ପବିତ୍ର ଶୀତଳଷଷ୍ଠୀ ପାଇଁ ମନ୍ଦିର ପ୍ରଶାସନ ପକ୍ଷରୁ କାର୍ଯ୍ୟସୂଚୀ ଜାରି
ଭୁବନେଶ୍ୱର : ଶ୍ରୀଲିଙ୍ଗରାଜ ମନ୍ଦିରରେ ପବିତ୍ର ଶୀତଳଷଷ୍ଠୀ ପାଇଁ ମନ୍ଦିର ପ୍ରଶାସନ ପକ୍ଷରୁ କାର୍ଯ୍ୟସୂଚୀ ଜାରି କରାଯାଇଛି । ଆଜି ହୋଇଥିବା ବୈଠକର ନିଷ୍ପତ୍ତି କ୍ରମେ ସକାଳ ୬.୩୦ ରେ ମଙ୍ଗଳ ଆଳତୀ ଓ ୬.୩୦ ରୁ ୯.୩୦ ପର୍ଯ୍ୟନ୍ତ ଭକ୍ତଙ୍କ ପାଇଁ ସାହାଣମେଲା ହେବ ।ମହାପ୍ରଭୁ ଲିଙ୍ଗରାଜଙ୍କର ବିଭିନ୍ନ ରୀତିନୀତି ପରେ ରାତି ୧୨.୩୦ରୁ ଭୋର ୪ ଟା ମଧ୍ୟରେ ବିବାହ ଅନୁଷ୍ଠିତ ହେବ ବୋଲି ସୂଚନା ଦେଇଛନ୍ତି ଲିଙ୍ଗରାଜ ମନ୍ଦିର ପ୍ରଶାସନ କାର୍ଯ୍ୟନିର୍ବାହୀ ଅଧିକାରୀ ଭବାନୀ ପ୍ରସାଦ ମିଶ୍ର ।
ବିଶ୍ବ ପ୍ରସିଦ୍ଧ ସମ୍ବଲପୁର ଶୀତଳଷଷ୍ଠୀ ମଙ୍ଗଳବାର ଠାରୁ ଆରମ୍ଭ ହୋଇଯାଇଛି। ପରମ୍ପରା ମୁତାବକ ଆଜି ନନ୍ଦପଡାର ବଂ ବରାଡ ବାଲୁଙ୍କେଶ୍ବର ବାବାଙ୍କ ପତରପେଣ୍ଡି ବା ନିର୍ବନ୍ଧ ମହାସମାରୋହରେ ଅନୁଷ୍ଠିତ ହୋଇଛି। ଦିନକ ପରେ ଗୁରୁବାର ଅନ୍ୟ ସମସ୍ତ କମିଟିର ପତରପେଣ୍ଡି ଅନୁଷ୍ଠିତ ହେବ। ମଙ୍ଗଳବାର ସନ୍ଧ୍ୟାରେ ଦେବ ଦେବ ମହାଦେବ ବାଲୁଙ୍କେଶ୍ବର ବାବାଙ୍କ ନିକଟରେ ସ୍ବତନ୍ତ୍ର ପୂଜାର୍ଚ୍ଚନା କରାଯାଇଥିଲା। ମନ୍ଦିର ପୂଜକ ଲକ୍ଷପତି ମହାପାତ୍ର ଏବଂ ବିବାହ ପୂଜକ ଶଶାଙ୍କ ଶେଖର ମିଶ୍ରଙ୍କ ପୌରୋହିତ୍ୟରେ ବରପିତା ରାମଚନ୍ଦ୍ର ମିଶ୍ର ମହାଦେବଙ୍କ ନିକଟରେ ଆଳତୀ କରିଥିଲେ। ଏହାପରେ ପତରପେଣ୍ଡି ପାଇଁ ପୂଜା ଥାଳ ଥରି ବରପିତା ଶ୍ରୀ ମିଶ୍ର ସପ୍ତଋଷୀଙ୍କ ସହ କନ୍ୟାପିତା ଗୋଲବାଜର ନିବାସୀ ଗିରିଶ ପଟେଲ ଏବଂ କନ୍ୟା ମାତା ହଂସାବେନ ପଟେଲଙ୍କ ଘର ଅଭିମୁଖେ ଭବ୍ୟ ଶୋଭାଯାତ୍ରାରେ ବାହାରିଥିଲେ। ଘଣ୍ଟ, ଘଣ୍ଟା, ଦୁଲଦୁଲି ସହିତ ଧମାଲ ବାଦ୍ୟ ଆଦି ସାଂସ୍କୃତିକ ଦଳ ସହିତ ବରପିତା ଏକ ସୁସଜ୍ଜିତ ବିମାନରେ ଶୋଭାଯାତ୍ରାରେ ଯାଇ କନ୍ୟାପିତାଙ୍କ ଘରେ ପହଞ୍ଚିଥିଲେ। ସେଠାରେ କନ୍ୟାଘର ଭବ୍ୟ ସ୍ବାଗତ କରି ପାଛୋଟି ନେଇଥିଲେ। ଏହାପରେ ପତରପଁଣ୍ଡେ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ପ୍ରଥମେ ବରପକ୍ଷ ବାଲୁଙ୍କେଶ୍ବର ବାବାଙ୍କ ପାଇଁ ପାତ୍ରୀ ସନ୍ଧାନରେ ବାହାରିଥିବା ବେଳେ ଶ୍ରୀ ପଟେଲଙ୍କ ଘରେ ଉତ୍ତମ ପାତ୍ରୀ ଥିବା ସୂଚନା ପାଇ ଆସିଛନ୍ତି ବୋଲି କହିଥିଲେ। ଏହାଛଡା ସପ୍ତଋଷୀ ବାଲୁଙ୍କେଶ୍ବର ବାବାଙ୍କ ଗୁଣଗାନ କରିଥିଲେ। ଏହା ଜାଣିବା ପରେ କନ୍ୟାପକ୍ଷ ମାତା ପାର୍ବତୀଙ୍କ ଗୁଣଗାନ କରିବା ସହିତ ବିବାହ ନେଇ ସମ୍ମତି ଜଣାଇଥିଲେ। ଫଳରେ ଉଭୟ ପକ୍ଷ ମଧ୍ୟରେ ନିର୍ବନ୍ଧ କାର୍ଯ୍ୟକ୍ରମ ସଂପନ୍ନ ହୋଇଥିଲା। ବରପିତା ଏକ ନୂତନ କଂସା ଥାଳିରେ ଥିବା ଶାଳପତ୍ର ବିଡା ସହିତ ଗୁଆ, ନଡିଆ, ଫୁଲ, ବେଲପତ୍ର ଆଦି ପୂଜା ସାମଗ୍ରୀକୁ କନ୍ୟାପିତାଙ୍କୁ ହସ୍ତାନ୍ତର କରିଥିଲେ। ସପ୍ତଋଷୀ ଭାବେ ବିଜୟ ମିଶ୍ର, କାମପାଳ ହୋତା, ଗୋଳକ ବିହାରୀ ମିଶ୍ର, ଶଶାଙ୍କ ଶେଖର ନନ୍ଦ, ଚକ୍ରଧର ମିଶ୍ର, ପୂର୍ଣଚନ୍ଦ୍ର ମିଶ୍ର ଏବଂ ଅମରେନ୍ଦ୍ର ପୂଜାରୀ ଯୋଗଦେଇଥିଲେ। ଆସନ୍ତା ଗୁରୁବାର ଅନ୍ୟ ସମସ୍ତ କମିଟିର ପତରପେଣ୍ଡି ଅନୁଷ୍ଠିତ ହେବ।