ଅପେକ୍ଷାର ଅନ୍ତ ! ଆଣ୍ଡ୍ରଏଡ୍ ୟୁଜରଙ୍କ ପାଇଁ ଉପଲବ୍ଧ ହେଲା ଚାଟ୍ ଜିପିଟି ଆପ୍
ନୂଆଦିଲ୍ଲୀ : ଶେଷରେ ଅପେକ୍ଷାର ଅନ୍ତ ଘଟିଛି । ଚାଟ୍ ଜିପିଟିର ଆପ୍ ଏବେ ଆଣ୍ଡ୍ରଏଡ୍ ୟୁଜରଙ୍କ ପାଇଁ ଉପଲବ୍ଧ ହୋଇଛି । ଏହା ପୂର୍ବରୁ ଚାଟ୍ ଜିପିଟିର ଆଇଓଏସ୍ ଆପ୍ ପ୍ରାୟ ଦୁଇମାସ ତଳେ ଲଞ୍ଚ କରାଯାଇଥିଲା । ବିଶ୍ୱରେ ଲୋକପ୍ରିୟ ହୋଇଥିବା ‘ଓପନ୍ଏଆଇ’ର ଚାଟ୍ ଜିପିଟି ଆଣ୍ଡ୍ରଏଡ୍ ଆପ୍ ଭାରତ ସହ ଆମେରିକା, ବାଂଲାଦେଶ ଏବଂ ବ୍ରାଜିଲରେ ଡାଉନଲୋଡ୍ ପାଇଁ ଉପଲବ୍ଧ ହୋଇଛି ।
ଉଲ୍ଲେଖଯୋଗ୍ୟ ଯେ, ସାମ୍ ଅଲ୍ଟମ୍ୟାନଙ୍କ ମାଲିକାନାରେ ଥିବା କମ୍ପାନୀ ‘ଓପନ୍ ଏଆଇ’ ନିକଟରେ ଘୋଷଣା କରିଥିଲା ଯେ ଚାଟ୍ ଜିପିଟିର ଆଣ୍ଡ୍ରଏଡ୍ ଭର୍ସନ୍ ଜୁଲାଇ ୨୦୨୩ର ଶେଷ ସପ୍ତାହରେ ଉପଲବ୍ଧ ହେବ | କିନ୍ତୁ ବଡ଼ କଥା ହେଉଛି ଚାଟ୍ ଜିପିଟିର ଆଣ୍ଡ୍ରଏଡ୍ ଆପ୍ ଏପରି ଏକ ସମୟରେ ଲଞ୍ଚ୍ କରାଯାଇଛି ଯେତେବେଳେ ଚାଟ୍ ଜିପିଟିର ଟ୍ରାଫିକ୍ କମିବାରେ ଲାଗିଛି ଏବଂ ଏହାର ରେସପନ୍ସ ରେଟ୍ ମଧ୍ୟ ମନ୍ଥର ହୋଇଯାଇଛି।
ଆଗାମୀ ଦିନରେ ଆଣ୍ଡ୍ରଏଡ୍ ଆପକୁ ବିଭିନ୍ନ ବଜାରରେ ଉପଲବ୍ଧ କରିବାକୁ ଓପନ୍ଏଆଇ ଯୋଜନା କରିଛି | ପୂର୍ବରୁ ଏହି ଆପ୍ କେବଳ iOS ବ୍ୟବହାରକାରୀଙ୍କ ପାଇଁ ଉପଲବ୍ଧ ଥିଲା | କିନ୍ତୁ ବର୍ତ୍ତମାନ ଲକ୍ଷ ଲକ୍ଷ ଆଣ୍ଡ୍ରଏଡ୍ ୟୁଜର ମଧ୍ୟ ନିଜ ଫୋନରେ ଚାଟ୍ ଜିପିଟି ଆପ୍ ବ୍ୟବହାର କରିପାରିବେ। ଏହି ଆପ୍ ମାଗଣା ଅଟେ। ଏହାଛଡ଼ା ଏହା ୟୁଜରଙ୍କ ହିଷ୍ଟ୍ରିକୁ ଅଲଗା ଅଲଗା ଡିଭାଇସ୍ ମଧ୍ୟରେ ସିଙ୍କ୍ କରିପାରିବ।
ସର୍ବପ୍ରଥମେ ଚାଟ୍ ଜିପିଟି ଏଆଇ ଟୁଲକୁ ନଭେମ୍ବର ୨୦୨୨ରେ ଲଞ୍ଚ କରାଯାଇଥିଲା । ଏହା ଏକ ବୃହତ ଲାଙ୍ଗୁଏଜ୍ ମଡେଲ-ଆଧାରିତ ଚାଟବଟ୍ ଯାହା ନିଜ ସାମର୍ଥ୍ୟ ସହିତ ସମଗ୍ର ବିଶ୍ୱରେ ଚହଳ ସୃଷ୍ଟି କରିଥିଲା । ଏହି ଟୁଲ୍ ମଣିଷ ପରି ଉତ୍ତର ଦେଇଥାଏ ଏବଂ ଏହାର ଅଭୂତପୂର୍ବ ସଫଳତା ଯୋଗୁଁ ଏହାର ରିସ୍କ ଉପରେ ମଧ୍ୟ ଅନେକ ପ୍ରଶ୍ନ ଉଠିଛି ।
ଲଞ୍ଚ୍ ହେବାର ୪ ମାସ ମଧ୍ୟରେ ୧୦୦ ମିଲିୟନ୍ ୟୁଜର ଛୁଇଁବାରେ ଚାଟ୍ ଜିପିଟି ଦ୍ରୁତତମ ଇଣ୍ଟରନେଟ୍ ଆପ୍ ହୋଇଥିଲା । ଏହି ଚାଟବଟ୍ ଜିପିଟି-୩.୫ ଏବଂ ଜିପିଟି-୪ ଉପରେ ପ୍ରସ୍ତୁତ କରାଯାଇଛି | ସମ୍ପ୍ରତି ଜିପିଟି-୪ କେବଳ ଚାଟ୍ ଜିପିଟି ପ୍ଲସ୍ ସଦସ୍ୟମାନଙ୍କ ପାଇଁ ଉପଲବ୍ଧ । ଚାଟ୍ ଜିପିଟି ପ୍ଲସ୍ ସଦସ୍ୟମାନଙ୍କୁ ଭାରତରେ ମାସିକ ସବସ୍କ୍ରିପସନ୍ ପାଇଁ ୧,୯୯୯ ଟଙ୍କା ଦେବାକୁ ପଡିବ ।
