ଏସିଆ କପ-୨୦୨୩ରେ ଏହି ୧୫ ଖେଳାଳିଙ୍କୁ ମିଳିବ ଟିମ୍ ଇଣ୍ଡିଆରେ ସ୍ଥାନ! ବାଦ୍ ପଡିବେ ସୂର୍ଯ୍ୟକୁମାରଙ୍କ ସମେତ ଅନେକ ବଡ଼ ଖେଳାଳି
ନୂଆଦିଲ୍ଲୀ : ଏସୀୟା କ୍ରିକେଟର ମହାକୁମ୍ବ ଅର୍ଥାତ୍ ଏସିଆ କପ୍ ୩୦ ଅଗଷ୍ଟ ୨୦୨୩ ରୁ ଆରମ୍ଭ ହେବ । ଏହି ଟୁର୍ଣ୍ଣାମେଣ୍ଟର ସମସ୍ତ ମ୍ୟାଚ୍ ପାକିସ୍ତାନ ଓ ଶ୍ରୀଲଙ୍କାରେ ଖେଳାଯିବ । ୨ ସେପ୍ଟେମ୍ବରରେ ଭାରତ ଓ ପାକିସ୍ତାନର ଦଳ ମୁହାଁମୁହିଁ ହେବେ । ୨୦୨୩ ଏସିଆ କପର କାର୍ଯ୍ୟସୂଚୀ ଘୋଷଣା କରାଯାଇଛି । ତେବେ ବିସିସିଆଇ ବର୍ତ୍ତମାନ ପର୍ଯ୍ୟନ୍ତ ଏହି ଟୁର୍ଣ୍ଣାମେଣ୍ଟ ପାଇଁ ଟିମ୍ ଇଣ୍ଡିଆ ଘୋଷଣା କରିନାହିଁ । ଏହା ପୂର୍ବରୁ ଜାଣନ୍ତୁ ଏହି ଟୁର୍ଣ୍ଣାମେଣ୍ଟ ପାଇଁ ଭାରତର ୧୫ ସଦସ୍ୟ ବିଶିଷ୍ଟ ଦଳ କିପରି ହୋଇପାରେ ।
ଏସିଆ କପ୍ ଆରମ୍ଭ ପୂର୍ବରୁ ଭାରତର ପ୍ରମୁଖ ଖେଳାଳିମାନେ ଫିଟ୍ ହେବେ ବୋଲି ଅନେକ ରିପୋର୍ଟରେ ଦର୍ଶାଯାଇଛି । ଏହି କାରଣରୁ ବିସିସିଆଇ ଟୁର୍ଣ୍ଣାମେଣ୍ଟ ପାଇଁ ଦଳ ଘୋଷଣା କରିନାହିଁ । ଏହି ଟୁର୍ଣ୍ଣାମେଣ୍ଟରେ କେ.ଏଲ୍ ରାହୁଲ, ଶ୍ରେୟସ୍ ଆୟର ଓ ଜସପ୍ରୀତ ବୁମ୍ରାଙ୍କୁ ସମସ୍ତେ ଦେଖିବାକୁ ପାଇବେ ବୋଲି ବିଶ୍ୱାସ କରାଯାଏ । ଏହି କାରଣରୁ, ଆମେ ଏସିଆ କପ୍ ପାଇଁ ସମ୍ଭାବ୍ୟ ଦଳରେ କେ.ଏଲ୍ ରାହୁଲ, ଶ୍ରେୟସ୍ ଆୟର ଓ ଜସପ୍ରୀତ ବୁମ୍ରାଙ୍କୁ ଅନ୍ତର୍ଭୁକ୍ତ କରିଛୁ । ଏହା ବ୍ୟତୀତ ସୂର୍ଯ୍ୟକୁମାର ଯାଦବଙ୍କୁ ଦଳରେ ସ୍ଥାନ ମିଳିବନାହିଁ । ଏସିଆ କପ୍ରେ କେ.ଏଲ୍ ରାହୁଲ ୱିକେଟ୍ କିପର ଭାବରେ ମଧ୍ୟମ କ୍ରମରେ ଖେଳୁଥିବା ଦେଖିବାକୁ ମିଳିବ । ଏହା ବ୍ୟତୀତ ସଞ୍ଜୁ ସାମସନଙ୍କୁ ରିଜର୍ଭ ୱିକେଟ୍ କିପର ଭାବରେ ଦଳରେ ଅନ୍ତର୍ଭୁକ୍ତ କରାଯାଇପାରେ । ଅନ୍ୟପକ୍ଷରେ ଯଶସ୍ୱି ଜୌସୱାଲ, ରୁତୁରାଜ ଗାଇକୱାଡ ଓ ସୂର୍ଯ୍ୟକୁମାର ଯାଦବଙ୍କୁ ଏସିଆ କପ୍ ସ୍କ୍ୱାର୍ଡରେ ସ୍ଥାନ ପାଇବା କଷ୍ଟକର ।
କ୍ୟାପଟେନ ରୋହିତ ଶର୍ମା, ଶୁଭମାନ ଗିଲ, ବିରାଟ କୋହଲି, କେ.ଏଲ୍ ରାହୁଲ, ଶ୍ରେୟସ୍ ଆୟର ଓ ସଞ୍ଜୁ ସାମସନ ଏସିଆ କପ୍ ଦଳର ବ୍ୟାଟ୍ସମ୍ୟାନ୍ ହେବେ । ଯେଉଁଠାରେ ଅକ୍ଷର ପଟେଲ, ରବିନ୍ଦ୍ର ଜାଡେଜା ଓ ହାର୍ଦ୍ଦିକ ପାଣ୍ଡ୍ୟା ଅଲରାଉଣ୍ଡର ହେବେ । କୁଲଦୀପ ଯାଦବ ଓ ୟୁଜବେନ୍ଦ୍ର ଚହଲ ମଧ୍ୟ ସ୍ଥାନ ପାଇବେ । ଏହା ସହିତ ମହମ୍ମଦ ସିରାଜ, ଶାର୍ଦ୍ଦୁଲ ଠାକୁର, ଜସପ୍ରୀତ ବୁମ୍ରା, ମହମ୍ମଦ ଶାମି ଓ ଭୁବନେଶ୍ୱର କୁମାର ଦ୍ରୁତ ବୋଲର ଭାବରେ ଦଳରେ ସାମିଲ ହୋଇପାରନ୍ତି ।
ଭାରତର ସମ୍ଭାବ୍ୟ ୧୫ ଜଣିଆ ଦଳ :
ରୋହିତ ଶର୍ମା (ଅଧିନାୟକ), ଶୁଭମନ ଗିଲ, ବିରାଟ କୋହଲି, ଶ୍ରେୟସ୍ ଆୟର, କେ.ଏଲ୍ ରାହୁଲ (ୱିକେଟ୍ କିପର), ସଞ୍ଜୁ ସାମସନ (ରିଜର୍ଭ ୱିକେଟ୍ କିପର), ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡେଜା, କୁଲଦୀପ ଯାଦବ, ଯୁଜଭେନ୍ଦ୍ର ଚହଲ, ମହମ୍ମଦ ସିରାଜ, ଜସପ୍ରୀତ ବୁମ୍ରା, ଭୁବନେଶ୍ୱର କୁମାର, ମହମ୍ମଦ ଶାମି ଓ ଶାର୍ଦ୍ଦୁଲ ଠାକୁର ।
