ଚୋରା ମଦ ବେପାରୀଙ୍କ ମାଡରେ ଯୁବକ ଗୁୁରୁତର
ସୋର : ସୋର ଥାନା ଅଧୀନ ନଦିଗାଁ ପଞ୍ଚାୟତ ଅନ୍ତର୍ଗତ ଗୁହାଳଡିହି ଗ୍ରାମର ସ୍ୱର୍ଗତ ବୈରାଗୀ ବେହେରାଙ୍କ ପୁଅ ରମାକାନ୍ତ ଚୋରା ମଦ ବିକ୍ରିକୁ ବିରୋଧ କରି ବେପାରୀଙ୍କ ମାଡରେ ଗୁରୁତର ହୋଇଥିବା ନେଇ ସୋର ଥାନାରେ ଲିଖିତ ଅଭିଯୋଗ ହୋଇଛି । ଏହି ଗ୍ରାମ ନିକଟସ୍ଥ ମଧୁସୂଦନପୁର ପଞ୍ଚାୟତ ଆଗିରିଆ ଗ୍ରାମର ଅରୁଣ କୁମାର ବେହେରା ପୀତାକାଳିଆ ନଦୀ ପଠା ସରକାରୀ ଜମିରେ ଏକ ଅସ୍ଥାୟୀ ଘରେ ଚୋରା ମଦ ବିକ୍ରି କରୁଥିବା ବେଳେ ରମାକାନ୍ତ ବିରୋଧ କରୁଥିଲେ । ସ୍ଥାନୀୟ ଅଂଚଳର କିଛି ଯୁବକ ଏଠାରୁ ନିସାଶକ୍ତ ହୋଇ ଆଇନ୍ଶୃଙ୍ଖଳା ପରିସ୍ଥିତ ସୃଷ୍ଟି କରୁଥିବା ବେଳେ ଏହି କାରବାରକୁ ବିରୋଧ କରିବାରୁ ଅରୁଣଙ୍କ ଲୁହା ରଡ୍ ମାଡରେ ରମାକାନ୍ତ ଲହୁଲୁହାଣ ହୋଇଥିଲେ । ତାଙ୍କ ଚିତ୍କାର ଶୁଣି ସ୍ଥାନୀୟ ଲୋକେ ଘଟଣାସ୍ଥଳରୁ ତାଙ୍କୁ ଉଦ୍ଧାର କରି ସୋର ଡାକ୍ତରଖାନାରେ ଭର୍ତ୍ତି କରିବା ପରେ ଚିକିତ୍ସିତ ହୋଇ ସେ ସୋର ଥାନାରେ ଲିଖିତ ଅଭିଯୋଗ କରିଥିଲେ । ସୋର ପୁଲିସ ଅଭିଯୋଗ ପାଇ ଘଟଣାର ତଦନ୍ତ କରୁଛି ।
