ଶ୍ରୀଜୀଉଙ୍କୁ ଦର୍ଶନ କଲେ ବଲିଉଡ଼ ଷ୍ଟାର ଗୋବିନ୍ଦା
ପୁରୀ : ବଲିଉଡ଼ର ଅଭିନେତା ଗୋବିନ୍ଦା ଆଜି ପୁରୀ ଆସି ଶ୍ରୀମନ୍ଦିରରେ ଶ୍ରୀଜୀଉମାନଙ୍କୁ ଦର୍ଶନ କରିଛନ୍ତି । ଶ୍ରୀମନ୍ଦିରରେ ରତ୍ନସିଂହାସନ ଉପରେ ଚତୁର୍ଦ୍ଧାମୂର୍ତିଙ୍କୁ ଦର୍ଶନ କରି ଭାବବିହ୍ୱଳ ହେବା ସହ ଛଳ ଛଳ ଆଖିରେ ଦୁଇହାତ ଟେକି ଜୟ ଜଗନ୍ନାଥ ଉଚ୍ଚାରଣ କରିଥିଲେ । ସେ ଜଗନ୍ନାଥଙ୍କ ପରମଭକ୍ତ ବୋଲି ଗଣମାଧ୍ୟମ ପ୍ରତିନିଧିଙ୍କୁ ସୂଚନା ଦେଇଥିଲେ । ମନ୍ଦିରରେ ମା ବିମଳା, ମା ଲକ୍ଷ୍ମୀ, ଶ୍ରୀ ଗଣେଶ, ମା ମଙ୍ଗଳାଙ୍କ ସମେତ ପାଶ୍ୱର୍ ଦେବାଦେବୀଙ୍କୁ ଦର୍ଶନ କରିଥିଲେ ।
କରୋନା କଟକଣା ଭିତରେ ଏହି ଦର୍ଶନ ଶୃଙ୍ଖଳିତ ହୋଇଛି ବୋଲି ମତ ଦେଇଥିଲେ । ପୂର୍ବରୁ ମଧ୍ୟ ଦୁଇଥର ଶ୍ରୀମନ୍ଦିରରେ ଶ୍ରୀଜୀଉଙ୍କ ଦର୍ଶନ କରିଥିଲେ । ତାଙ୍କ ସହ ଭିତରଚ୍ଛ ମଧୁସୂଦନ ମହାପାତ୍ର, ମହାବୀର ପ୍ରତିହାରୀ, ଶ୍ୟାମଶୁନ୍ଦର ମହାପାତ୍ର ପ୍ରମୁଖ ଉପସ୍ଥିତ ଥିଲେ । ପୋଲିସ କଡ଼ା ସୁରକ୍ଷା ମଧ୍ୟରେ ସିଂହଦ୍ୱାର ଦେଇ ପ୍ରବେଶ କରିଥିବାବେଳେ ଉତରଦ୍ୱାର ଦେଇ ପ୍ରସ୍ଥାନ କରିଥିଲେ ।
