କଙ୍ଗନାଙ୍କୁ ହତ୍ୟା ଧମକ, ଥାନାରେ ଏଫଆଇଆର ଦାଖଲ
ମୁମ୍ବାଇ : ବଲିଉଡ କୁଇନ କଙ୍ଗନା ରଣାୱତଙ୍କୁ ମିଳିଛି ହତ୍ୟା ଧମକ । ଏନେଇ ଅଭିନେତ୍ରୀ ଥାନାରେ ଏକ ଏଫଆଇଆର ଦାଖଲ କରିଛନ୍ତି କଙ୍ଗନା। କଙ୍ଗନା ଏଫଆଇଆରର କପି ସୋସିଆଲ୍ ମିଡିଆରେ ସେୟାର କରିଛନ୍ତି । ସେ ଇନଷ୍ଟାଗ୍ରାମରେ ଲେଖିଛନ୍ତି, “ମୁମ୍ବାଇରେ ହୋଇଥିବା ଆତଙ୍କବାଦୀ ଆକ୍ରମଣର ସହିଦମାନଙ୍କୁ ମନେ ପକାଇ ମୁଁ ଲେଖିଥିଲି ଯେ ଦେଶଦ୍ରୋହୀମାନଙ୍କୁ କେବେ ବି କ୍ଷମା କର ନାହିଁ କିମ୍ବା ଭୁଲିଯାଅ ନାହିଁ । ଏପରି ଘଟଣାରେ ଦେଶର ଆଭ୍ୟନ୍ତରୀଣ ଦେଶଦ୍ରୋହୀଙ୍କ ହାତ ରହିଥାଏ । ଦେଶଦ୍ରୋହୀ କେବେ ଟଙ୍କା ଲୋଭରେ ତ ଆଉ କେବେ ପଦ ଓ କ୍ଷମତାର ଲୋଭରେ ଭାରତ’ମାକୁ କଳଙ୍କିତ କରିବାର କୌଣସି ସୁଯୋଗ ଛାଡି ନାହାଁନ୍ତି |” ମୋର ଏହି ପୋଷ୍ଟରେ, ମୋତେ ନିରନ୍ତର ଧମକ ମିଳୁଛି । ବଥୀଣ୍ଡାରୁ ଜଣେ ଭାଇ ସାହେବ ମୋତେ ହତ୍ୟା କରିବାକୁ ଖୋଲାଖୋଲି ଧମକ ଦେଇଛନ୍ତି । ମୁଁ ଏପରି ଧମକକୁ ଭୟ କରେ ନାହିଁ । ଦେଶ ବିରୋଧରେ ଷଡଯନ୍ତ୍ର ଏବଂ ଆତଙ୍କବାଦୀ ଶକ୍ତି ବୋଧରେ ସର୍ବଦା କହୁଛି ଏବଂ କହିବି ।
ସେ ଏହା ମଧ୍ୟ ଲେଖିଛନ୍ତି, ‘ଗଣତନ୍ତ୍ର ଆମ ଦେଶର ସବୁଠାରୁ ବଡ ଶକ୍ତି, ସରକାର ହୁଏତ କୌଣସି ଦଳର ହୋଇପାରନ୍ତି, କିନ୍ତୁ ଦେଶର ଅଖଣ୍ଡତା,ଏକତା ତଥା ନାଗରିକ ମୌଳିକ ଅଧିକାରର ରକ୍ଷା ତଥା ଚିନ୍ତାଧାରାର ଅଭିବ୍ୟକ୍ତିର ସୁରକ୍ଷା ଆମକୁ ବାବାସାହେବ ଆମ୍ବେଦକରଙ୍କ ସମ୍ବିଧାନ ଦେଇଛନ୍ତି । ମୁଁ କୌଣସି ଜାତି, ଧର୍ମ କିମ୍ବା ଗୋଷ୍ଠୀ ବିଷୟରେ ଅପମାନଜନକ କିମ୍ବା ଘୃଣ୍ୟ କଥା କହି ନାହିଁ । ‘ଅଭିନେତ୍ରୀ ଆହୁରି ଲେଖିଛନ୍ତି, “ମୁଁ କଂଗ୍ରେସ ସଭାପତି ସୋନିଆ ଜୀଙ୍କୁ ମନେ ପକାଇବାକୁ ଚାହେଁ ଯେ ଆପଣ ମଧ୍ୟ ଜଣେ ମହିଳା, ଆପଣଙ୍କ ଶାଶୁ ଇନ୍ଦିରା ଗାନ୍ଧୀଜି ଶେଷ ମୁହୂର୍ତ୍ତ ପର୍ଯ୍ୟନ୍ତ ଏହି ଆତଙ୍କବାଦ ବିରୋଧରେ ଲଢିଥିଲେ । ଦୟାକରି ପଞ୍ଜାବର ମୁଖ୍ୟମନ୍ତ୍ରୀଙ୍କୁ ନିର୍ଦ୍ଦେଶ ଦିଅନ୍ତୁ । ଏହିପରି ଆତଙ୍କବାଦୀ,ବିଶୃଙ୍ଖଳାକାରୀ ତଥା ଜାତୀୟ ବିରୋଧୀ ଶକ୍ତିଙ୍କ ଧମକ ଉପରେ ସେ ତୁରନ୍ତ କାର୍ଯ୍ୟ କରନ୍ତୁ ।
