ନେଟ୍ ବ୍ୟାଙ୍କିଙ୍ଗ୍ କରୁଛନ୍ତି କି ? ହୋଇଯାଆନ୍ତୁ ସାବଧାନ, ତଥ୍ୟ ଚୋରି କରିନେଉଛି ଏହି ଭାଇରସ୍
ଆଣ୍ଡ୍ରଏଡ୍ ଟ୍ରୋଜାନ୍ ଭାଇରସ୍ ରୂପରେ ଭାରତୀୟ ୟୁଜରଙ୍କ ପାଇଁ ଏବେ ଏକ ବଡ଼ ବିପଦ ମାଡ଼ି ଆସିଛି । ଏହି ଭାଇରସ୍ ୟୁଜରଙ୍କ ବ୍ୟାଙ୍କ ତଥ୍ୟ ଚୋରି କରିନେଉଛି | ସରକାରୀ ସାଇବର ସୁରକ୍ଷା ଏଜେନ୍ସି ସିଇଆରଟି-ଆଇଏନ ଏନେଇ ନେଟ୍ ବ୍ୟାଙ୍କ ୟୁଜରଙ୍କୁ ସତର୍କ କରାଇଛି । ସିଇଆରଟି-ଆଇଏନ କହିଛି ଯେ ‘ଏସଓଭିଏ’ ନାମକ ଆଣ୍ଡ୍ରଏଡ୍ ଟ୍ରୋଜାନ୍ କିଲଗିଂ ମାଧ୍ୟମରେ ୟୁଜରନେମ୍ ଓ ପାସୱାର୍ଡ ଆକ୍ସେସ୍ କରୁଛି | ପ୍ରଥମେ ଏହା ଆମେରିକା ରୁଷ ଏବଂ ସ୍ପେନର ୟୁଜରଙ୍କ ଉପରେ ଆକ୍ରମଣ କରୁଥିଲା । କିନ୍ତୁ ଜୁଲାଇ ୨୦୨୨ରେ ଏହା ଭାରତରେ ମଧ୍ୟ ଏଣ୍ଟ୍ରି କରିଛି | ସିଇଆରଟି-ଆଇଏନ ରିପୋର୍ଟରେ କୁହାଯାଇଛି ଯେ ଏହି ମାଲୱେୟାରର ସଦ୍ୟତମ ସଂସ୍କରଣ ଅରିଜିନାଲ୍ ଲୋଗୋ ସହିତ ନକଲି ଆଣ୍ଡ୍ରଏଡ୍ ଆପରେ ନିଜକୁ ଲୁଚାଇଥାଏ ଏବଂ ୟୁଜରମାନେ ଏ ବିଷୟରେ ଜାଣିପାରି ନଥାନ୍ତି | ଯେତେବେଳେ ୟୁଜର ନିଜ ଫୋନରେ ନେଟ୍ ବ୍ୟାଙ୍କିଙ୍ଗ୍ ବ୍ୟବହାର କରନ୍ତି, ଏହି ମାଲୱେର୍ ସେହି ସମୟରେ ୟୁଜରଙ୍କ ଲଗଇନ୍ ବିବରଣୀ କ୍ୟାପଚର କରି ଆକାଉଣ୍ଟକୁ ହ୍ୟାକ୍ କରେ | ୟୁଜର ମାନଙ୍କୁ ଏହି ବ୍ୟାଙ୍କିଙ୍ଗ୍ ଭାଇରସରୁ ସୁରକ୍ଷିତ ରଖିବା ପାଇଁ ସରକାର କିଛି ସତର୍କତା ମୂଳକ ସୂଚନା ସେୟାର କରିଛନ୍ତି। ଆସନ୍ତୁ ସେ ଉପରେ ନଜର ପକେଇବା..
ଯେକୌଣସି ପ୍ରକାରର ଆଣ୍ଡ୍ରଏଡ୍ ଭାଇରସ୍ କିମ୍ବା ମାଲୱେୟାରରୁ ସୁରକ୍ଷିତ ରହିବାର ପ୍ରଥମ ପଦକ୍ଷେପ ହେଉଛି ଗୁଗୁଲ୍ ପ୍ଲେ ଷ୍ଟୋରରୁ ଆପ୍ ଡାଉନଲୋଡ୍ କରିବା | ଏହା ହ୍ୟାକିଂର ବିପଦକୁ ୯୦% ପର୍ଯ୍ୟନ୍ତ ହ୍ରାସ କରିଥାଏ | ଯାଞ୍ଚ ହୋଇନଥିବା ଉତ୍ସରୁ କୌଣସି ଫାଇଲ କିମ୍ବା ଏପିକେ ଆପ୍ ଡାଉନଲୋଡ୍ କରନ୍ତୁ ନାହିଁ | ଏହାଛଡ଼ା ଗୁଗୁଲ୍ ପ୍ଲେ ଷ୍ଟୋରରୁ ଆପ୍ ଡାଉନଲୋଡ୍ ଏବଂ ଇନଷ୍ଟଲ୍ କରିବାବେଳେ ନିଶ୍ଚିତ ଭାବେ ଆପର ବିବରଣୀ ପଢ଼ନ୍ତୁ | ଆପ୍ କେତେଥର ଡାଉନଲୋଡ୍ ହୋଇଛି ତାହା ମଧ୍ୟ ଯାଞ୍ଚ୍ କରନ୍ତୁ | ଆପ୍ ବିଷୟରେ ଅଧିକ ଜାଣିବା ପାଇଁ ଆପଣ ୟୁଜର ରିଭ୍ୟୁ, କମେଣ୍ଟ ଏବଂ ଅତିରିକ୍ତ ସୂଚନା ବିଭାଗ ମଧ୍ୟ ଯାଞ୍ଚ୍ କରିପାରିବେ | ଆପ୍ ଇନଷ୍ଟଲ୍ କରିବା ବେଳେ ମନେରଖନ୍ତୁ ଯେ ସେହି ଆପ୍ ଆପଣଙ୍କ ଫୋନରେ କେଉଁ ସବୁ ଅନୁମତି ମାଗୁଛି | ଯଦି ଆପଣଙ୍କର ସାମାନ୍ୟ ସନ୍ଦେହ ଅଛି, ତେବେ ଆପକୁ ଅନ-ଇନଷ୍ଟଲ୍ କରିଦିଅନ୍ତୁ ।
ୟୁଜର ମାନଙ୍କୁ ସୁରକ୍ଷିତ ରଖିବା ପାଇଁ କମ୍ପାନୀଗୁଡିକ ସମୟ ସମୟରେ ଆଣ୍ଡ୍ରଏଡ୍ ଅପଡେଟ୍ ରୋଲ୍ ଆଉଟ୍ କରନ୍ତି | ଏହି ଅପଡେଟ୍ ଇନଷ୍ଟଲ୍ କରିବା ଜରୁରୀ | ଏପରି ଅପଡେଟ୍ ଏବଂ ପ୍ୟାଚ୍ ଆପଣଙ୍କ ଡିଭାଇସର ସୁରକ୍ଷାକୁ ମଜବୁତ କରେ |
ବେଳେ ବେଳେ ୟୁଜରମାନେ ହ୍ୟାକରଙ୍କ ନକଲି ଏମ୍ଏମ୍ଏସ୍ ଲିଙ୍କର ଶିକାର ହୁଅନ୍ତି | ଏହାକୁ ଏଡାଇବା ପାଇଁ ଆପଣଙ୍କୁ ପ୍ରକୃତ ଏବଂ ନକଲି ଏମ୍ଏମ୍ଏସ୍ ମଧ୍ୟରେ ଫରକ ଜାଣିବାକୁ ପଡିବ | ବ୍ୟାଙ୍କ୍ ପଠାଉଥିବା ଯେକୌଣସି ମେସେଜରେ ଆପଣ ପ୍ରେରକ ଆଇଡି (ବ୍ୟାଙ୍କର ସଂକ୍ଷିପ୍ତ ନାମ ସହିତ) ଦେଖିବେ | ଅନ୍ୟପକ୍ଷରେ ହ୍ୟାକରଙ୍କ ମେସେଜରେ ସାଧାରଣତଃ ନମ୍ବର ଥାଏ | ଯଦି ଆପଣଙ୍କର କୌଣସି ଏମ୍ଏମ୍ଏସ୍ ଉପରେ କୌଣସି ସନ୍ଦେହ ଅଛି, ତେବେ ସେହି ଲିଙ୍କରେ କ୍ଲିକ୍ ନକରିବା ଭଲ ହେବ |
