ବାଲେଶ୍ୱର : ସ୍କୁଟିକୁ ଧକ୍କା ଦେଇ ଜଳିଗଲା କଣ୍ଟେନର, ଜଣେ ମୃତ
ବାଲେଶ୍ୱର : ବାଲେଶ୍ୱର ଜିଲା ୬୦ନଂ. ଜାତୀୟ ରାଜପଥ ଜଳେଶ୍ୱର ଥାନା ଅନ୍ତର୍ଗତ ଜମାଳପୁର ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା । ମାଲ ବୋଝେଇ କଣ୍ଟେନର ଓ ସ୍କୁଟି ମଧ୍ୟରେ ମୁହାଁମୁହିଁ ଧକ୍କା । ଏଥିରେ ସ୍କୁଟି ଚାଳକ ମୃତ୍ୟୁ ହୋଇଥିବା ବେଳେ କଣ୍ଟେନରଟି ଜଳି ଯାଇଥିଲା । ମୃତକ ଜଣକ ହେଲେ ଜଳେଶ୍ୱର ନୂଆବଜାର ଅଞ୍ଚଳର ଲକ୍ଷ୍ମୀ ଧର ପାତ୍ର । ଘଟଣା ସ୍ଥଳରେ ଜଳେଶ୍ୱର ପୋଲିସ ମୃତଦେହ ଜବତ କରି ତଦନ୍ତ ଜାରି ରଖିଛି । ସେହିପରି କଣ୍ଟେନର ଟିରେ ନିଆଁ ଲାଗି ଲକ୍ଷାଧିକ ଟଙ୍କାର ସାମଗ୍ରୀ ପୋଡି ନଷ୍ଟ ହୋଇଥିବାର ଜଣାପଡିଛି ।
ସୂଚନା ଯେ, ଶୁକ୍ରବାର ବିଳମ୍ବିତ ରାତିରେ ମାଲ ବୋଝେଇ କଣ୍ଟେନରଟି କଲିକତା ଆଡୁ ବାଲେଶ୍ୱର ଅଭିମୁଖେ ଯିବା ସମୟରେ ସ୍କୁଟି ସହ ଧକ୍କା ହୋଇଥିଲା । ଘଟଣାସ୍ଥଳରେ ସ୍କୁଟି ଚାଳକଙ୍କ ମୃତ୍ୟୁ ଘଟିଥିଲା । ଅନ୍ୟପକ୍ଷରେ ସ୍କୁଟି ଓ କଣ୍ଟେନରଟି ଧକ୍କା ହେବା ଫଳରେ କୌଣସି କାରଣବଶତଃ କଣ୍ଟେନରରେ ନିଆଁ ଲାଗିଯାଇଥିଲା । ଖବରପାଇ ଜଳେଶ୍ୱର ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ କାବୁ କରିଥିଲେ । ମୃତ୍ୟୁ ହୋଇଥିବା ଲୋକର ପରିଚୟ ମିଳି ପାରିନଥିବା ବେଳେ ଜଳେଶ୍ୱର ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଜାରି ରଖିଛି । ଏହି ଅଗ୍ନିକାଣ୍ଡରେ ଲକ୍ଷାଧିକ ଟଙ୍କାର କୁରକୁରେ ପୋଡି ନଷ୍ଟ ହୋଇଥିଲା ବେଳେ ସ୍କୁଟି ଚାଳକର ମୃତ୍ୟୁ ହୋଇଛି । ଅନ୍ୟପକ୍ଷରେ କଣ୍ଟେନରରେ ଥିବା କୁରକୁରେକୁ ଲୋକମାନେ ବୋହି ନେଇଥିବାର ମଧ୍ୟ ଦେଖିବାକୁ ମିଳିଛି।
