ଚକ ପୋଡ଼ାଡ଼ିହା ୱାର୍ଡ଼ସଭ୍ୟ ଉପ-ନିର୍ବାଚନ; ବିଜେଡ଼ି ସମର୍ଥିତ ପ୍ରାର୍ଥୀ ବିଜୟୀ
ରୂପସା : ବାଲେଶ୍ୱର ସଦର ବ୍ଲକର ରୂପସା ସାମିଲ ହାସନପୁର ପଞ୍ଚାୟତ ଅନ୍ତର୍ଗତ ଚକ ପୋଡ଼ାଡ଼ିହା ୱାର୍ଡ଼ରେ ଅନୁଷ୍ଠିତ ୱାର୍ଡ଼ସଭ୍ୟ ଉପ-ନିର୍ବାଚନର ପଳାଫଳ ଶୁକ୍ରବାର ଘୋଷଣା କରାଯାଇଛି । ଫଳାଫଳ ଅନୁଯାୟୀ ବିଜେଡ଼ି ସମର୍ଥିତ ପ୍ରାର୍ଥୀ ବିଜୟ ଗୋଚ୍ଛାୟତ ତାଙ୍କର ନିକଟତମ ପ୍ରତିଦ୍ୱନ୍ଦ୍ୱୀ ଭାଜପା ସମର୍ଥିତ ପ୍ରାର୍ଥୀ ଅମର ନାଥ ଗୋଚ୍ଛାୟତଙ୍କୁ ୬୩ ଖଣ୍ଡ ଭୋଟରେ ପରାସ୍ତ କରି ବିଜୟଲାଭ କରିଛନ୍ତି ।
ସୂଚନା ଯେ, ଗତ ୯ ତାରିଖରେ ଏହି ଉପ-ନିର୍ବାଚନ ହୋଇଥିଲା । ମୋଟ୍ ୧୪୫ ଜଣ ଭୋଟର ମତଦାନ କରିଥିଲେ । ବିଜୟ ଗୋଚ୍ଛାୟତ ୧୦୩ ଖଣ୍ଡ ଭୋଟ ପାଇଥିବା ବେଳେ ଅମରନାଥ ଗୋଚ୍ଛାୟତଙ୍କୁ ମାତ୍ର ୪୦ଖଣ୍ଡ ଭୋଟ ମିଳିଥିଲା । ୨ଖଣ୍ଡ ଭୋଟ ନାକଚ ହୋଇଥିଲା । ବ୍ଲକ କାର୍ଯ୍ୟାଳୟରେ ଶୁକ୍ରବାର ଭୋଟ ଗଣତି ସରିବା ପରେ ନିର୍ବାଚନ ଅଧିକାରୀ ତଥା ଏବିଡ଼ିଓ ଅଶୋକ ଦାସ ଏହି ଫଳାଫଳ ଘୋଷଣା କରିଥିଲେ ।
ପ୍ରକାଶ ଥାଉକି ଏହି ୱାର୍ଡ଼ର ପୂର୍ବତନ ୱାର୍ଡ଼ସଭ୍ୟ ବନ୍ଧନ ଗୋଚ୍ଛାୟତ ଜିଆରଏସ୍ ଭାବେ ଚାକିରି ପାଇବା ପରେ ଏହି ପଦରୁ ଇସ୍ତଫା ଦେଇଥିଲେ । ଫଳରେ ତାଙ୍କ ସ୍ଥାନ ପୂରଣ ଲାଗି ଏହି ଉପ-ନିର୍ବାଚନ ନିମନ୍ତେ ସରକାରଙ୍କ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିଲା ।
