି । ତେବେ ୨୦୧୨ରୁ ୨୦୨୦ ମଧ୍ୟରେ ରାଜ୍ୟରୁ ପ୍ରାୟ ୨୫୦ଟି ବାଘ ବିଶେଷକରି କଲରାପତରିଆ ବାଘ ଛାଲ ଜବତ ଘଟଣା ବନ ବିଭାଗର ଚିନ୍ତା ବଢାଇଛି । ଏସବୁ ଭିତରେ ରାଜ୍ୟରେ ଆଉ ୩ଟି ଜଙ୍ଗଲକୁ ମିଳିବ ଅଭୟାରଣ୍ୟ ମାନ୍ୟତା । ଆଠମଲ୍ଲିକ ଉତ୍ତର, ଖୋର୍ଦ୍ଧାର ବର୍ବରା ଜଙ୍ଗଲ ଏବଂ ବଲାଙ୍ଗିର ଓ ବରଗଡ଼ ସୀମାନ୍ତ ଜଙ୍ଗଲକୁ ନେଇ ଅଭୟାରଣ୍ୟ ଯୋଜନା କରାଯାଇଛି ।