ମୁକୁଳା ଡ୍ରେନରେ ପଡ଼ି ଭାସିଗଲେ ୧୦ରେ ଶ୍ରେଣୀ ଛାତ୍ର
ଭୁବନେଶ୍ୱର : ରାଜଧାନୀରେ ବର୍ଷା ପାଣିରେ ଭାସି ନିଖୋଜ ହୋଇଛନ୍ତି ଜଣେ ଦଶମ ଶ୍ରଣୀ ଛାତ୍ର । ଭୁବନେଶ୍ୱର ଶତାବ୍ଦୀନଗର ବ୍ୟାଙ୍କ କଲୋନୀକୁ ଟିଉସନ୍ ପାଇଁ ଯାଇଥିବା ବେଳେ ଜଣେ ୧୫ ବର୍ଷୀୟ ଛାତ୍ର ଖୋଲା ଡ୍ରେନ୍ ରେ ଭାସିଯାଇଛନ୍ତି । ନିଖୋଜ ଛାତ୍ର ଜଣ ବରମୁଣ୍ଡା ପାଲାମଣ୍ଡପର ଜ୍ୟୋତି ପ୍ରକାଶ ବେହେରା ବୋଲି ଜଣା ପଡିଛି । ଘଟଣାସ୍ଥଳରେ ଅଗ୍ନିଶମ ବାହିନୀ ପହଂଚି ଛାତ୍ରଙ୍କୁ ଖୋଜାଖୋଜି ଆରମ୍ଭ କରିଛି । ସ୍ଥାନୀୟ ଲୋକମାନେ ମଧ୍ୟ ଛାତ୍ରଙ୍କୁ ଉଦ୍ଧାର କରିବାକୁ ଚେଷ୍ଟା ଚଳାଇଛନ୍ତି । ଖବର ଲେଖାହେବା ପର୍ଯ୍ୟନ୍ତ ଡ୍ରେନରେ ଭାସିଯାଇଥିବା ଛାତ୍ରଙ୍କ କୌଣସି ପତା ମିଳିପାରିନାହିଁ ।
ସୂଚନା ଯେ, ରବିବାର ଦିନ ୨ଟା ବେଳେ ଟିଉସନ୍ ଯାଇ ଛାତ୍ର ଜଣକ ସାଇକେଲରେ ଫେରୁଥିବା ବେଳେ ଡ୍ରେନ ସୁଅରେ ପଡି ନାଳରେ ଭାସିଯାଇଥିଲେ । ତେବେ ସ୍ଥାନୀୟ ଲୋକଙ୍କ କହିବାମୁତାବକ ଛାତ୍ର ଜଣକ ଡ୍ରେନ ପାଖ ଦେଇ ଆସୁଥିବା ବେଳେ ତାଙ୍କ ଗୋଡ ଖସିଯାଇଥିଲା । ଫଳରେ ସେ ଡ୍ରେନରେ ପଡି ଭାସିଯାଇ ଥିଲେ । ଜଣେ ଯୁବକଙ୍କ କହିବାନୁସାରେ ଛାତ୍ର ଜଣକ ଡ୍ରେନରେ ପଡି ସାହାଯ୍ୟ ପାଇଁ ହାତ ଦେଖାଉଥିଲେ । ସେହି ସମୟରେ ଯୁବକ ଜଣକ ଡ୍ରେନକୁ ଡିଆଁ ମାରିଥିଲେ । ହେଲେ ସୁଅ ଅଧିକ ଥିବାରୁ ଛାତ୍ର ଜଣକ ଡ୍ରେନରେ ଭାସି ଯାଇଥିଲେ । ତେଣୁ ସେମାନେ ଛାତ୍ରକୁ ବହୁ ଖୋଜା ଖୋଜି କରିଥିଲେ ହେଲେ ତାର କୌଣସି ପତା ପାଇନଥିଲେ ।
