ବାଲେଶ୍ୱର : ଯୁବକକୁ ନିର୍ମମ ହତ୍ୟା, ନାଳରେ ପଡିଛି ମୃତଦେହ
ବାଲେଶ୍ୱର : ବାଲେଶ୍ୱରରେ ଦିନକୁ ଦିନ ବଢିଚାଲିଛି ଅପରାଧୀ କାର୍ଯ୍ୟକଳାପ। ଦିନ ଦ୍ଵିପ୍ରହରେ ଘଟୁଛି ରାହାଜାନି, ଛିନତାଇ, ଲୁଟ ତଥା ମର୍ଡର । ଏହିପରି ଏକ ଘଟଣା ଚାନ୍ଦିପୁର ରାସ୍ତାରେ ଦେଖିବାକୁ ମିଳିଛି । ରାସ୍ତା ମଝିରେ ତଣ୍ଟି କାଟି ଯୁବକକୁ ହତ୍ୟା । ହତ୍ୟା ପରେ ରକ୍ତ ଯୁଡୁ ବୁଡୁ ଅବସ୍ଥାରେ ବିବସ୍ତ୍ର କରି ରାସ୍ତା କଡ଼ ନାଳରେ ଫିଙ୍ଗି ଦୁର୍ବୃତ୍ତ ଚମ୍ପଟ । ହତ୍ୟାର କାରଣ ଅସ୍ପଷ୍ଟ । ଘଟଣାସ୍ଥଳରେ ସାଇଣ୍ଟିଫିକ ଟିମ୍ ଏବଂ ବାଲେଶ୍ୱର କ୍ରାଇମ୍ ଡିଏସପି ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
ସୂଚନା ଯେ, ଚାନ୍ଦିପୁର ରାସ୍ତାର ଗଛମାଳିଆ ଛକଠାରେ ଜଣେ ଯୁବକଙ୍କୁ ଦୁର୍ବୃତ୍ତମାନେ ଅତି ନିର୍ମମ ଭାବେ ହତ୍ୟା କରି ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଶୁକ୍ରବାର ରାତି ୧୧ଟା ବେଳେ ରାସ୍ତାକଡ଼କୁ ଫିଙ୍ଗି ଦେଇଛନ୍ତି। ମୃତକଜଣକ ହେଲେ ସୁନହଟ୍ ଅଞ୍ଚଳର ବାପୁନୁ ଓରଫ୍ ସତ୍ୟବ୍ରତ ଦାସ । ଦୁର୍ବୃତ୍ତ ମାନେ ତାଙ୍କ ମୁହଁ ,ହାତ ଓ ଦେହର ଅନେକ ସ୍ଥାନକୁ ଆକ୍ରମଣ କରିଥିବା ଜଣାପଡିଛି । ଏଥିସହ ତାଙ୍କୁ ଉଲଗ୍ନ ମଧ୍ୟ କରିଦିଆଯାଇଛି। ଘଟଣାସ୍ଥଳରେ ନମ୍ବର ପ୍ଲେଟ୍ ନଥିବା ଏକ ସିଡି ଡିଲକ୍ସ ବାଇକ୍, ଏକ ଭୁଜାଲି ଖୋଳ ଓ ମାରଣାସ୍ତ୍ରର ବେଣ୍ଟ ପଡ଼ିଥିବା ଦେଖିବାକୁ ମିଳିଛି । କିଏ ଓ କାହିଁକି ତାଙ୍କୁ ହତ୍ୟା କରିଛି ତାର ରହସ୍ୟ ଏଯାଏଁ ସ୍ପଷ୍ଟ ଜଣା ପଡି ନାହିଁ । ଖବରପାଇ ବାଲେଶ୍ୱର କ୍ରାଇମ ଡିଏସ୍ପି ଅମୂଲ୍ୟ ଧର, ସଦର ଏସ୍ଡିପିଓ ପଦାରବିନ୍ଦ ତ୍ରିପାଠୀ, ଚାନ୍ଦିପୁର ଥାନା ଆଇଆଇସି ଅଜୟ ମୁର୍ମୁ ଓ ଟାଉନ ଥାନା ଆଇଆଇସି ଗୋପାଳ ଚନ୍ଦ୍ର କର୍ଣ୍ଣ ଘଟଣାସ୍ଥଳରେ ଉପସ୍ଥିତ ରହିଥିଲେ । ପରବର୍ତ୍ତୀ ସମୟରେ ସାଇଣ୍ଟିଫିକ ଟିମ୍ ମଧ୍ୟ ଆସି ତଦନ୍ତ ଆରମ୍ଭ ଆରମ୍ଭ କରିବା ପରେ ମୃତଦେହକୁ ଜିଲା ମୁଖ୍ୟ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଯାଇଛି । ତେବେ ହତ୍ୟା ଘଟଣା ପଛରେ ପୂର୍ବ ଶତ୍ରୁତା ଥାଇ ପାରେ ବୋଲି ଅନୁମାନ କରାଯାଉଛି ।
