ଟ୍ରକକୁ ପଛପଟୁ ପିଟିଲା କାର୍ : ଗୋଟିଏ ପରିବାରର ୬ ମୃତ
ବିଶାଖାପାଟନାମ୍: ଆନ୍ଧ୍ରପ୍ରଦେଶରେ ଭୟଙ୍କର ସଡ଼କ ଦୁର୍ଘଟଣା । ପୂର୍ବ ଗୋଦାବରୀ ଜିଲ୍ଲାର ଜାତୀୟ ରାଜପଥ ଏକ କାର୍ ଦୁର୍ଘଟଣା ଗ୍ରସ୍ତ ହୋଇଛି । ଟ୍ରକକୁ କାର୍ ପଛପଟୁ ପିଟିବାରୁ ୬ଜଣଙ୍କ ମୃତ୍ୟୁ ହୋଇଛି । ଜିଲ୍ଲା ପୋଲିସ ଆରକ୍ଷୀ ଅଧିକ୍ଷକଙ୍କ କହିବା ଅନୁଯାୟୀ, ଏହି ଦୁର୍ଘଟଣା ନଲ୍ଲାଚରଲା ଗାଁ ନିକଟରେ ହୋଇଛି । କାର୍ଟି ନିୟନ୍ତ୍ରଣ ହରାଇ ରାସ୍ତା ପାର୍ଶ୍ବରେ ଛିଡ଼ା ହୋଇଥିବା ଏକ ଲରୀକୁ ଧକ୍କା ଦେଇଥିଲା ।
ପୋଲିସର କହିବା ମୁତାବକ, ମୃତ୍ୟୁ ହୋଇଥିବା ୬ଜଣ ଗୋଟିଏ ପରିବାରର । ମୃତକଙ୍କ ମଧ୍ୟରେ ୨ଜଣ ମହିଳା ଓ ଗୋଟିଏ ଛୋଟ ପିଲା ରହିଛନ୍ତି । କାରରେ ବସିଥିବା ଯାତ୍ରୀ ବିଜୟଓ୍ବାଡାରୁ ରାଜମହେନ୍ଦ୍ରପୁରମ ଯାଉଥିଲା । ପୋଲିସ ସମସ୍ତ ମୃତଦେହକୁ ଜବତ କରି ପୋଷ୍ଟମର୍ଟମ ପାଇଁ ପଠାଇଥିବା ବେଳେ କେଉଁ କାରଣକୁ ଦୁର୍ଘଟଣା ହେଲା ତାହାର ତଦନ୍ତ ଆରମ୍ଭ କରିଛି ।
