ଅଭିନେତା ଅରମାନ କୋହଲିଙ୍କୁ ଗିରଫ କଲା ଏନସିବି
ମୁମ୍ୱାଇ : ବଲିଉଡରେ ଡ୍ରଗ୍ସ କାରବାର ମାମଲାରେ ଗିରଫ ହେଲେ ଅଭିନେତା ଅରମାନ କୋହଲି । ଦୀର୍ଘସମୟ ପଚରା ଉଚରା ପରେ ଗିରଫ କଲା ଏନସିବି । ଶନିବାର ସନ୍ଧ୍ୟାରେ ଏନସିବି ଅରମାନଙ୍କ ଘରେ ରେଡ୍ କରିଥିଲେ । ଏହି ସମୟରେ ତାଙ୍କ ଘରୁ ଡ୍ରଗ୍ସ ଜବତ ହୋଇଥିଲା । ଡ୍ରଗ୍ସ ମାଫିଆ ଓ ଅରମାନଙ୍କୁ ସାମ୍ନା ସାମ୍ନି ବସାଇ ପଚରା ଉଚରା କରିବା ପରେ ସବୁକିଛି ସ୍ପଷ୍ଟ ହୋଇଥିଲା । କେବଳ ଏତିକି ନୁହେଁ, ବଲିଉଡର ଅନ୍ୟମାନେ ଏଥିରେ ଜଡିତ ଅଛନ୍ତି । ଆଗକୁ ଏହାର ଯାଞ୍ଚ କରାଯିବ । ତେଣୁ ଅଧିକ ଦିନ ରିମାଣ୍ଡରେ ନେବାକୁ କୋର୍ଟରେ ଆବେଦନ କରିବ ଏନସିବି । ଅରମାନ ଗିରଫ ହେବା ପରେ ଆଗାମୀ ଦିନରେ ଏନସିବି ପଞ୍ଝାରେ ଆଉ କିଏ ଗିରଫ ହୋଇପାରନ୍ତି ବୋଲି ଚର୍ଚ୍ଚା ହେଉଛି ।
ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ ଶନିବାର ମୁମ୍ବାଇରେ ଅରମାନ କୋହଲିଙ୍କ ବାସଭବନରେ ଚଢାଉ କରିଥିଲା । ଏହା ପରେ ଅରମାନଙ୍କୁ ଏନସିବି କାର୍ଯ୍ୟାଳୟକୁ ନିଆଯାଇଥିଲା । ସୂଚନା ଥାଉକି, ଅରମାନ କୋହଲି ବିଗ୍ ବସ୍ -୭ ର ଏକ ଅଂଶ ଥିଲେ ଏବଂ ସେହି ସମୟ ମଧ୍ୟରେ ସେ ମଧ୍ୟ ବିବାଦରେ ଥିଲେ । ଏହା ବ୍ୟତୀତ, ସେ ଜମାନା, କୋହ, ଭୀର, ଜାନି ଦୁଶମାନ ଭଳି ଚଳଚିତ୍ର ଅଭିନୟ କରିଥିଲେ ।
