ବ୍ୟବସାୟୀଙ୍କୁ ଅପହରଣ ଘଟଣା, ୪ ଗିରଫ
ଭୁବନେଶ୍ୱର: ବଡ଼ବିଲର ଜଣେ ଖଣି ବ୍ୟବସାୟୀ ଓ ତାଙ୍କ ସହଯୋଗୀଙ୍କୁ ଅପହରଣ ଘଟଣାରେ ୱେବ୍ ଚ୍ୟାନେଲର ଜଣେ ମହିଳା ସାମ୍ବାଦିକାଙ୍କ ସମେତ ୪ ଜଣଙ୍କୁ ଗିରଫ କଲା ନନ୍ଦନକାନନ ଥାନା ପୋଲିସ। ସେମାନଙ୍କ ନିକଟରୁ ଏକ ବନ୍ଧୁକ ମଧ୍ୟ ଜବତ ହୋଇଛି । ଅଭିଯୁକ୍ତମାନେ ବ୍ୟବସାୟ ନାଁରେ ଡକାଇ ଅପହରଣ ସହ ନିସ୍ତୁକ ମାଡ଼ ମାରିଥିବା ନେଇ ଜଣାପଡିଛି ।
ସୂଚନା ଯେ, ଗତ ଅଗଷ୍ଟ ୫ ତାରିଖରେ ଖଣି ଲିଜ କରାଇ ଦେବାକୁ କହି ବଡ଼ବିଲର ଜଣେ ବ୍ୟବସାୟୀ ଓ କେନ୍ଦ୍ରାପଡ଼ାର ତାଙ୍କର ଜଣେ ସହଯୋଗୀଙ୍କୁ ଅଭିଯୁକ୍ତମାନେ ଭୁବନେଶ୍ୱର ଡାକିଥିଲେ। ଏହାପରେ ସେମାନେ ଉଭୟଙ୍କୁ ରଘୁନାଥପୁରରେ ରଖିବା ପରେ ସେମାନଙ୍କ ପରିବାର ଲୋକଙ୍କୁ ୧୦ଲକ୍ଷ ଟଙ୍କା ମାଗି ଥିଲେ। ରଘୁନାଥପୁର ଅଫିସରେ ବ୍ୟବସାୟୀଙ୍କୁ ୨ଦିନ ଧରି ରଖି ଅକଥନୀୟ ନିର୍ଯାତନା ଦେଇଥିଲେ ଅପହରଣକାରୀ । ଟଙ୍କା ନମିଳିବା ପର୍ଯ୍ୟନ୍ତ ଅପହରଣକାରୀମାନେ ଉଭୟଙ୍କୁ ଅକଥନୀୟ ନିର୍ଯାତନା ଦେବା ସହ ମାଡ଼ ମାରିବା ଓ ସିଗାରେଟ୍ ଚେଙ୍କ ଦେଇଥିଲେ ବୋଲି ଅଭିଯୋଗ ହୋଇଛି। ବ୍ୟବସାୟୀଙ୍କ ପରିବାର ଲୋକ ଅଭିଯୁକ୍ତଙ୍କୁ ୫୦ ହଜାର ଟଙ୍କା ଦେଇଥିଲେ । ପରେ ଅପହରଣକାରୀମାନେ ଉଭୟଙ୍କୁ ଛାଡ଼ି ଦେଇଥିଲେ। ଘଟଣାକୁ ନେଇ ନନ୍ଦନକାନନ ଥାନାରେ ସମ୍ପୃକ୍ତ ବ୍ୟବସାୟୀଙ୍କ ସହଯୋଗୀ ଅଭିଯୋଗ କରିଥିଲେ। ଅଭିଯୋଗ ଆଧାରରେ ପୋଲିସ ମାମଲାରେ ୪ ଜଣଙ୍କୁ ଗିରଫ କରି ତଦନ୍ତ ଚଳାଇଛି। ଘଟଣାର ମୁଖ୍ୟ ଅଭିଯୁକ୍ତ ଫେରାର ଥିବା ଜଣାପଡ଼ିଛି।
