ଭାରସାମ୍ୟ ହରାଇ ଲୋକଙ୍କ ଉପରେ ମାଡ଼ିଗଲା ଟ୍ରକ, ୪ ମୃତ
ରାଇରଙ୍ଗପୁର : ମୟୂରଭଞ୍ଜ ଜିଲା ବିଶୋଇ ଥାନା ଅନ୍ତର୍ଗତ ଜାତୀୟ ରାଜପଥ ୪୯ ନମ୍ବର ନୂଆଗାଁ ଛକରେ ମର୍ମନ୍ତୁଦ ସଡକ ଦୁର୍ଘଟଣା ।ଭାରସାମ୍ୟ ହରାଇ ଏକ ଟ୍ରକ ରାସ୍ତାକଡ଼ରେ ଠିଆ ହୋଇଥିବା ୪ଜଣଙ୍କ ଉପରେ ଚଢିଗଲା । ଫଳରେ ଘଟଣାସ୍ଥଳରେ ୩ ଜଣଙ୍କ ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ହୋଇଥିଲା । ଗୁରୁତରଙ୍କୁ ଉଦ୍ଧାର କରାଯାଇ ବାରିପଦା ଜିଲା ହସ୍ପିଟାଲରେ ଭର୍ତ୍ତି କରାଯାଇଥିଲେ ହେଁ ଚିକିତ୍ସାଧୀନ ଅବସ୍ଥାରେ ତାଙ୍କର ମଧ୍ୟ ମୃତ୍ୟୁ ହୋଇଥିଲା।
ସୂଚନା ଯେ, ରବିବାର ରାତି ୧୨ଟା ୩୦ ମିନିଟ ସମୟରେ ଏଭଳି ଦୁଃଖଦ ମର୍ମନ୍ତୁଦ ଦୁର୍ଘଟଣା ଘଟିଥିଲା। ବିଶୋଇ ଥାନା ଅଧିକାରୀ ଫଣୀନ୍ଦ୍ର ଭୂଷଣ ନାଏକ ଖବର ପାଇ ଘଟଣାସ୍ଥଳରେ ପହଞ୍ଚି ମୃତକଙ୍କୁ ରାଇରଙ୍ଗପୁର ହସ୍ପିଟାଲକୁ ପଠାଇଥିଲେ। ଟ୍ରକର ଡ୍ରାଇଭର ଓ ହେଲପର ଘଟଣାସ୍ଥଳରେ ଫେରାଇ ହୋଇଯାଇଛନ୍ତି। ମୃତକମାନେ ଅଙ୍ଗାରପଦା ହାଟରୁ ଫେରି ନୂଆଗାଁ ରାସ୍ତାକଡ଼ରେ ବୋଲରୋ ରଖି ଛିଡ଼ା ହୋଇଥିବା ସମୟରେ ଦୁର୍ଘଟଣାର ଶିକାର ହୋଇଥିଲେ। ମୃତକ ମାନେ ହେଲେ ଝାରପୋରିଆ ଥାନା ଅଂଚଳର ପଳାଶବଣି ଗ୍ରାମର ସୁକୁରା ମାହାଲି(୫୦), ବାଙ୍ଗିରିପୋଷି ଥାନା ଅଂଚଳର କଦମଡିହି ଗ୍ରାମର ସାଲଖାନ ହାଁସଦା, ବାଙ୍ଗିରିପୋଷି ଥାନା ଅଂଚଳର ବେଢାକୁଦର ଗ୍ରାମର ଶୁଶାନ୍ତ ମହାନ୍ତ ଏବଂ ସିଲିଫୋଡି ଗ୍ରାମର ଦୁର୍ଗା ନାଏକ। ସୋମବାର ଦିନ ପୁଲିସ ଏକ ମାମଲା କେଶ ନଂ ୬୦/୨୨ ରୁଜୁ କରି ତଦନ୍ତ କରିବା ସହ ମୃତକଙ୍କ ଶଵ ବ୍ୟବଚ୍ଛେଦ ପାଇଁ ରାଇରଙ୍ଗପୁରକୁ ପଠାଯାଇଛି ।
