ମହାରାଷ୍ଟ୍ରରୁ ମିଳିଲା ସନ୍ଦିଗ୍ଧ ବୋଟ୍ : ୩ଟି ଏକେ-୪୭ ବନ୍ଧୁକ ଓ ଗୁଳି ଜବତ
ମୁମ୍ବାଇ: ମହାରାଷ୍ଟ୍ରର ରାୟଗଢ଼ ତଟରେ ଏକ ସନ୍ଦିଗ୍ଧ ବୋଟ୍ ଜବତ ହୋଇଛି । ଏହି ସନ୍ଦିଗ୍ଧ ବୋଟରେ ୩ଟି ଏକେ-୪୭ ବନ୍ଧୁକ ଓ ଗୁଳି ମିଳିଥିବା ଜଣାପଡ଼ିଛି । ଏନେଇ ସ୍ଥାନୀୟ ମାଛ ଧରାଳୀ ପୁଲିସକୁ ସୂଚନା ଦେଇଥିଲେ । ପରେ ପୁଲିସ ଘଟଣାସ୍ଥଳରେ ପହଞ୍ଚି ଯାଞ୍ଚ ଆରମ୍ଭ କରିଛି । ସମଗ୍ର ଅଞ୍ଚଳରେ ହାଇ ଆଲର୍ଟ ଜାରି କରାଯାଇଛି ।
ମହାରାଷ୍ଟ୍ର ଉପମୁଖ୍ୟ ଦେବେନ୍ଦ୍ର ଫଡନାଭିସ କହିଛନ୍ତି ଯେ, ଲେଡହୀନ ନାମକ ଏହି ବୋଟଟି ଜଣେ ଅଷ୍ଟ୍ରେଲୀୟ ମହିଳାଙ୍କର । ତାଙ୍କ ସ୍ୱାମୀ ଜେମ୍ସ ହର୍ବର୍ଟ ବୋଟର କ୍ୟାପଟେନ । ସମୁଦ୍ରରେ ନୌକାର ଇଞ୍ଜିନ ଫାଟି ଯାଇଥିଲା । ପରେ ଏକ କୋରିୟାଇ ବୋଟରେ ଲୋକଙ୍କୁ ଉଦ୍ଧାର କରାଯାଇଥିଲା । ଏହି ବୋଟ ଏବେ ହରିହରେଶ୍ୱର ସମୁଦ୍ର ତଟରେ ପହଞ୍ଚିଛି । ଆଉ ଏଥିରୁ ୩ଟି ଏକେ-୪୭ ବନ୍ଧୁକ ଓ ବିପୁଳ ମାତ୍ରାରେ ଗୁଳି ଜବତ କରାଯାଇଛି । ଏଭଳି ସ୍ଥିତିରେ ଆଗାମୀ ପାର୍ବଣ ଋତୁକୁ ଧ୍ୟାନରେ ରଖି ପୁଲିସ ଓ ପ୍ରଶାସନକୁ ସଜାଗ ରହିବାକୁ ନିର୍ଦ୍ଦେଶ ଦିଆଯାଇଛି ।
