ପ୍ରତୀକ୍ଷାର ଅନ୍ତ ! ୩୯ ମାସ ପରେ ଟେଷ୍ଟରେ ଶତକ ମାରିଲେ କୋହଲି

ଅହମ୍ମଦାବାଦ : ପ୍ରତୀକ୍ଷାର ଅନ୍ତ । ଟେଷ୍ଟ କ୍ରିକେଟରେ ଶତକ ମରୁଡ଼ିର ଶେଷରେ ଅନ୍ତ ଘଟାଇଲେ ବିରାଟ କୋହଲି । ନରେନ୍ଦ୍ର ମୋଦୀ ଷ୍ଟାଡିୟମରେ ଚାଲିଥିବା ଅଷ୍ଟ୍ରେଲିଆ ବିପକ୍ଷ ଚତୁର୍ଥ ଟେଷ୍ଟରେ କୋହଲି କ୍ୟାରିୟରର ୨୮ତମ ଶତକ ହାସଲ କରିଛନ୍ତି । ପ୍ରାୟ ୩୯ ମାସ ପରେ ତିନି ଅଙ୍କ ଛୁଇଁଛନ୍ତି ଏହି ଷ୍ଟାର ବ୍ୟାଟ୍ସମ୍ୟାନ୍ । କୋହଲି ଶେଷଥର ନଭେମ୍ବର ୨୦୧୯ରେ ବାଂଲାଦେଶ ବିପକ୍ଷରେ ଏକ ଟେଷ୍ଟ ଶତକ ହାସଲ କରିଥିଲେ । ତା’ପରଠୁ ସେ ୪୨ଟି ଇନିଂସ୍ ଖେଳିଥିଲେ ମଧ୍ୟ ଶତକ ହାସଲ କରିପାରିନଥିଲେ। ଏହି ମ୍ୟାଚ୍ ପୂର୍ବରୁ ସେ ଚଳିତ ଟେଷ୍ଟ ସିରିଜରେ ସଂଘର୍ଷ କରୁଥିଲେ। ସେ ଗତ ୩ ଟେଷ୍ଟରେ ୫ଟି ଇନିଂସରୁ ହାରାହାରି ୨୨.୨୦ରେ ମାତ୍ର ୧୧୧ ରନ କରିପାରିଥିଲେ। କୋହଲିଙ୍କ ଏହା ଓଭରଅଲ୍ ୭୫ତମ ଶତକ । ସେ ଦିନିକିଆରେ ୪୬ଟି ଓ ଟି-୨୦ରେ ଗୋଟିଏ ଶତକ ହାସଲ କରିଛନ୍ତି ।

ଟେଷ୍ଟ କ୍ୟାରିୟର ୨୮ ତମ ଶତକ ସହ ସେ ୱେଷ୍ଟଇଣ୍ଡିଜ୍ ମହାନ କ୍ରିକେଟର ଗ୍ୟାରି ସୋବର୍ସ, ଅଷ୍ଟ୍ରେଲିଆର ଆଲାନ ବର୍ଡର ଏବଂ ଦକ୍ଷିଣ ଆଫ୍ରିକାର ଗ୍ରାମ୍ ସ୍ମିଥଙ୍କୁ ପଛରେ ପକାଇ ଦେଇଛନ୍ତି। ଏହି ତିନିଜଣ ପୂର୍ବତନ ଖେଳାଳି ଟେଷ୍ଟରେ ୨୭-୨୭ ଶତକ ହାସଲ କରିଛନ୍ତି । ଏଥି ସହିତ ସେ ଦକ୍ଷିଣ ଆଫ୍ରିକାର ପୂର୍ବତନ କ୍ରିକେଟର ହାସିମ ଆମଲା ଏବଂ ମାଇକେଲ କ୍ଲାର୍କଙ୍କୁ ସମକକ୍ଷ ହୋଇଛନ୍ତି। ଟେଷ୍ଟ କ୍ରିକେଟରେ ଉଭୟଙ୍କ ୨୮-୨୮ ଶତାବ୍ଦୀ ରହିଛି ।

ବିରାଟ କୋହଲି ୨୨ ନଭେମ୍ବର ୨୦୧୯ ରେ ଇଡେନ ଗାର୍ଡେନ୍ସରେ ବାଂଲାଦେଶ ବିପକ୍ଷରେ ଶେଷଥର ଟେଷ୍ଟ ଶତକ ମାରିଥିଲେ । ସେହି ମ୍ୟାଚରେ ସେ ୧୩୬ ରନର ଇନିଂସ୍ ଖେଳିଥିଲେ। ସେବେଠାରୁ ସେ ୪୩ଟି ଇନିଂସରେ ୬ ଅର୍ଦ୍ଧଶତକ ହାସଲ କରିଥିଲେ। ସେ ତିନିଥର ୭୦+ ସ୍କୋର କରିଥିଲେ। ଥରେ ୬୦+ ଏବଂ ଦୁଇଥର ୫୦+ ସ୍କୋର କରିଥିଲେ ମଧ୍ୟ ତିନି ଅଙ୍କ ଛୁଇଁ ପାରିନଥିଲେ । ଏହି ସମୟରେ ତାଙ୍କର ସର୍ବାଧିକ ସ୍କୋର ୭୯ ଥିଲା ଯାହା ସେ ୨୦୨୨ ମସିହାରେ କରିଥିଲେ ।