ପଞ୍ଜାବ ରାଜ୍ୟପାଳଙ୍କୁ ଭେଟି ସରକାର ଗଢ଼ିବା ପାଇଁ ଦାବି ଉପସ୍ଥାପନ କଲେ ଭଗବନ୍ତ ମାନ୍
ଚଣ୍ଡିଗଡ଼: ପଞ୍ଜାବରେ ଆମ୍ ଆଦମୀ ପାର୍ଟିର ମୁଖ୍ୟମନ୍ତ୍ରୀ ପ୍ରାର୍ଥୀ ଭଗବନ୍ତ ମାନ୍ ଶନିବାର ରାଜ୍ୟପାଳ ବନୱାରିଲାଲ ପୁରୋହିତଙ୍କୁ ଭେଟିଛନ୍ତି। ସରକାର ଗଠନ ପାଇଁ ସେ ଦାବି ଉପସ୍ଥାପନ କରିଛନ୍ତି। ସେ ମାର୍ଚ୍ଚ ୧୬ରେ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ।
ସୂଚନାଯୋଗ୍ୟ, ଶୁକ୍ରବାର ମୋହାଲିରେ ଅନୁଷ୍ଠିତ ଆପ୍ ବିଧାୟକଙ୍କ ବୈଠକରେ ଭଗବନ୍ତ ମାନ୍ ଦଳର ନେତା ଭାବରେ ନିର୍ବାଚିତ ହୋଇଥିଲେ । ଆପ୍ ସରକାରରେ ମନ୍ତ୍ରୀ ପଦ ପାଇଁ ହରପଲ ସିଂ ଖେମା, ଅମନ ଆରୋରା, ବଲଜିନ୍ଦର କୌର, ସରବଜିତ କୌର, ଗୁରୁମିତ ସିଂ ମିତ୍ ହେୟାର, ବୁଦ୍ଧ ରାମ, କନୱର ବିଜୟ ପ୍ରତାପ ସିଂ, ଜୀବନଜ୍ୟୋତ କୌର ଏବଂ ଡଃ ଚରଣଜିତ ସିଂଙ୍କ ସମେତ ଅନେକ ଆପ୍ ବିଧାୟକଙ୍କ ନାମ ରହିଥିବା ପଞ୍ଜାବରେ ଆଲୋଚନା ହେଉଛି ।
ଭଗବନ୍ତ ମାନ ତାଙ୍କ ଶପଥ ଗ୍ରହଣ ଉତ୍ସବରେ ଆପ୍ ର ଜାତୀୟ ଆବାହକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ନିମନ୍ତ୍ରଣ କରିଛନ୍ତି। ଭଗବନ୍ତ ମାନ୍ ନବନସାୟର ଜିଲ୍ଲାର ମହାନ ସ୍ୱାଧୀନତା ସଂଗ୍ରାମୀ ଭଗତ ସିଂହଙ୍କ ପୈତୃକ ଗାଁ ଖଟକର କଲାନରେ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ। ଆପ୍ ଦ୍ଵାରା ଜାରି ଏକ ବିବୃତ୍ତି ଅନୁଯାୟୀ ରବିବାର ଭଗବନ୍ତ ମାନ୍ ଏବଂ କେଜ୍ରିୱାଲ ସ୍ବର୍ଣ୍ଣ ମନ୍ଦିର, ଦୁର୍ଗିୟାଣା ମନ୍ଦିର ଏବଂ ଶ୍ରୀ ରାମତୀର୍ଥ ମନ୍ଦିର ପରିଦର୍ଶନ କରିବେ। ସେ ମଧ୍ୟ ଅମୃତସରର ଏକ ରୋଡ୍ ସୋରେ ଅଂଶଗ୍ରହଣ କରିବେ ଏବଂ ଆପ୍ ର ବିଜୟ ଉତ୍ସବ ପାଳନ କରିବେ ଏବଂ ଭୋଟରଙ୍କୁ ଧନ୍ୟବାଦ ଦେବେ | ୧୧୭ ସଦସ୍ୟ ବିଶିଷ୍ଟ ବିଧାନସଭାରେ ଆମ୍ ଆଦମୀ ପାର୍ଟି ୯୨ ଟି ସିଟ୍ ଜିତିଥିଲା |
