ଲାଲ କିଲାରେ ପତାକା ଉତ୍ତୋଳନ କଲେ ପ୍ରଧାନମନ୍ତ୍ରୀ, ଦେଶବାସୀଙ୍କୁ କଲେ ସମ୍ବୋଧିତ
ନୂଆଦିଲ୍ଲୀ : ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲାଲ୍ କିଲାରେ ୭୬ ତମ ସ୍ବାଧୀନତା ଦିବସ ଅବସରରେ ପତାକା ଉତ୍ତୋଳନ କରିଛନ୍ତି। ଏହି ଅବସରରେ କର୍ତ୍ତବ୍ୟ ପଥରେ ଜୀବନ ଦେଇଥିବା ମହାତ୍ମା ଗାନ୍ଧୀ, ନେତାଜୀ ସୁଭାଷ ଚନ୍ଦ୍ର ବୋଷ, ବାବାସାହେବ ଅମ୍ବେଦକର ଏବଂ ବୀର ସବରକର୍ଙ୍କ ପ୍ରତି ନାଗରିକମାନେ କୃତଜ୍ଞ ଏବଂ ସେମାନେ ଦେଶ ନିର୍ମାଣରେ ସହାୟକ ହୋଇଥିଲେ ବୋଲି ଆଜି ଲାଲ୍ କିଲାରୁ ଦେଶବାସୀଙ୍କୁ ଉଦ୍ବୋଧନ ଦେଇଛନ୍ତି।
ଲାଲ୍ କିଲା ଉପରେ ଜାତୀୟ ପତାକା ଉତ୍ତୋଳନ କରି ଉଦ୍ବୋଧନ ଦେବା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଜଘାଟ ଯାଇ ଜାତିର ଜନକ ମହାତ୍ମା ଗାନ୍ଧୀଙ୍କ ସମାଧିରେ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ।
ବ୍ରିଟିସ୍ ଶାସନ ବିରୋଧରେ ସଂଗ୍ରାମ କରିଥିବା ସ୍ବାଧୀନତା ସଂଗ୍ରାମୀମାନଙ୍କ ପ୍ରତି କୃତଜ୍ଞତା ଜ୍ଞାପନ କରି ପ୍ରଧାନମନ୍ତ୍ରୀ କହିଲେ, ମଙ୍ଗଲ ପାଣ୍ଡେ, ତାତ୍ୟା ଟୋପେ, ଭଗତ ସିଂହ, ସୁଖଦେବ, ରାଜଗୁରୁ, ଚନ୍ଦ୍ରଶେଖର ଆଜାଦ୍, ଆଶଫକ୍ୟୁଲ୍ଲା ଖାଁ, ରାମପ୍ରସାଦ ବିସ୍ମିଲ୍ ଏବଂ ବ୍ରିଟିସ୍ ଶାସନର ମୂଳଦୁଆ ଦୋହଲାଇ ଦେଇଥିବା ଆମର ଅସଂଖ୍ୟ ବିପ୍ଳବୀମାନଙ୍କ ପ୍ରତି ଏ ଜାତି କୃତଜ୍ଞ।
ସେ କହିଛନ୍ତି, ସ୍ବାଧୀନତା ସଂଗ୍ରାମୀ ଓ ଦେଶ ନିର୍ମାତାଙ୍କ ଉଦ୍ଦେଶ୍ୟରେ ସ୍ବାଧୀନତା ଦିବସ ପାଳନ କରାଯାଉଛି କହି ସେ ରାଜେନ୍ଦ୍ର ପ୍ରସାଦ, ଜବାହରଲାଲ୍ ନେହେରୁ, ସର୍ଦାର୍ ପଟେଲ, ଏସ୍.ପି. ମୁଖାର୍ଜୀ, ଲାଲ୍ ବାହାଦୁର ଶାସ୍ତ୍ରୀ, ଦୀନଦୟାଲ୍ ଉପାଧ୍ୟୟ, ଜେ.ପି. ନାରାୟଣ, ରାମମନୋହର ଲୋହିଆ, ବିନୋବା ଭାବେ, ନାନାଜୀ ଦେଶମୁଖ ଏବଂ ସୁବ୍ରମଣିୟମ୍ ଭାରତୀ ପ୍ରମୁଖଙ୍କୁ ସ୍ମରଣ କରିଥିଲେ।
ସ୍ବାଧୀନତା ସଂଗ୍ରାମରେ ଜନଜାତି ସମ୍ପ୍ରଦାୟର ଅବଦାନ ଉପରେ ଗୁରୁତ୍ବାରୋପ କରି ପ୍ରଧାନମନ୍ତ୍ରୀ ମୋଦୀ ଭଗବାନ ବିର୍ସା ମୁଣ୍ଡା, ସିଧୁ-କାହ୍ନୁ, ଆଲ୍ଲୁରି ସୀତାରାମ ରାଜୁ ଏବଂ ଗୋବିନ୍ଦ ଗୁରୁଙ୍କୁ ସ୍ମରଣ କରିଥିଲେ। ସେ କହିଲେ, ଉପରୋକ୍ତ ବ୍ୟକ୍ତିତ୍ବମାନେ ସ୍ବାଧୀନତା ସଂଗ୍ରାମର ଅଭିବ୍ୟକ୍ତି ହେବା ସହ ମାତୃଭୂମି ପାଇଁ ବଞ୍ଚିବା ଓ ମରିବା ନିମନ୍ତେ ଜନଜାତି ସମ୍ପ୍ରଦାୟଙ୍କୁ ପ୍ରେରିତ କରିଥିଲେ। ଏଥିସହ ପ୍ରଧାନମନ୍ତ୍ରୀ ମୋଦୀ ଆଜି ସ୍ବାଧୀନତା ସଂଗ୍ରାମୀ ତଥା ମହର୍ଷି ଶ୍ରୀଅରବିନ୍ଦଙ୍କୁ ତାଙ୍କ ଜନ୍ମଦିନ ଅବସରରେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।
ଆଗାମୀ ୨୫ ବର୍ଷ ପାଇଁ ଆମକୁ ‘ପଞ୍ଚପ୍ରାଣ’ (ପାଞ୍ଚ ପ୍ରତିଜ୍ଞା) ଉପରେ ଧ୍ୟାନ ଦେବାକୁ ପଡ଼ିବ ବୋଲି ଅଭିଭାଷଣରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି। ‘ପଞ୍ଚପ୍ରାଣ’ର ପ୍ରଥମଟି ହେଉଛି ବୃହତ୍ତର ପ୍ରତିଜ୍ଞା ଏବଂ ବିକଶିତ ଭାରତର ପ୍ରତିଜ୍ଞା ସହ ଅଗ୍ରସର ହେବା; ଦ୍ବିତୀୟଟି ହେଉଛି, ଦାସତ୍ବର ସମସ୍ତ ଚିହ୍ନ ପୋଛି ଦେବା; ତୃତୀୟଟି ହେଉଛି, ଆମର ଐତିହ୍ୟ ପାଇଁ ଗୌରବାନ୍ବିତ ମନେକରିବା; ଚତୁର୍ଥଟି ହେଉଛି, ୧୩୦କୋଟି ଜନତାଙ୍କ ମଧ୍ୟରେ ଏକତାକୁ ସୁଦୃଢ଼ କରିବା ଏବଂ ପଞ୍ଚମଟି ହେଉଛି, ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ସମେତ ନାଗରିକମାନେ କର୍ତ୍ତବ୍ୟ ପ୍ରତି ଦୃଷ୍ଟି ଦେବା ବୋଲି ପ୍ରଧାନମନ୍ତ୍ରୀ କହିଛନ୍ତି।
ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ଭାରତ ହେଉଛି ଏକ ଆକାଙ୍କ୍ଷୀ ସମାଜ ଯେଉଁଠି ପରିବର୍ତ୍ତନ ସମ୍ମିଳିତ ଶକ୍ତିରେ ସମ୍ଭବ ହୁଏ। ଭାରତୀୟମାନେ ସକାରାତ୍ମକ ପରିବର୍ତ୍ତନ ଚାହୁଁଛନ୍ତି ଓ ସେଥିପ୍ରତି ଅବଦାନ ଦେବାକୁ ମଧ୍ୟ ଆଗ୍ରହୀ। ପ୍ରତ୍ୟକ ସରକାର ଏହି ଆକାଙ୍କ୍ଷୀ ସମାଜର ସମସ୍ୟା ବୁଝିବା କଥା। ଭାରତ ହେଉଛି ଗଣତନ୍ତ୍ରର ଜନନୀ। ନିଜର ୭୫ ବର୍ଷ ଯାତ୍ରା କାଳରେ ଭାରତ ଅନେକ ଆହ୍ବାନର ସମ୍ମୁଖୀନ ହୋଇ ପ୍ରମାଣ କରି ଦେଇଛି ଯେ, ସେସବୁର ମୁକାବିଲା କରିବାକୁ ତା’ର କ୍ଷମତା ଅଛି।
