ଓ୍ୱାସିଂଟନ୍ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭବ୍ୟ ସ୍ୱାଗତ
- ପ୍ରବାସୀ ଭାରତୀୟ ହେଉଛନ୍ତି ଆମର ସାମର୍ଥ୍ୟ : ମୋଦି
ୱାଶିଂଟନ : ଆମେରିକା ଗସ୍ତରେ ଯାଇ ୱାଶିଂଟନରେ ପହଞ୍ଚିଛନ୍ତି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସେ ପହଞ୍ଚିଲା ବେଳକୁ ୱାଶିଂଟନ୍ରେ ପ୍ରବଳ ବର୍ଷା ହେଉଥିବା କାରଣରୁ ମୋଦି ବିମାନ ମଧ୍ୟରୁ ଛତା ଧରି ବାହାରିଥିଲେ। ପ୍ରଧାନମନ୍ତ୍ରୀଙ୍କୁ ମିଳିତ ବାୟୁସେନା ଘାଟି ଆଣ୍ଡ୍ରିୟୁଜରେ ଭାରତୀୟ ଦୂତାବାସର ଅଧିକାରୀ ଏବଂ ଆମେରିକୀୟ ବୈଦେଶିକ ମନ୍ତ୍ରଣାଳୟର ଅନେକ ଅଧିକାରୀ ପହଞ୍ଚି ଭବ୍ୟ ସ୍ୱାଗତ କରିଥିଲେ। ଏହି ସମୟରେ ବିମାନ ବନ୍ଦରରେ ଭାରତର ରାଷ୍ଟ୍ରଦୂତ ତାରଞ୍ଜିତ ସିଂ ସନ୍ଧୁ ମଧ୍ୟ ଉପସ୍ଥିତ ଥିଲେ। ସେହିପରି ପ୍ରଧାନମନ୍ତ୍ରୀ ମୋଦୀଙ୍କ ଗସ୍ତ ଅବସରରେ ଭାରତୀୟ ସମ୍ପ୍ରଦାୟର ପ୍ରାୟ ୧୦୦ରୁ ଅଧିକ ଲୋକ ବିମାନବନ୍ଦରରେ ପହଞ୍ଚିଥିଲେ। ତାଙ୍କୁ ବିମାନ ବନ୍ଦରରେ ଆମେରିକା ପକ୍ଷରୁ ଭବ୍ୟ ସ୍ୱାଗତ କରାଯାଇଥିଲା। ଏୟାରପୋର୍ଟ ବାହାରେ ତାଙ୍କୁ ସ୍ୱାଗତ କରିବା ପାଇଁ ପ୍ରବାସୀ ଭାରତୀୟଙ୍କ ଭିଡ଼ ଲାଗିଥିଲା। ମୋଦି ନିଜ କାରକେଡ୍ରେ ହୋଟେଲ ଅଭିମୁଖେ ଯାଉଥିବା ବେଳେ ରାସ୍ତାର ଉଭୟ ପାର୍ଶରେ ଶତାଧିକ ଲୋକଙ୍କ ଭିଡ଼ ଦେଖିବାକୁ ମିଳିଥିଲା । ବର୍ଷା ହେଉଥିବା ସତ୍ତ୍ୱେ ମଧ୍ୟ ଶତାଧିକ ଲୋକ ମୋଦିଙ୍କ ଝଲକ ପାଇବା ପାଇଁ ଛତା ଧରି ରାସ୍ତାରେ ଛିଡ଼ା ହୋଇଥିଲେ। ଏହା ଦେଖି ମୋଦି ନିଜ କାରରୁ ଓହ୍ଲାଇ ସେମାନଙ୍କ ଅଭିବାଦନ ଗ୍ରହଣ କରିଥିଲେ। କିଛି ଲୋକଙ୍କ ସହ ହାତ ମଧ୍ୟ ମିଳାଇଥିଲେ। ଏ ସମ୍ପର୍କରେ ମୋଦି ନିଜେ ଫଟୋ ଟ୍ୱିଟ କରିଛନ୍ତି।
US: Prime Minister Narendra Modi steps out of his car to meet people who were waiting to welcome him at Joint Base Andrews in Washington DC pic.twitter.com/7m8avGg1Fn
— ANI (@ANI) September 22, 2021
ଏହି ଗସ୍ତ ଅବସରରେ ସେ ଆମେରିକା ରାଷ୍ଟ୍ରପତି, ଉପରାଷ୍ଟ୍ରପତିଙ୍କୁ ଭେଟିବା ସହିତ ଅନେକ ଗୁରୁତ୍ୱପୂର୍ଣ୍ଣ ବୈଠକରେ ଯୋଗଦେବେ। ବିଶେଷକରି ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ଆତଙ୍କବାଦ ଦମନ ତାଙ୍କ ଗସ୍ତ, ଆମେରିକା ସହିତ ପ୍ରତିରକ୍ଷା ଓ ବାଣିଜ୍ୟିକ ସହଯୋଗକୁ ଅଧିକ ନିବିଡ କରିବା ଏବଂ କୋଭିଡ ଆଦି ପ୍ରସଙ୍ଗ ତାଙ୍କ କାର୍ଯ୍ୟକ୍ରମରେ ମୁଖ୍ୟସ୍ଥାନ ନେବ। ମୋଦି ବିମାନ ବନ୍ଦର ବାହାରକୁ ଆସିବାମାତ୍ରେ ବାହାର ଅପେକ୍ଷା କରିଥିବା ପ୍ରବାସୀ ଭାରତୀୟମାନେ ତାଙ୍କୁ ଭବ୍ୟ ସ୍ୱାଗତ କରିଥିଲେ। ବର୍ଷାରେ ଓଦା ହୋଇ ମଧ୍ୟ ଲୋକମାନେ ବିମାନ ବନ୍ଦର ବାହାରେ ମୋଦିଙ୍କୁ ଦେଖିବାକୁ ଅପେକ୍ଷା କରିଥିଲେ। ତାହାର ଜବାବରେ ମୋଦି କହିଥିଲେ, ପ୍ରବାସୀ ଭାରତୀୟଙ୍କ ଦ୍ୱାରା ଏଭଳି ସ୍ୱାଗତ ସମ୍ବର୍ଦ୍ଧନା ତାଙ୍କୁ ଅଭିଭୁତ କରିଛି। ଭାରତର ପ୍ରବାସୀ ନାଗରିକମାନେ ହେଉଛନ୍ତି ଦେଶର ସାମର୍ଥ୍ୟ। ସମଗ୍ର ବିଶ୍ୱରେ ପ୍ରବାସୀ ଭାରତୀୟମାନେ କିଭଳି ନିଜପାଇଁ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି ତାହା ବାସ୍ତବରେ ପ୍ରଶଂସାଯୋଗ୍ୟ। ପ୍ରଧାନମନ୍ତ୍ରୀ ମୋଦି ଶୁକ୍ରବାର ଆମେରିକା ରାଷ୍ଟ୍ରପତି ଜୋ ବାଇଡେନଙ୍କୁ ଭେଟିବେ। ବାଇଡେନ ଆମେରିକା ରାଷ୍ଟ୍ରପତି ନିର୍ବାଚନରେ ବିଜୟୀ ହେବାପରେ ଏହା ଦୁଇନେତାଙ୍କ ମଧ୍ୟରେ ପ୍ରଥମ ସାମନା ସାମନି ସାକ୍ଷାତ ହେବ। ଏହି ବୈଠକ ସମ୍ପର୍କରେ ସୂଚନା ଦେଇ ଭାରତର ବୈଦେଶିକ ସଚିବ ହର୍ଷବର୍ଦ୍ଧନ ଶ୍ରିଙ୍ଗଲା କହିଛନ୍ତି ଯେ ଦୁଇନେତା ଆଫଗାନିସ୍ତାନ ଘଟଣାକ୍ରମ ପରବର୍ତ୍ତୀ ସମୟରେ ସୃଷ୍ଟି ହୋଇଥିବା ଆଞ୍ଚଳିକ ନିରାପତ୍ତା ପରିସ୍ଥିତି, ମୌଳବାଦ ଓ ଆତଙ୍କବାଦର ବିଲୋପ, ସୀମାପାର ଆତଙ୍କବାଦ ଏବଂ ବିଶ୍ୱସ୍ତରରେ ରହିଥିବା ଆତଙ୍କି ନେଟୱର୍କ ଧ୍ୱଂସ କରିବା ଆଦି ସର୍ମ୍ପର୍କରେ ମତ ବିନିମୟ କରିବେ। ପ୍ରଧାନମନ୍ତ୍ରୀ ମୋଦି ମଧ୍ୟ ଆମେରିକାର ଉପରାଷ୍ଟ୍ରପତି କମଳା ହାରିସ, ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ ମୋରିସନ, ଜାପାନ ପ୍ରଧାନମନ୍ତ୍ରୀ ୟୋଶିହିଦେ ସୁଗାଙ୍କୁ କ୍ୱାଡ ବୈଠକ ଅବସରରେ ସାକ୍ଷାତ କରିବେ। ଏହା ପୂର୍ବରୁ ବାଇଡେନ କହିଛନ୍ତି ଯେ ସ୍ୱାସ୍ଥ୍ୟଗତ ନିରାପତ୍ତା ଠାରୁ ନେଇ ଜଳବାୟୁ ଏବଂ ନବୀନ ପ୍ରଯୁକ୍ତି ଆଦି କ୍ଷେତ୍ରରେ ସୃଷ୍ଟି ହେଉଥିବା ଆହ୍ୱାନମୂଳକ ପରିସ୍ଥିତିର ମୁକାବିଲା କରିବା ଏବଂ ଆଞ୍ଚଳିକ ସଂସ୍ଥାଗୁଡିକ ସହିତ ନିୟୋଜିତ ରହିବାକୁ ଅଷ୍ଟ୍ରେଲିଆ, ଭାରତ, ଜାପାନ ଏବଂ ଆମେରିକା (କ୍ୱାଡ ସହଯୋଗିତା) ସେମାନଙ୍କ ପ୍ରୟାସକୁ ବ୍ୟାପକ କରିଛନ୍ତି। ମୋଦି ତାଙ୍କର ଏହି ଗସ୍ତକାଳରେ ବ୍ୟବସାୟ ନେତୃବୃନ୍ଦଙ୍କୁ ସାକ୍ଷାତ କରି ‘ମେକ ଇନ ଇଣ୍ଡିଆ’ ପ୍ରୟାସ ସେମାନଙ୍କ ନିକଟରେ ଉପସ୍ଥାପନ କରିବେ ବୋଲି ଜଣାଯାଇଛି।
