ନଭେମ୍ବର ପହିଲାରୁ ହେବାକୁ ଯାଉଛି ଏହି ୫ଟି ବଡ ପରିବର୍ତ୍ତନ, ଆପଣଙ୍କ ପକେଟ ଉପରେ ପଡ଼ିବ ସିଧାସଳଖ ପ୍ରଭାବ

ନୂଆଦିଲ୍ଲୀ : ଅକ୍ଟୋବରର ଫେଷ୍ଟିଭାଲ ସିଜିନ କେତେବେଳେ ସରିଗଲା ତାହା ଜଣା ପଡିଲା ନାହିଁ । ବର୍ତ୍ତମାନ ନଭେମ୍ବର ଆରମ୍ଭ ହେବାକୁ ଯାଉଛି । ପ୍ରତ୍ୟେକ ନୂଆ ମାସର ଆରମ୍ଭରେ କିଛି ନୂତନ ପରିବର୍ତ୍ତନ ଆସେ, ଯାହା ବିଷୟରେ ଆମେ ଆପଣଙ୍କୁ ସମୟ ସମୟରେ ସୂଚନା ଦେଇଥାଉ । ଏହି ପରିବର୍ତ୍ତନଗୁଡ଼ିକ ଆପଣଙ୍କ ପକେଟ-ଜୀବନ ଓ ଆବଶ୍ୟକତା ସହିତ ଜଡିତ । ଏଥର କିଛି ଅର୍ଥନୈତିକ ପରିବର୍ତ୍ତନ ଅଛି । ଯାହା ଆପଣଙ୍କ ପକେଟ ଉପରେ ସିଧାସଳଖ ପ୍ରଭାବ ପକାଇପାରେ । କାରଣ ନଭେମ୍ବର ୧ ରୁ ସାରା ଦେଶରେ ଅନେକ ଜିନିଷ ବଦଳିପାରେ ।

ବୀମା ପାଇଁ କେୱାଇସି ବାଧ୍ୟତାମୂଳକ :

ନଭେମ୍ବର ୧ ରୁ ବୀମା ନିୟାମକ ଏବଂ ବିକାଶ ପ୍ରାଧିକରଣ (ଆଇଆରଡ଼ିଏଆଇ) ବୀମାକାରୀଙ୍କ ପାଇଁ କେୱାଇସି ବିବରଣୀ ପ୍ରଦାନ କରିବା ବାଧ୍ୟତାମୂଳକ କରିପାରେ । ବର୍ତ୍ତମାନ ସୁଦ୍ଧା, ଏକ ଅଣ-ଜୀବନ ବୀମା ପଲିସି କିଣିବାବେଳେ କେୱାଇସି ବିବରଣୀ ପ୍ରଦାନ କରିବା ସ୍ବେଚ୍ଛାକୃତ ଅଟେ ଯାହା ନଭେମ୍ବର ୧ ରୁ ବାଧ୍ୟତାମୂଳକ ହୋଇପାରେ । କେୱାଇସି ସହିତ ଜଡିତ ନିୟମ ଉଭୟ ନୂଆ ଓ ପୁରୁଣା ଗ୍ରାହକଙ୍କ ପାଇଁ ବାଧ୍ୟତାମୂଳକ ହୋଇପାରେ । ଏହା ଅଧୀନରେ, ଯଦି ଆପଣ କ୍ଲେମ କରିବା ସମୟରେ କେୱାଇସି ଡକ୍ୟୁମେଣ୍ଟ୍ ଉପସ୍ଥାପନ କରନ୍ତି ନାହିଁ, ତେବେ ଆପଣଙ୍କର କ୍ଲେମ କ୍ୟାନସଲ ହୋଇପାରେ ।

ଏଲପିଜି ଗ୍ୟାସ ସିଲିଣ୍ଡରର ମୂଲ୍ୟରେ ପରିବର୍ତ୍ତନ :

ପ୍ରତ୍ୟେକ ମାସର ପ୍ରଥମ ଦିନରେ ପେଟ୍ରୋଲିୟମ କମ୍ପାନୀଗୁଡିକ ଦ୍ୱାରା ଏଲପିଜି ଗ୍ୟାସ ସିଲିଣ୍ଡରର ମୂଲ୍ୟରେ ପରିବର୍ତ୍ତନ ହୋଇଥାଏ । ଏଭଳି ପରିସ୍ଥିତିରେ ୧ ନଭେମ୍ବରରେ ତୈଳ କମ୍ପାନୀଗୁଡିକ ଦ୍ୱାରା ଏଲପିଜି ଗ୍ୟାସ ସିଲିଣ୍ଡରର ନୂତନ ମୂଲ୍ୟ ପ୍ରକାଶ ପାଇବ । ୧ ନଭେମ୍ବରରେ, ଉଭୟ ୧୪ କିଲୋଗ୍ରାମ ଘରୋଇ ଓ ୧୯ କିଲୋଗ୍ରାମ ବାଣିଜ୍ୟିକ ଗ୍ୟାସ ସିଲିଣ୍ଡରର ମୂଲ୍ୟ ବଦଳିପାରେ । ଏହି ମାସର ପ୍ରଥମ ଦିନରେ ବାଣିଜ୍ୟିକ ଗ୍ୟାସ ସିଲିଣ୍ଡରର ମୂଲ୍ୟ ମଧ୍ୟ ହ୍ରାସ କରାଯାଇଥିଲା ।

ଟ୍ରେନର ଟାଇମ ଟେବୁଲ୍ ପରିବର୍ତ୍ତନ :

ନଭେମ୍ବର ୧ ରୁ ଟ୍ରେନର ସମୟ ସାରଣୀରେ ମଧ୍ୟ ପରିବର୍ତ୍ତନ ଆସିବ । ଭାରତୀୟ ରେଳ ସମଗ୍ର ଦେଶରେ ଟ୍ରେନର ସମୟ ସାରଣୀ ପରିବର୍ତ୍ତନ କରିବାକୁ ଯାଉଛି । ଏହାପୂର୍ବରୁ, ଅକ୍ଟୋବର ୧ ରୁ ଟ୍ରେନର ସମୟ ସାରଣୀରେ ପରିବର୍ତ୍ତନ ହେବାର ଥିଲା, କିନ୍ତୁ କିଛି କାରଣ ଯୋଗୁଁ ଏହାକୁ ୩୧ ଅକ୍ଟୋବର ତାରିଖ ଆହୁରି ସ୍ଥିର କରାଯାଇଛି । ବର୍ତ୍ତମାନ ନୂଆ ଟାଇମ ଟେବୁଲ୍ ୧ ନଭେମ୍ବରରୁ କାର୍ଯ୍ୟକାରୀ ହେବ । ଏହା ପରେ ୧୩ ହଜାର ଯାତ୍ରୀବାହୀ ଟ୍ରେନ୍ ଓ ୭ ହଜାର ସାମଗ୍ରୀ ଟ୍ରେନରେ ସମୟ ବଦଳିବ । ନଭେମ୍ବର ୧ ରୁ ଦେଶରେ ଚାଲୁଥିବା ପ୍ରାୟ ୩୦ ରାଜଧାନୀ ଟ୍ରେନର ସମୟ ମଧ୍ୟ ବଦଳିଯିବ ।

ବିଦ୍ୟୁତ ଉପରେ ସବସିଡି ବନ୍ଦ ହେବ :

୧ ନଭେମ୍ବରରୁ ରାଜଧାନୀ ଦିଲ୍ଲୀର ଲୋକମାନଙ୍କୁ ମିଳୁଥିବା ବିଦ୍ୟୁତ ଉପରେ ସବସିଡି ବନ୍ଦ ହୋଇଯିବ । ବାସ୍ତବରେ, ବର୍ତ୍ତମାନ ଦିଲ୍ଲୀର ଲୋକଙ୍କୁ ଏକ ମାସ ପାଇଁ ୨୦୦ ୟୁନିଟ୍ ମାଗଣା ବିଦ୍ୟୁତ୍ ପାଇବାକୁ ପଞ୍ଜିକରଣ କରିବାକୁ ପଡିବ । ପଞ୍ଜୀକରଣ ପାଇଁ ଶେଷ ୩୧ ଅକ୍ଟୋବର ରହିଛି । ଏଭଳି ପରିସ୍ଥିତିରେ ଯେଉଁମାନେ ପଞ୍ଜୀକୃତ କରିନାହାଁନ୍ତି, ସେମାନେ ନଭେମ୍ବର ମାସରେ ବିଦ୍ୟୁତ ସବସିଡିର ଲାଭ ପାଇପାରିବେ ନାହିଁ ।

ଏଲପିଜି ଗ୍ୟାସ ସିଲିଣ୍ଡରର ପାଇଁ ଓଟିପି :

ଏଲପିଜି ସିଲିଣ୍ଡର ବିତରଣ ସହିତ ଜଡିତ ପ୍ରକ୍ରିୟା ମଧ୍ୟ ନଭେମ୍ବର ୧ ରୁ ପରିବର୍ତ୍ତନ ହେବାକୁ ଯାଉଛି । ଗ୍ୟାସ୍ ବୁକିଂ କରିବା ପରେ ଗ୍ରାହକଙ୍କ ମୋବାଇଲ୍ ନମ୍ବରକୁ ଏକ ଓଟିପି ପଠାଯିବ । ଯେତେବେଳେ ସିଲିଣ୍ଡର ଡେଲିଭରି ପାଇଁ ଆସିବା, ଆପଣଙ୍କୁ ଏହି ଓଟିପି ଡେଲିଭରି ବଏ ସହିତ ସେୟାର କରିବାକୁ ପଡିବ । ଥରେ ଏହି କୋଡ୍ ସିଷ୍ଟମ୍ ସହିତ ମେଳ ହୋଇଗଲେ ଗ୍ରାହକଙ୍କୁ ତାଙ୍କର ସିଲିଣ୍ଡରର ଡେଲିଭରି କରାଯିବ ।