ନବରଙ୍ଗପୁର ପୌରପରିଷଦ ଅଧ୍ୟକ୍ଷ ଭାବେ ବିଜେପି ପ୍ରାର୍ଥୀ ବିଜୟୀ
ନବରଙ୍ଗପୁର : ନବରଙ୍ଗପୁର ପୌରପରିଷଦ ଅଧ୍ୟକ୍ଷ ଭାବେ ବିଜେପି ପ୍ରାର୍ଥୀ କୁନୁ ନାୟକ ୨ ହଜାର ଭୋଟରେ ବିଜୟୀ ହୋଇଛନ୍ତି । କୁନୁ ନାୟକ ତାଙ୍କ ନିକଟତମ ପ୍ରତିଦ୍ବନ୍ଦୀ ବିଜେଡି ର ଭୀମ ହରିଜନ ଙ୍କୁ ୨ ହଜାର ଭୋଟରେ ପରାଜିତ କରିଛନ୍ତି ।
ନବରଙ୍ଗପୁର ପୌର ପରିଷଦରେ ୨୪୭୮୫ ଭୋଟରଙ୍କ ମଧ୍ୟରୁ ୧୭୨୧୩ ଭୋଟ ପୋଲିଂ ହୋଇଥିଲା । ସେଥିମଧ୍ୟରୁ ବିଜେପି ପ୍ରାର୍ଥୀ କୁନୁ ନାୟକ ୮୯୪୪ ଖଣ୍ଡ ଭୋଟ ପାଇଥିବା ବେଳେ ବିଜେଡି ପ୍ରାର୍ଥୀ ଭୀମ ହରିଜନ ୬୯୪୪ ଖଣ୍ଡ ଭୋଟ ପାଇଛନ୍ତି । ସେହିପରି କଂଗ୍ରେସ ପ୍ରାର୍ଥୀ ନିଲମ ହରିଜନ ୮୨୯ ଖଣ୍ଡ ଭୋଟ ଓ ସ୍ୱାଧୀନ ପ୍ରାର୍ଥୀ ସାଗର ନାୟକ ୨୮୧ ଖଣ୍ଡ ଭୋଟ ପାଇଛନ୍ତି । ନୋଟାରେ ୨୧୬ ଖଣ୍ଡ ଭୋଟ ଯାଇଛି। ଅନ୍ୟପକ୍ଷରେ ନବରଙ୍ଗପୁର ପୋୖର ପରିଷଦର ୧୭ ଟି ୱାର୍ଡ ମଧ୍ୟରୁ ବିଜେପିର ୬, ବିଜେଡିର ୯ ଜଣ କାଉନସିଲର ବିଜୟୀ ହୋଇଥିବା ବେଳେ ୨ଜଣ ସ୍ୱାଧୀନ ପ୍ରାର୍ଥୀ ବିଜୟୀ ହୋଇଛନ୍ତି। କଂଗ୍ରେସ କିନ୍ତୁ ଖାତା ଖୋଲି ପାରିନାହିଁ। କୁନୁ ନାୟକ ବିଜୟୀ ହେବା ପରେ ଅଧ୍ୟକ୍ଷ କୁନୁ ନାୟକ ପୋୖର ପରିଷଦର ବିକାଶ କରାଯିବ ବୋଲି କହିଛନ୍ତି।
