ବିଡବ୍ଲୁଏଫ ୱାର୍ଲ୍ଡ ଟୁର୍ : ଫାଇନାଲରେ ଭାରତୀୟ ଷ୍ଟାର ସର୍ଟଲର ପିଭି ସିନ୍ଧୁ
ବାଲି : ବିଡବ୍ଲୁଏଫ ୱାର୍ଲ୍ଡ ଟୁର୍ ଫାଇନାଲ୍ସରେ ଭାରତୀୟ ଷ୍ଟାର ସର୍ଟଲର ପିଭି ସିନ୍ଧୁଙ୍କ ବିଜୟ ଅଭିଯାନ ଜାରି । ଦୁଇ ଥରର ଅଲମ୍ପିକ ପଦକ ବିଜେତା ସିନ୍ଧୁ ସେମିଫାଇନାଲ ମୁକାବିଲାରେ ଜାପାନର ଆକାନେ ୟାମାଗୁଚୀଙ୍କୁ ହରାଇ ଫାଇନାଲରେ ପ୍ରବେଶ କରିଛନ୍ତି । ମାଙ୍ଗୁପୁରା ହଲ୍ ୧ରେ ଖେଳାଯାଇଥିବା ସଂଘର୍ଷପୂର୍ଣ୍ଣ ସେମି ମୁକାବିଲାରେ ୟାମାଗୁଚୀଙ୍କୁ ୨୧-୧୫, ୧୫-୨୧, ୨୧-୧୯ ସେଟ୍ରେ ହରାଇଛନ୍ତି ସିନ୍ଧୁ। ଏହି ମ୍ୟାଚ୍ ଏକ ଘଣ୍ଟା ୧୦ ମିନିଟ ଧରି ଖେଳାଯାଇଥିଲା ।
ରବିବାର ଫାଇନାଲ ମୁକାବିଲାରେ ଦକ୍ଷିଣ କୋରିଆର ଆନ ସେୟଙ୍ଗ୍ଙ୍କୁ ଭେଟିବେ ସିନ୍ଧୁ । ସେୟଙ୍ଗ୍ ପୂର୍ବରୁ ପ୍ରଥମ ସେମିଫାଇନାଲରେ ଥାଇଲାଣ୍ଡର ପର୍ନପୱି ଚୋଚୁୟଙ୍ଗଙ୍କୁ ୨୫-୨୩, ୨୧-୧୭ ସେଟ୍ରେ ହରାଇ ଫାଇନାଲ ଟିକେଟ ହାତେଇଛନ୍ତି । ସିନ୍ଧୁ ଓ ୟାମାଗୁଚୀଙ୍କ ମଧ୍ୟରେ ଏହି ମୁକାବିଲା ୨୧ତମ ଭେଟ ଥିଲା । ଏହି ବିଜୟ ପରେ ସିନ୍ଧୁ ହେଡ୍ ଟୁ ହେଡ୍ ରେକର୍ଡରେ ୧୩-୮ରେ ଆଗରେ ରହିଛନ୍ତି ।
